【屋村7-11驚魂】落樓下7仔食個叮叮飯，竟然咁可怕...: 16
「呀！！！」師奶同阿欣佢地兩個驚到叫左出黎，本能反應地用雙手遮住自己對眼。
而我地其他人亦都俾眼前依一幕嚇到反應唔切，大家都呆左係度，四眼哥仔嘗試用手「禁」住自己個傷口，但根本無用，因為佢被「界」既位置係大動脈，ｄ血不斷係佢隻手度滲出黎，我地睇住四眼哥仔既上身俾自己ｄ血染紅，最後仲企唔穩，成個人側埋一邊撞埋去雪房度門，ｄ血就濺到周圍都係。
「呼．．．呼．．．呼．．．」四眼哥仔訓係地下度，身體不自控咁顫抖，而面色亦變得好白，仲發出近乎呻吟既長長呼吸聲。
當我地仲係度發呆，唔知點算好之際，強國男無放過依個機會，馬上踏前向西裝友「吉」埋去，好彩西裝友反應快，不單止避開左，仲用手上把交剪刺傷強國男右手，強國男中左西裝友依一下，即刻後退幾步，但佢仍然擺出一個作戰狀態。
「點算呀！？再係咁落去佢會死架！」雖然我係咁講，但根本我都唔知應該要點做，加上強國男佢個款好似隨時會攻過黎咁，我地大家都唔敢行埋去四眼哥仔度。
「老公，算啦，鵝地都搶到依一箱啦！」強國女人頭先拖左一箱水出去，佢見到自己老公隻手受左傷，西裝男又有武器係手，加上我地依邊人多ｄ，點計佢地都無優勢。
強國男見到咁既情況，都決定唔再勉強去搶，慢慢向後遯，一步一步靠近貨倉門口，但仍然握實把刀面向我地，所以西裝男都冇鬆懈落黎，兩個人依然作勢想進攻咁款，就係強國男行出貨倉門口之際，由於望唔到後面，佢俾頭先佢老婆搬出去果箱貨扳倒，一個失去左平衡，後腦冚左埋身後既零食架度，跟住再撞左落地下，當堂爆晒缸，把刀都飛埋一邊。
「老公！！乃有冇事呀！？！？乃流緊血呀！！」強國女人跪左係老公身邊，好緊張咁睇佢既情況。
訓左係飲品櫃隔離既強國男，緊緊地合埋眼，表現得非常痛苦，雙手「禁」住後腦，離遠都見到佢雙手沾有血跡，似乎依一撞相當應，西裝男想趁依個機會，將強國男頭先把跌係一邊既刀執起，但被強國女人搶先一步。
「乃地咪埋黎呀！！．．．老公，乃見點呀？？．．．乃地敢埋黎傷害鵝老公，鵝就同佢死過！！」強國女人見到自己老公好痛苦果個樣，流到成地血，已經有少少失去理智，一邊慰問佢老公，一邊亂咁揮手上把刀，唔俾其他人乘機傷害佢地。
同時，訓係貨倉地下既四眼哥仔，亦都好痛苦，一隻手繼續「禁」住傷口，另一隻手就想伸向我地度，示意叫我地救下佢，但佢已經辛苦到出唔到聲，只能夠勉強發生微弱既呻吟聲。
「你班傻西，慢慢企度睇野啦。」阿叔見頭先最大威脅既強國男已經失去攻擊力，於是想趁亂搶野，打開放係一旁既箱，睇下入面有ｄ咩值得拎。
我好嬲咁話阿叔：「你有冇搞錯呀！？四眼哥仔就黎死喇！！仲掛住搶？？」
「你都痴線既！我地係醫生咩！？我地點識救佢呀！？就算你係醫生都救唔到佢啦，佢已經流左咁多血，死梗架喇！！少一個同我地搶，咁咪仲好！」
阿叔繼續打開ｄ箱，完全無視四眼哥仔。
「再．．．再唔搶就無！！」
原本企係一邊覺得好驚既師奶，見到阿叔咁狼死去搶野，都覺得自己唔可以咩都唔做，於是都一齊去搶貨。
西裝男見到師奶搶埋一份，於是收起埋把交剪，唔執輸咁同大家去搶貨，一時之間，成個貨倉既氣氛變得非常瘋狂，就好似一班賊去打劫金鋪咁。
基於羊群心理，當身邊既人都一窩蜂去做同一件事，自然會擔心如果自己唔做就會蝕底。
「咁．．．咁我地點做好呀？？不如我地都拎定ｄ食物同水啦！」阿欣表現得不知所惜，好似想由我去做決定咁。
我望住地下既四眼哥仔，佢頭先伸出黎既手已經慢慢放低，雙眼呆呆咁望住天花板，呼吸聲亦變得比頭先細聲，正如阿叔咁講，佢已經無得救。
我唔知道困住我地既係人定係鬼，亦唔知佢打算困住我地幾耐，不過如果我地既推猜無錯，佢真係想我地互相搶奪撕殺既話，咁佢已經成功左。
