【屋村7-11驚魂】落樓下7仔食個叮叮飯，竟然咁可怕...: 15
我再望下其他人，原來阿欣、師奶同埋西裝男都因為太累所以訓著左，而我聽到四眼哥仔好似又有動靜，於是我合番埋眼扮訓。
我聽到，四眼哥仔佢應該揭起左收銀櫃果塊板，靜雞雞係櫃入面走出黎，再行左去飲品櫃果邊。
我再睜開少少眼，確定四眼哥仔行左去入面，於是就踎底個身，行埋去收銀櫃果邊，我利用垃圾桶上方果塊防盜鏡，見到零食架另一邊既地中海阿叔「ｄｕｐ」低左頭，似乎佢都頂唔順訓著左，我再利用收銀櫃作掩護「ｇａｔ」個頭出去，偷望飲品櫃果邊。
原來強國男話會唔訓去守住，但佢都已經釣緊魚，四眼哥仔行埋去佢隔離都唔醒，四睇哥仔望一望強國男人手上把刀。
係機會喇！咩都唔洗講搶走佢把刀最重要！
可惜，怕事既四眼哥仔無咁做，佢望一望強國男，見強國男未醒，於是轉身對住貨倉門口既密碼鎖，係我既位置，只係睇到密碼鎖既側面，睇唔到四眼哥仔入咩密碼。
原來四眼哥仔同我諗既野一樣，就係要趁強國夫婦唔為意走入去貨倉，如果唔係就麻煩。另一方面，我都好想入去貨倉睇下，話唔定會有咩發現。
但我宜家應該點做好呢？
正當我諗緊應該點做既時候，就聽到強國女既叫聲：「老公！起身呀，乃睇下佢！」
四眼哥仔未入完密碼，就已經俾人發現，強國女人一叫，將其他人都嘈醒左。
「做咩事呀？？」阿叔係零食架既另一邊企左起身。
「乃鬼鬼鼠鼠想做咩呀！？！？係咪想出古惑！？」強國男人捉住四眼哥仔。
「唔．．．唔係呀！我只係想去廁所咋！！」四眼哥仔俾強國男兇一兇，就即刻騰晒雞。
「去廁所．．．？頭先，你係咪話阿季嬸係廁所唔見左．．．？」師奶無啦啦提起依件事。
「咪住！！我諗到ｄ野，阿季嬸可能唔係係廁所唔見左．．．可能係係廁所走甩左！！」
地中海阿叔好似發現新大陸咁，其實我一早就諗到依點，只不過你地俾果個恐怖ｍａｄａｍ嚇到慌晒，咩都諗唔到。
「你係想話，貨倉入面其實有『出口』，可以俾我地離開依度？？」西裝友亦明白阿叔既意思。
「乃講，入面係咪有『出口』！？乃頭先神神祕祕咁，肯定有ｄ野！！」強國男捉實四眼仔，好嬲咁問佢。
「我唔知咩『出口』呀，我．．．我真係想去廁所架咋！．．．我頭先都有入過貨倉搵季嬸，都唔見入面有咩古怪。」
「有冇古怪都係你講咋ｗｏ．．．」師奶都加把口。
「鵝知喇！！！成件事，肯定係乃搞出黎既！！成間便利店咁多古怪野，乃有咩奶油咩都唔知！？依家又神神祕祕咁，肯定同乃有關係！！」
「我真係咩都唔知架！我同你地一樣，無啦啦困住左係度，我都好想番出去架！」
「唔洗講咁多喇，我地一於入去睇下啦，話唔定入面真係有『出口』！！」
阿叔依個提議，真係有好有唔好，一方面，我都好希望貨倉入面有「出口」，可以俾我即刻離開依個咁恐怖既地方；
另一方面，如果入面冇所謂既「出口」，咁大家既下一步，一定會去搶貨倉既「資源」，我真係好討厭咁做。
「唔好呀，你地信我啦，我只係想去廁所架咋，你地唔可以入去架！」四眼哥仔咁講，只會令大家更加想入去睇下。
強國男一拳打落四眼哥仔個心口：「乃咁驚鵝地入去，仲話唔係有古怪！？快ｄ開門俾鵝地入去睇下！！」講完，強國男又一拳質落四眼哥仔心口。
「咳．．咳．．．唔好再打．．．」強國男無理會，今次一拳打落四眼哥仔塊面度，爭ｄ連眼鏡都飛埋出黎。
「你快ｄ開門俾我地啦，係咪想俾人打死呀！！」阿叔見到四眼哥仔唔想開門，都開始燥起上黎，其實我都一樣，雖然我唔多相信四眼哥仔係ｄ咩幕後黑手，但一諗到貨倉可能真係有「出口」，個個人都想入去睇下。
「我開，我開．．．唔好再打．．．」
