《日頭嘅我係個學生，夜晚嘅我就係個降魔師》: 《降魔師篇》第一章 Ep.07
「等...等等先，依加係發生咩事？點解我地會做降魔師？」呢一刻我個腦接收嘅資訊量實左太多，我根本就load唔切發生緊咩事。
「阿洛你過黎搵我唔係就係為左呢樣咩？」歐陽sir問。
「唔...呀...我...」
「係呀，我地要做降魔師。」海澄係我身後面行左上黎。
「咁就好啦，我幾驚誤會左你呀。」歐陽sir托一托眼鏡再講：「咁大家介紹下自己先啦。」
係雜物房入面有一張大枱，周圍坐左幾個同學，睇黎佢地都係跟歐陽sir做降魔師。
「咦！你咪係偉豪？我好中意聽你唱歌架！」我對住入面一個all back嘅男仔講。
「乜原來我咁出名架？咁多人識我嘅，哈哈。」偉豪笑笑口咁講。
「佢係咩人黎架？」海澄細細聲係我耳仔邊問我。
「偉豪wor，forever sing 個主音呀，成日busking 都會見到佢地架，佢地仲上過電視架wor?你咁都唔識？」我同番海澄介紹。
「係wor，我記得你呀，你唱歌都幾掂架wor,拎過sing-con冠軍架嘛。呀，叫咩名呢....諗下先。」原來偉豪都有留意過我，可惜唔記得我個名，但唱歌呢d野記得我把聲就夠啦。
「好啦，講番正題先，你地叫我偉豪得架啦，我用嘅係驅魔術，睇下，佢就係我嘅法器啦。」偉豪拎左對白色手套出黎，手套上面有一個魔法陣咁嘅野，但個魔法陣實左太復雜，我理解唔到上面嘅野係咩意思。
「哇！偉豪你係鋼之鍊金術師呀？」我一見到對手套就唔覺意叫左出聲。
「拿！唔係淨係得我咁講架！」坐係偉豪隔離嘅一個女仔好大力咁拍左偉豪一下。
「痛架屌，阿詠你唔好咁大力打我啦！」偉豪對住個女仔隔空揮拳。
「我叫阿詠呀，我細你地一年架。我呢就係用呢塊八咫鏡，遲d有機會嘅我再比你地睇啦。」阿詠一邊梳頭一邊講。阿詠高過海澄少少，留斜陰，扎馬尾，佢呢種可愛唔同海澄果種，海澄果種係細細粒好得意，阿詠呢種就係笑起上黎好甜果隻。
海澄見我望阿詠望到實一實就即刻打斷左我地：「你地好呀，我叫海澄，我嘅靈力係電，平主要都係用符。呢個係阿洛，佢啱啱先接觸呢方面，所以佢嘅靈力都仲未咁清楚。」
「喂呀，你都比我自己講啦！」我拍一拍海澄。
「唔得呀！」海澄碌大對眼扁曬嘴咁望住我。
「Err...Hello呀....」有一把好柔弱嘅男仔聲。
「係wor，你都未介紹自己wor。」我同果個男仔講。
「我...我係...Ivan呀...我呢....係.....」Ivan佢睇落好怕醜，佢好似好驚同人講野咁。
「佢好勁架，佢係術師黎架，佢可以操控妖怪架！」阿詠搭住Ivan膊頭講。
「乜原來有咁多種嘅捉鬼方法架？我都係第一次見識到架咋！」我見識到咁多野覺得好神奇。
「係呀，我用嘅驅魔術係西方嘅，而阿詠同Ivan所用嘅方法就係日本流傳嘅，而你地用符嘅呢，就係我地中國傳統嘅方法啦。」偉豪解釋。
「咁邊個方法最勁架？」我好興奮咁問。
「其實又無嘅，不過就各有長處啦，以我嘅驅魔術為例，驅魔術本身就係用黎驅趕邪靈嘅，所以比鬼附身呀，沾染到邪氣呀，呢D情況就會用驅魔術比較適合啦。」
「好啦，咁我地係時候講下我地其實要做咩架啦。」歐陽sir打斷左我地。
「首先，我搵大家番黎係對付唔同嘅鬼嘅，所以我地都要去睇下邊度有咁嘅需要而再決定行動。上次我撞到你兩個嘅果間cafe，其實就係比我地呢D降魔師去接委託架啦。」
「唔怪之得果日會係果度見到你啦。」海澄答。
「無錯，所以我果日見到你條頸鏈仲以為你係去接委託。」歐陽sir指著海澄條鏈講。