我唔係偉人，我同其他人一樣，當生命受到威脅既時候，就自然發揮求生既本能，即使要捨棄人性。
「少一個同我地搶，咁咪仲好．．．」頭先阿叔既說話，再一次出現係我腦海入面。
「搶，我地都搶，睇下邊箱有水，我地要多ｄ水！」
「妖，阻撚住晒！」訓係雪房門口既四眼哥仔，被阿叔佢一腳踢開，然後阿叔就捧住個箱走左入雪房，原來佢打算係飲品補貨既位置，將飲品櫃ｄ水搬到自己個箱入面，咁就可以避過守係飲品櫃既強國女人。
我無阻止阿叔咁做，我只係想等阿叔拎完之後，就輪到我入去雪房搶水。
經過一輪埋沒良心既資源搶奪，我地各自抱住一堆「戰利品」帶到貨倉外面，之所以唔索性留係貨倉，最大既原因當然係因為冇人想望住就黎死既四眼哥仔。
依個時候我經過飲品櫃，係一個較近距離見到強國男既情況，似乎佢既傷勢比起我想像中更嚴重，強國男依然合埋眼，個樣好痛苦，佢老婆就除左件風褸墊住佢個頭，我見到強國女人雙手都染晒血。
望到強國男咁樣，我即刻又諗起頭先四眼哥仔向我地求救時果個痛苦樣，究竟我地咁做有冇錯？
「少一個同我地搶，咁咪仲好．．．」
就咁聽落去，好似一條簡單既經濟算式咁，無人會話依一條算式有咩地方計錯左。
正如ｄ政府高官成日出黎講，叫我地應該先搞好經濟，其他問題暫時放埋一邊遲ｄ再理，佢地有時仲會補充多一句：「唔係話我地唔理其他問題，只係暫時唔理，大家即管先搞好經濟，因為依樣野關乎大家既生計，係重中之重！」，每個市民聽完之後，無不認同，的確，搞咁多無謂野做咩，最緊要有飯開，無飯開就咩都勢係假。
但咁樣做真係無問題？真係可以將其他野先放埋一邊暫時唔理？
定還是，大家只不過係度自我麻醉，去勸服自己用一個比較簡單既思維做人，就好似我地不斷說服自己，我地將四眼哥仔棄之不顧係無錯。
「乃地咪埋黎呀！．．．嗚嗚．．．」強國女人好激動咁揮動佢手上把刀，同時又因為擔心佢老公既傷勢而喊起上黎。
頭先強國夫婦果個猙獰既樣，我絕對無忘記，按道理就算我走埋去打佢地一身，在場都唔會有人話我錯。
不過我無咁做，我無停低，更加無打算乘人之危，我只係想快ｄ離開強國夫婦身邊，因為我唔敢正視強國女人雙眼，我好明白，其實我同佢地兩夫婦無咩分別，如果佢地係兇手，咁我都算係一個幫兇，強國夫婦面目可憎既樣，原來正正係我內心既真面目，我實在唔敢面對。
阿叔佢係第一個抱住個箱走出黎，佢走左去雜誌架果邊，似乎係因為想遠離其他人，佢再係收銀櫃隔離拎住把７仔遮當係武器，一望到我地走出黎，即刻對我地好有戒心。
同阿叔唔同，我地其他人並無好似預期咁互相顧忌互相防範，我地只係抱住自己既戰利品，呆呆坐左係收銀櫃果邊，師奶同西裝友背住收銀櫃，阿欣同我就坐係對面。
明明貨倉度門關埋之後，我地應該唔會再聽到四眼哥仔既呼吸聲，但唔知點解，佢既呼吸聲同埋佢果個好痛苦既樣，好似無離開過我地個心。
我不斷係度諗，假如我真係有機會番出去，我仲有冇勇氣去面對其他人？如果事後有人問起我，當四眼哥仔死既時候我係度做緊咩，我應該點答呢？
就係咁，我地幾個坐係度一粒聲都無出過。
唔知過左幾耐，我發現原來有一枝鋼筆跌左係我附近，我無意識咁拎左上手望下，雖然我唔識得有咩出名既鋼筆牌子，但就咁望落去，我估依枝筆應該係貴價貨。
當我拎住枝筆係度望既時候，我發現坐係對面既西裝友望住我手上枝筆，欲言又止。
「．．．依枝筆係你既？」我伸出手上枝鋼筆問西裝友。
「嗯．．．唔該你．．．」西裝友伸手接過枝筆，我發現佢隻手上面有ｄ血跡，唔知道係頭先刺傷強國男果陣沾到，定還是係周圍搶貨既時候掂到四眼哥仔既血。
佢呆呆望住枝筆，果枝俾自己手上血跡整污糟既鋼筆，突然用手「禁」住自己個頭，苦笑起上黎。
「哈．．．哈哈．．．不知所謂．．．我真係不知所謂．．．」
「你．．．冇咩事ｍａ？」阿欣見到西裝友咁奇怪，於是乎好心咁問下佢做咩。