「乃一早開咪無事ｌｏｒ！」
四眼哥仔係密碼鎖度輸入「１８８８８」，然後貨倉門就打開左，咩「領土」咩食水，大家已經唔理住，只係一心希望貨倉入面真係有方法離開依度，所以我地都即刻衝左入去。
細細個果陣時，見到ｄ７仔員工係飲品櫃後面補貨，我就已經對於７仔既貨倉感到好奇，但勢估唔到，我係咁既情況走入黎。
由於四眼哥仔聲稱阿季嬸係去廁所既時候唔見左，所以我地一入到去，都先去搵廁所係邊，本身個貨倉唔算好大，我地八個人一齊入晒黎就更加覺得侷促，大家就好似去睇香港既典型中產示範單位咁，咁多人一齊逼係個狹窄空間四圍打量。
成個７仔貨倉，基本上分為三部份，係貨倉入口既隔離，就係另一道門，入面就係「雪房」，亦即係飲品櫃後面既補貨位置。
而對正貨倉門口既前方，就間左一個廁所，廁所面積唔大，而ｄ貨就放係廁所出面隔離；
經過ｄ貨再行入少少，就係一個簡陋既辦公地方，放左一張寫字枱，而寫字枱就對正一個貼牆既ｌｏｃｋｅｒ。
我地成班人圍住個廁所，不過地方所限，只得強國男人同埋阿叔行到埋去，由我既位置望埋去，唔覺得個廁所有咩古怪地方。
雖然四眼哥講過阿季嬸去廁所既時候唔見左，但究竟阿季嬸係廁所入面唔見左，定還是係貨倉其他位置唔見左，根本無人知道。
一諗到依點，我同其他人都開始去貨倉其餘位置望下，強國女人先打開「雪房」度門望下，入面既寒氣即係滲出黎。
我同西裝友就走去辦公室果邊，其實究竟我地要入黎搵ｄ咩，連我地自己都唔清楚，大慨就係想睇下有咩古怪野或者秘道之類既地方。
西裝友就番弄寫子枱ｄ櫃桶，又望下寫子枱部電腦，而我就行埋去ｌｏｃｋｅｒ睇下。
依個ｌｏｃｋｅｒ係一排有兩層，上下兩層各有三格，每格體積唔大，應該係俾ｄ員工用黎放私人物品同埋制服之類既野。
每個ｌｏｃｋｅｒ都有個名牌，「季嬸」、「Ｋｉｔｔｙ」、「誠叔」、「Ｍａｒｙ姨」、「嘉嘉」，仲有一個係無名牌。
我嘗試打開「季嬸」果個ｌｏｃｋｅｒ，不過鎖左，而我見到無名牌可似並無關上，所以就打開黎望下，但入面咩都無。
「你行開ｄ等我黎啦，阻住晒！」阿叔一邊喝我，一邊用手將成個ｌｏｃｋｅｒ拉開，但ｌｏｃｋｅｒ後面都無發現。
我見阿叔佢行左過黎，而依邊又好似無咩特別野，於是就行番過去廁所果邊睇下，師奶同阿欣原來一直都只係企係門口，似乎佢地唔敢周圍走。
至於四眼哥仔淨係識得講：「依度真係無咩古怪野架，我都話只係想入黎去廁所...」
不過冇人理會佢，我地繼續周圍睇下有冇發現。
我行到廁所門口，成個廁所真係一眼睇晒，天花位唔似有咩暗格，眼前就只有馬桶、藥箱、洗手盤、水龍頭...水龍頭...！白痴，點解我宜家先諗到架！？
我即刻扭開水龍頭，但好可惜，一滴水都無。
「依！係wo！」我身後傳黎阿叔把聲，依條友真係攝青鬼，我行到邊佢又跟到邊，佢一見佢扭果個水龍頭，佢就即刻走左出去貨倉，今次俾佢快我一步。
「無用架...我頭先一早就試過...如果唔係我都唔洗入黎拎...！！」四眼哥仔望住行左出去既阿叔，突然欲言又止。
「搞咩呀，仲以為有水添...」阿叔好失望咁行番入黎貨倉。即係話，貨倉出面既水喉一樣無水。
西裝友：「四眼哥仔，你頭先已經知道無水！？」
四眼哥仔變得有d「私縮」：「係...係呀...季嬸o岩o岩去左廁所無耐，我就係熟食櫃果邊執埋d野，諗住用果個水龍頭洗手，點知無水...事後你地掛住搶野果陣，我都再試多次，但一樣無水...」
「乃個打靶仔，乃入黎唔係想去廁所，而係想入黎霸住ｄ食物同水！！係唔係！！」強國男一邊捉住四眼哥仔件衫，一邊用手指住ｄ貨物。
