【屋村7-11驚魂】落樓下7仔食個叮叮飯，竟然咁可怕...: 17
下！？係咪我理解錯左？唔見左！？四眼哥仔？？有咩理由會唔見左？？
「唔見左．．．？呀．．．呀．．．」強國男聽到佢老婆咁講，勉強企起身，一邊「禁」住流緊血既頭，一邊腳步踉蹌咁走左入去貨倉，而我地其他人都跟住一齊走左入去睇下發生咩事。
一入到去，正如強國女人所講，原本訓低左係雪房門口既四眼哥仔不翼而飛，地下同牆邊就遺留左一大灘血跡。
「有冇人．．．親眼確認過，四眼哥仔係死左？」西裝友係第一個出聲。
「我記得．．．頭先我係最後一個離開貨倉，果時四眼哥仔應該未死．．．」要我再諗起頭先自己見死不救既情形，感覺唔多好受。
阿叔：「咁即係佢有可能自己搵到方法逃走左！？」
依一刻，我都希望阿叔講既野係真，如果四眼哥仔冇死度，起碼我唔洗咁內疚。
「出口．．．一定有出口．．．呀．．．」強國男好辛苦咁吐左依幾隻字出黎，我都相信依個係最合乎常理既諗法。
不過單從血跡黎睇，唔發現有向其他地方伸延，感覺就好似，四眼哥仔係憑空消失左咁。
我地幾個人唔理咁多，先去貨倉每個位置再搜查一次，不過阿欣就好似猶有餘悸，唔多敢係貨倉內四圍走動，始終係無耐之前貨倉入面發生左咁多事。
雪房、廁所、辦公室，我地冇放過任何一個角落，不斷敲打貨倉入面既牆身、地板同埋天花，就連ｄ貨都搬開晒黎睇下，但根本無咩所謂秘道出口之類既野。
強國男面色唔多妥，坐左係地下度休息，佢老婆就係身邊睇住佢，而我地其他人，就不明所以咁企晒係度。
明明成個貨倉一眼睇晒，明明十幾分鐘前四眼哥仔仲係依度，究竟佢點解會唔見左？
搞完一大輪都毫無頭緒，阿叔：「先唔好理四眼仔有冇死到．．．問題係，依度根本唔似有咩地方可以離開！！」
阿欣：「會唔會．．．成個貨倉係有機關呢．．．？」
一個７仔貨倉會有「機關」，本來依個講法真係無稽到極，但今晚所發生既事，已經遠超我地所能夠理解，咁又有咩野係無可能。
西裝友唔排除依個可能性：「如果話我地係俾人有目的咁困住係依度．．．咁個貨倉有機關都唔出奇，可能個機關仲要好難發現添．．．」
「咁ｄ血跡又點解釋？？」我指住地下同牆邊既血跡問大家。
阿叔：「血跡？ｄ血跡有咩問題呀？」
西裝友補充：「頭先成地血，無論四眼哥仔係自己離開又好，係俾人搬走都好，照計地下應該會有ｄ痕跡．．．但宜家睇唔到有．．．」
阿叔：「喂，點搞架，咁四眼仔即係無啦啦唔見左！？邊有咁既可能呀！？」
西裝友試圖諗一個解釋：「頭先你地講果個季嬸係依度唔見左，宜家四眼哥仔又唔見左．．．個貨倉可能真係有機關，至於點解四眼哥仔可以憑空消失，或者都係果個機關做成。」
「機關機關．．．喂，依度有幾大，你地都見到架啦，除非原來成幅牆都移得開就話姐．．．」阿叔一邊講，一邊手指指。
阿叔無意既手指指，指左埋去入面果排ｌｏｃｋｅｒ，就係頭先我埋去睇下有冇咩發現既果個ｌｏｃｋｅｒ。
Ｌｏｃｋｅｒ．．．四眼哥仔．．．季嬸．．．
「四眼哥仔！！點解無左四眼哥仔既？？」我突然叫左出黎。
「屌你，無啦啦大叫真係俾你嚇撚死！你痴鳩左邊條線呀，頭先我地咪就係講緊四眼仔做咩唔見左ｌｏｒ，你做咩撚大大聲咁講多次呀！？」唔單只阿叔，就連其他人都覺得我好奇怪。