西裝友無望住我地，視線依然落係枝筆度：「依枝筆．．．我曾經因為想自己可以襯得起依枝筆，犠牲左好多野，做左好多好多違背良心既事．．．到頭黎，我竟然要係度為左幾枝水去埋沒良心．．．我真係傻！我真係不知所謂！！」
我雖然唔知道西裝友既往事，不過聽佢咁講，我估佢應該係度後悔緊自己既過去。
「話唔定我地仲有機會番出去．．．就算做過咩錯事，到時候你都有機會補償．．．」我嘗試講ｄ野去緩和氣氛，不過似乎起唔到作用。
西裝友顯得好感慨：「．．．無喇，無機會架喇．．．我試過為左上位，出賣自己朋友，我又試過為左簽成份合約，連我阿爸既最後一面都唔見．．．我以為錢就係一切，當ｄ強國人黎度，炒貴晒香港ｄ樓，炒貴晒衣食住行所有野，我無理會，我仲笑其他人唔識乘機搵錢，我仲因為自己手上果幾層樓係咁升值而開心到訓唔著．．．哈，我都有今日喇，成日發夢自己可以儕身上流社會，以為只要有錢可以做一個上等人，到頭來竟然係間７仔入面俾果對強國夫婦玩番轉頭我都無聲出，頭先果個四眼仔向我求救，我竟然仲要扮見唔到．．．我一直以黎做咁多野，原來咩都無改變到，我始終都係咁不知所謂！！」
原來西裝友同我一樣，面對唔到自己咁不勘既一面。
聽見西裝友咁講，睇黎佢為左成功為左上位，曾經做過好多錯事，依一種人本應係我最討厭既類型，但佢講完之後，我覺得好慚愧，唔止係因為我地對四眼哥仔見死不救，更加重要既係，我剛才竟然都變左做果種我曾經好討厭既人。
西裝友既一番說話，同時亦觸動左師奶既神經。
「做咩姐！？你估我地想架咩？又唔係我整死四眼哥仔！關我咩事姐．．．我只係一個師奶仔，唔識ｄ咩大道理，但我無犯過法無諗過害人，依家有人死左，做咩講到我地有份害成佢咁姐！？」
好明顯，師奶依一番說話只係想自己好過一ｄ。
阿欣：「但係．．．頭先我地．．．真係見死不救．．．」
唔知道師奶係因為出於自責，定還是被我地既說話所影響，佢開始喊起上黎：「我唔知我唔知我唔知！！！．．．嗚．．．點解大家唔可以扮到咩事都冇發生！？點解你地唔可以好似我咁做人隻眼開隻眼閉！？四眼哥仔唔死都死左．．．我只係想過ｄ安穩既生活，簡簡單單做人，咁都有錯咩？點解你地係都要挖ｄ野出黎講！？」
聽見師奶講到咁激動，我知道其實佢內心都明白咁做係錯，佢唔係一個壞人，佢只不過係果種多一事不如小一事、安於逸樂既人。
見到師奶咁樣，我地冇人再講落去，大家都靜左落黎。
「呀．．．放鵝出去．．．呀．．．放鵝走．．．鵝要走．．．」飲品櫃果邊，突然傳黎強國男含糊不清既聲音，唔知係咪因為流左唔少血，佢神智應該唔多清醒。
「老公！！乃唔好嚇我呀，老公，乃見點呀！？．．．點解，點解仲未止血既？？老公，乃唔好有事呀！」強國女人既語氣好緊張。
阿叔自言自語：「挑！係死就快ｄ啦．．．咪係度阻住地球轉呀。」
「呀．．．呀．．．放．．．放鵝走呀．．．」雖然強國男真係一個仆街，但聽住佢既叫喊聲，我地多多少少都覺得好不安，事關今晚實在發生左太多事，依度無人會諗過，只不過係入黎７仔買ｄ野，竟然都搞到要死人。
「老公，乃等等，廁所個藥箱應該有紗布，等鵝幫你包住個頭！」
係我地個位置，見唔到強國夫婦佢地，不過聽聲可以估計，強國女人應該打開左貨倉度門，已經入左去廁所拎紗布。
之但係，過左一陣都聽唔到佢行番出黎，正當我係度諗發生咩事之際，就聽到強國女人大叫：「呀．．．呀！！！！」
我地所有人都俾強國女人既叫聲嚇親，大家都企晒起身，行過ｄ望下貨倉果邊發生咩事，一行埋去，就見到強國女人企係貨倉門口面向我地，神色荒張咁話：「冇．．．冇左．．．冇左．．．」
無人明白強國女人既意思，佢又對住佢老公重覆一次：「冇左．．．冇左．．．」
「都痴痴地，咩左冇咁大件事呀！？」阿叔忍唔住開口問。
「冇左．．．四眼哥仔冇左．．．佢唔見左！！」