「哦！！唔怪之得頭先咁鬼鼠啦，十成十想鼠入黎然後反鎖度門，自己一個霸住晒ｄ食物同水，睇唔出你平時好似好有禮貌咁，原來你係咁自私既！」地中海阿叔又加把口。
依ｄ說話由強國男同埋阿叔把口講出黎，真係好諷刺。
四眼哥仔俾阿叔佢地指住黎話，已經唔敢正視大家既目光。
「咁就奇怪喇．．．」我突然諗到ｄ野。
阿叔：「又有咩咁奇怪呀！？」
我：「我曾經認為我地同成間７仔都轉移左第二個地方．．．宜家又無水．．．」
阿叔：「屌你，你仲係度發埋晒你果ｄ科幻夢！」
西裝友幾認真咁去繼續我既話題：「咁呢？無水唔係好正常咩？你都識講我地可能去左第二個地方．．．」
「嗯，但係你又點解釋，間７仔仲有電力供應呢？」我有ｄ疑惑，一邊指住天花既燈。
大家似乎一直理所當然地認為７仔有電力供應係好正常，但如今發現水喉又無水，兩者好似好矛盾，唔係單純用「轉移左第二個地方」就解釋得到。
我望住阿叔，似乎佢又想用「撞鬼」黎解釋一切，經歷左頭先「女人頭」既一幕，我其實都唔敢完全否定，不過咁都唔能夠釋除我既疑慮。
我：「就當我地真係撞鬼，咁點解隻鬼要搞咁多野？？既然佢將我地同其他人隔離，又將水喉既水源切斷，咁點解唔索性將成間７仔既物資都拎走，切斷埋電源，唔止咁，直頭唔洗將我地困係７仔，將我地困係大霧入面就得啦！」
師奶好似聽到一頭霧水：「咁．．．你既意思係．．．？」
西裝友慢慢理解宜家既狀況：「出面咁大霧．．．如果連７仔既燈都無埋，咁就真係柒黑一片，到時我地咩都做唔到，只有等死．．．」
阿欣：「即係話，唔切斷電源係為左．．．令我地係便利店入面有一定既行動力？？」
阿叔都開始加入討論：「咁點解要咁做！？」
我繼續將我既諗法組織起黎：「唔理係人定係鬼將我地困住．．．如果佢令我地係７仔入面有一定既行動力，但同時又限制我地既物資．．．咁結果就係．．．」
講到依到，大家好快意會到係咩一回事，簡單ｄ講，有人／鬼有目的地要我地係間７仔入面進行港版「飢餓遊戲」，另一方面，我地對於點樣離開依度，仍然毫無頭緒，而且直覺地認為，我地無咁易有命離開。
我望到大家既眼神，馬上就後悔，因為頭先既討論，就好似打開潘朵拉盒子咁。
強國夫婦企近貨倉門口，強國男拎左把刀出黎，已經準備好攻擊：「乃地咪埋黎，ｄ貨都係鵝既，邊個埋黎鵝即刻做瓜佢！！」
強國男一邊講，一邊手指指，示意佢老婆搬走ｄ貨，就係依個時候，西裝男突然拎左把大交剪出黎，似乎想阻止強國夫婦！
其他人見到佢地拎住武器對峙，都即刻行埋一邊。
把大交剪，我估原本係寫字枱果邊，西裝男就當係把刀咁拎住，原本張牙舞爪既強國男，見到自己無絕對優勢，都變得有顧忌。
西裝男好兇咁講：「邊個想我死，我就同佢搏命！你咪洗旨意霸住ｄ貨呀！」
西裝男好明白宜家既狀況，所以佢一於豁出去。
「你地唔好搶啦！！除左依度ｄ貨就無架喇，咁我地點算呀！？」四眼仔想勸強國男同西裝友。
誰不知，強國男突然用左手臂扣住四眼仔條頸，將佢當係擋箭牌：「乃仲好講！？一日最衰都係乃，乃肯定同成件事有關！！」
「唔係呀！真係唔關我事架！！」四眼仔求下強國男放過佢。
「乃頭先仲想霸住ｄ貨！！想將鵝地丟係出面，由得鵝地等死！！乃仲話唔關乃事！！下！！！」強國男越講越嬲，發晒神經咁將把刀架係四眼仔條頸上面，我地其他人更加唔敢行埋去。
「唔好呀！！求下你放過我啦！真係唔關我事架，我咩都唔知架！」
「乃咁想鵝屎先，鵝偏唔會咁易俾乃整屎架！！乃死先啦！！！！！」強國男未講完最後一個字，就用把刀係四眼哥仔條頸既右邊狠狠地割左一下！ｄ血即刻係佢條頸噴出黎！！