「唔係呀！我係想話，果個ｌｏｃｋｅｒ無左四眼哥仔呀！」由放我太心急，組織唔到自己想講咩，淨係識好緊張咁手指指果個ｌｏｃｋｅｒ。
西裝友：「咩叫『ｌｏｃｋｅｒ無左四眼哥仔』？你究竟想講咩？」
我行埋去果個ｌｏｃｋｅｒ，好肯定自己無睇錯，於是再同大家講：「頭先我一第次入黎睇果陣都唔為意有咩問題，你地過黎睇下ｌｏｃｋｅｒ上面ｄ名牌，依度根本冇一個ｌｏｃｋｅｒ係屬於四眼哥仔！」
係我叫大家埋黎睇既時候，我先至發現，原來師奶頭先一直都無入過黎貨倉，佢係出面做咩事？？不過唔理住，其他人都已經走埋黎望下個ｌｏｃｋｅｒ，而強國男人睇黎幾辛苦，所以佢兩夫婦無企起身走過，不過我地講既野，佢地應該都聽到。
西裝友望住ｌｏｃｋｅｒ：「季嬸．．．誠叔．．．Ｋｉｔｔｙ．．．咁睇好似無一個Ｌｏｃｋｅｒ係屬於四眼哥仔．．．」
阿欣指住果個無名牌既ｌｏｃｋｅｒ：「咁果個ｌｏｃｋｅｒ呢？會唔會係四眼哥仔架？」
我：「我之前己經睇過，入面咩都冇放，似乎係無人用。」
阿叔：「會唔會四眼仔個花名叫做誠叔呀？．．．咁就算佢無ｌｏｃｋｅｒ又點姐？」
我：「咁唔多合理．．．有咩理由佢無ｌｏｃｋｅｒ用呢？依度明明有個冇人用既ｌｏｃｋｅｒ．．．」
阿叔：「或者係佢自己唔想用ｌｏｃｋｅｒ呢。」
阿欣：「咁講好似有ｄ牽強．．．而且就算唔用，都應該有個名牌掛．．．」
阿叔：「咁究竟你地想講咩，成班人圍住個ｌｏｃｋｅｒ，得出ｄ咩結論呢？」
其實我都唔知點答阿叔依個問題，的確，ｌｏｃｋｅｒ係有ｄ古怪，但唔明白既野實在太多。
誰不知，西裝友突然講：「咁．．．如果，四眼哥仔唔係依度既員工呢．．．？」
我同阿欣互相對望，大家都唔知道西裝友想講咩。
阿叔：「喂你真係ｕｐ得就ｕｐ，無啦啦四眼仔點會唔係依度既員工呀？？我成日黎７仔打躉都同佢吹水架！你咪係黎得７仔少唔記得呀！？」
西裝友更正佢既問題：「我都周不時夜晚黎買野，我都認得佢。我係想話，佢會唔會已經唔再係７仔既員工？」
阿欣：「你係想話，佢俾人炒左？」
西裝友：「嗯，無錯，依點係我唯一諗到點解佢無ｌｏｃｋｅｒ。」
我好似知道西裝友想講咩：「你既意思係，四眼仔俾人炒左之後繼續扮係度番工？」
阿叔：「你有冇病呀！？俾人炒左仲係度收銀？貪得意呀？喂，仲有ｗｏ，你估話扮就扮呀，間７仔仲有其他員工架ｍａ！」
西裝友：「你今晚真係有見過季嬸咩？」
西裝友依個問題，令阿叔呆左一呆，阿叔係度諗番今晚既情形：「．．．冇．．．今晚我一入黎，就淨係見到四眼仔．．．」
我亦都諗起頭先四眼哥仔同阿叔既對話：「我都記得，阿叔問四眼哥仔個拍檔季嬸去左邊，四眼哥仔就話季嬸去左廁所。」
西裝友繼續問：「咁今晚，我地邊一個最早入黎依間７仔？」
阿叔：「應該係我．．．無錯，係我！我比你地早入黎。」
西裝友：「咁即係話，我地今晚根本無人見過四眼哥仔口中既季嬸．．．」
阿叔：「喂，咁你究竟想講咩呀？．．．唔通你係話果個四眼仔有古怪？」
阿欣越聽就覺得越心寒：「點睇．．．果個四眼哥仔都正正常常架ｗｏ．．．」
西裝友：「我都唔清楚，其實都仲有好多野諗唔明，正如頭先大家咁諗，好似有人刻意要我地困獸鬥，但無論點睇，好難相信果個四眼哥仔係ｄ咩幕後黑手．．．」