「好啦，廢話唔再多講啦，等我地帶你去見識下,跟我黎啦！」偉豪講完之後就起身帶埋我地一齊去接委託。
偉豪、Ivan同阿詠3個人就帶住我同海澄行去果間必食隱世邪惡小店cafe果度接委託。
「偉豪呀，我想問係唔係農曆7月先會有委託架？」我問豪偉。
「吓？點降你會咁諗呀？」偉豪覺得我嘅問題好出奇。
「咁農曆7月先會開鬼門架嘛，咁咪7月先會有鬼囉？唔係咩？」我問。
「哈，你唔好咁傻豬啦！」阿詠搭住我膊頭講。
「的確7月先會開鬼門，但係鬼門入面走左出黎嘅鬼，係鬼門關之前番唔切咁去就會一直留係人世，直至下一年鬼門再開。」
「原來係咁架？我都無諗過呢個問題喎。」海澄講。
「咁我想問下D委託主要係做咩架？」我實在太心急想知到更加多。
「入去你咪知囉，我地到啦。」唔經唔覺我地已經行到去果間必食邪惡乜撚野cafe。
「歡迎光臨！」老闆係吧枱度同我地打招呼。
「我地6個人。」偉豪同老闆講。
「吓？乜唔係5個咩？」我想大大聲講出黎，但都係無講到。
老闆望一望我地，再問：「今日天氣幾好嗎？」
「我地需要打掃一下地方。」偉豪問。
「屌，乜撚野呀？完全唔關事架喎，九唔撚搭八嘅。」當然我都無將心入面果句講到出口。
老闆聽到偉豪咁講，就帶左我地廚房。老闆指住個雪櫃講：「6位呢邊請坐啦。」
「係咪痴撚線架？」我今次終於都忍唔住講左出聲。
然後全部人一齊另轉頭望住我。
「呀....唔好意思呀，頭先睇連登見到個post好撚痴線架，哇，不知幾好笑呀，哈哈，易唔住講左出口添。」我扮曬野係部手機度篤篤下。
「呢位客人你真係好搞笑架姐，好啦，請入坐。」老闆一打開個雪櫃，入面係一間房，原來個雪櫃係一道門。
「好啦，踏入左呢度之後，你地就正式係一個降魔師啦，準備好未？」偉豪開住度門另轉頭問我同海澄。
海澄二話不說就第一個衝左入去：「仲洗諗？我一早就已經決定左！」
眼見海澄咁有決心，我都即係跟隨佢嘅步伐，衝左入個雪櫃門嘅後面。
一入到黎，呢度同cafe嘅樓面可以話係兩個世界。
Cafe嘅樓面係當相光猛，而呢一度可以話係密不透光，只有蠟燭所發出嘅光線。
「哇，呢度咁黑嘅？」我四周圍觀察門後面嘅環境。
「咁係咪有feel d呀，哈哈。」Ivan細細聲咁講。
「好啦，我地坐低再慢慢講啦，入黎啦。」偉豪講。
呢度個feel十足十K房咁樣，沿住走廊有一間一間房仔可以入去。
一推門入到房，房入面有梳化，一張枱同一個螢光幕。
「偉豪呀，我想問頭先你同個老闆講d野咁奇怪嘅？」我對於佢地頭先嘅對話實在係諗極都唔明。
「係暗號呀。」阿詠成個人訓左梳化上面。
「吓，姐係好似特工果d暗號呀？」我追問。
「你都可以咁講啦，我地入黎果陣會報多一位，我地今日得五個人，但係我就講我地六位。」偉豪解釋。
「咁之後老闆同你講天氣好好，你又答佢咩打掃嘅？」海澄問。
「個老闆會求其問一個問題，無論佢講咩都好，我地都會答『我地需要打掃一下地方』，咁樣老闆就會知我地係邊個啦。」偉豪再解釋。
「好啦，睇下今日有咩委託先。」阿詠轉身趴係梳化上面，對住個mon篤篤下。
依加阿詠呢個pose真係好撚誘人，成個人趴係度gut起個pat，真係好想伸個頭落去望....
「搵到啦，一於接呢個啦。」阿詠突然間大叫，打斷左我嘅ff。
「睇過，咩任黎架？」偉豪伸個頭埋去望。
「呢個幾過癮呀，試下囉。」
「呢個委託係做咩架？」海澄都一齊伸埋去望。
「哦，果條後巷無啦啦有好多打架痕跡...」
「咁我地係咪過去啦？」Ivan細細聲咁問，但應該無人聽到。
「係咪就行啦！唔好等啦！」阿詠一講完就好興奮咁衝左出去。