一間永遠都走唔到既７仔、神秘ｍａｄａｍ、困獸鬥，宜家仲話四眼哥仔有古怪，仲懷疑有咩貨倉機關將佢帶走．．．一堆全無關係既線索，根本唔知應該係邊度著手。
阿叔：「諗咁多做咩鬼，與其估估下，不如試下打開其他ｌｏｃｋｅｒ，睇下有咩發現仲好啦！」
阿叔終於有ｄ實際既建議，如果話成個貨倉仲有咩地方未搵過，睇怕就只剩低眼前依幾格ｌｏｃｋｅｒ。
我：「咁等我去搵ｄ架餐撬開ｄ ｌｏｃｋｅｒ！」
西裝友：「唔洗逐個ｌｏｃｋｅｒ撬開咁煩，頭先我見到辦公枱果邊有一個鎖左既櫃桶，我估計櫃桶入面可能有ｌｏｃｋｅｒ既後備匙，只要搵方法打開果櫃桶就得。」
西裝友一邊講，一邊行埋去辦公枱，佢係枱面搵到一把鐵尺，然後係櫃桶既側邊將把鐵尺攝入去，嘗試夾硬撬開果個櫃桶。
「你咁點會撬得開架，等我黎啦！」阿叔示意西裝友行開，然後佢將個鐵尺再攝入多ｄ，鐵尺露出外面既部份得番五分一，跟住阿叔佢就一腳伸埋去把鐵尺露出既部份，試圖用衝擊力去撬果個櫃桶。
咁樣一腳伸埋去，把鐵尺露出既部份彎左少少，不過似乎真係有ｄ效，因為頭先成個櫃桶都好似俾野由入面向外撞出黎咁，連個鎖都幾乎撞壞，於是乎，阿叔再試多幾腳，終於都打開到個櫃桶，正如西裝友估計，入面真係有一抽鎖匙。
阿叔拎住抽鎖匙去ｌｏｃｋｅｒ果邊，但西裝友無跟住黎，佢係度開緊辦公枱上面果部電腦。
我：「你想做咩呀？」
西裝友望住電腦個ｍｏｎ：「我突然諗到ｄ野，唔洗理我，你地睇下ｌｏｃｋｅｒ入面有咩發現先。」
於是乎，我就行番埋去阿叔果邊，阿叔將ｄ ｌｏｃｋｅｒ一個一個打開，而我同阿欣就望下入ｌｏｃｋｅｒ入面有ｄ咩。
佢地ｌｏｃｋｅｒ入面既野唔多，咁都好正常，我諗７仔入面既員工ｌｏｃｋｅｒ，主要都係俾佢地番工時候放低ｄ私人野。
係「季嬸」個ｌｏｃｋｅｒ入面，放左一個平價手袋，掛住一件黑色外套，而「誠叔」個ｌｏｃｋｅｒ入面就有本馬經同埋掛住件７仔員工制服。
另外係「Ｋｉｔｔｙ」、「嘉嘉」果度都同樣掛住件７仔制服，入面仲有ｄ女仔用既物品，例如鏡、髮夾之類既野，ｌｏｃｋｅｒ入面仲貼左ｄ明星相，最後「Ｍａｒｙ姨」個ｌｏｃｋｅｒ就有一個銀包同埋女裝手錶。
總括黎講，幾個ｌｏｃｋｅｒ入面都係一ｄ好普通既物品，我再打開季嬸個手袋，亦唔覺有咩特別。
依個時候，阿欣拎住左「Ｍａｒｙ姨」個ｌｏｃｋｅｒ入面既銀包，然後又望住我手上既平價手袋。
「你眼定定咁，係度望緊咩？」
阿欣好疑惑咁問：「依間便利店都唔細，咁平時夜更，會有幾多個人番工？．．．」
阿叔：「我久唔久夜晚都會黎，無記錯既話，依間７仔夜更應該有兩個人．．．雖然話間７仔唔細姐，但夜媽媽都唔荒多客人得去邊啦，洗鬼要咁多人番夜咩。」
我再諗下每個人ｌｏｃｋｅｒ入面既物品，突然明白阿欣想講咩：「今晚番夜既人，除左季嬸，另外一個應該係果個Ｍａｒｙ姨！」
阿欣：「嗯，我都係咁諗．．．」
阿叔：「喂喂，咪住先，咁即係話，阿季嬸同埋果個Ｍａｒｙ姨，今晚係有番過黎７仔啦！咁佢地宜家去左邊？仲有果個四眼仔點解會出現？？」
坐係辦法枱果邊既西裝友插嘴：「話唔定依度有你地想知既野。」