【屋村7-11驚魂】落樓下7仔食個叮叮飯，竟然咁可怕...: 14
垃圾桶入面既電話響聲停左落黎。
如果無眼花，我頭先隻手仲差少少就掂到果個「頭」，果個望住我係度笑既「頭」，一個女仔既「頭」。
依一個情景，我諗足以搞到我晚晚發惡夢。
我終於明白，頭先佢地聽地果個古怪ｍａｄａｍ把聲之後，點解會驚成咁。
我話入面有個「頭」，其實咁講唔係好o岩，正確ｄ黎講係我既位置見到一個「頭部」，可能只不過係入面有一個人「哩埋」左，至於「頭部」以下仲有冇野，我唔知，但即使只係有個人係７仔垃圾桶入面「哩埋」，本身已經係一件好離奇既事。
「下！！？」聽到我咁講，大家都表現得好驚，本能地再遠離果個垃圾桶，但雙眼就依然望實個垃圾桶，好似怕有ｄ咩古靈精怪野會走出黎。
「喂．．．你唔好亂ｕｐ呀．．．咩頭呀．．．你係咪玩我地咋．．．」阿叔一邊講，一邊偷望果個垃圾桶。
「．．．我無亂ｕｐ．．．」我個腦，除左不斷ｒｅｐｅａｔ剛才果一幕，就已經咩都諗唔到，我仲繼續坐係地下度，驚到唔識起身。
「咁．．．點解會咁既．．．我地係咪撞鬼！？」四眼哥仔問一個大家都唔識答既問題。
「我都話撞鬼架啦！！喃嘸阿隬陀彿，有怪莫怪．．．」阿叔又雙眼合實係度唸經。
大家你眼望我眼，唔知應該點算好。
「你．．．你地都見到架可！？」我望住師奶同埋阿欣咁問，事關頭先走埋去垃圾桶果陣，佢兩個既位置，正正係我後面。
師奶擰擰頭，而阿欣就話：「頭先你個身遮住左，所以其實我地睇唔到垃圾桶入面．．．」
「喂，死仔！會唔會係你眼花咋！咪鬼係度嚇鳩我地好ｗｏ！！」
「會唔會係你睇錯咋？？」
我眼花！？我已經失去判斷力，因為太匪夷所思，而已我只係望左一眼，不過頭先感覺好真實。我周圍望，想搵ｄ野幫一幫手去證實。
「阿四眼哥仔，你可唔可以俾一把７仔遮我？？」我指住收銀櫃隔離果個架，放住幾把招牌７仔大遮。
「哦哦．．．o拿，接住。」四眼哥仔將一把７仔大遮，由收銀櫃位置拋過黎，拋到我果邊附近。
如果唔去證實一下心入面既不解，我諗以後都會發惡夢．．．當然，如果證實左無眼花，就將個變成依度每個人既惡夢．．．
「喂喂，你想做咩！？」
「我想．．．再睇下．．．」我由坐係地下改為踎係地下，拎住把遮慢慢靠近，嘗試「督」開果塊細細既垃圾桶「閘門」。
我知道，由第三者角度望住我既動作，個樣又淆底又要去睇，實會笑我硬鳩，不過在場其他人係另一個反應。
「唔好呀！！你咪搞呀你！」經歷左恐怖ｍａｄａｍ一幕，如果宜家又要見到一個死人頭，大家肯定痴線都似。
其實我都唔知點解會有咁既勇氣，當然，如果得我自己一個，我係絕對絕對唔會走去證實多次，但宜家有咁多人係度，唔搞清楚既話，個心入面永遠都有陰影。
我無理會其他人既反對，以踎既方式靠近，把遮終於「督」到個「閘門」，慢慢推開個「閘門」，其他人一邊驚到縮底，又要一邊偷望個垃圾桶。
我抱住一種隨時會入野飛出黎既覺悟，望入去個垃圾桶。
但由我果個位置望入去，只係見到一ｄ膠樽同埋包裝紙。
「點呀！？究竟有咩野呀？？？」阿叔企埋一邊，好心急咁問。
「好似．．．好似見唔到．．．」
「你試下行埋ｄ，企高ｄ睇下啦！！真係生人唔生膽！」
我行前多少少，企番高少少，用一個較佳既角度，將把遮「督」入少少，「了」開ｄ垃圾。
但都係咩都見唔到。
「好似見唔到．．．」
「係咪真架！？真係冇野？」
「唔信你自己睇下喇！」
阿叔企出左少少，嘗試望下垃圾桶入面，個樣勁淆底：「依個位置．．．好難望到ｄ咩ｗｏ．．．」
「你企出ｄ啦，屌！頭先你又屌鳩我生人唔生膽，自己又淆晒底！」
當阿叔嘗試企出少少既時候，突然又遯番去原本既「領土」：「屌，你個仆街仔，我知道你打咩鬼主意喇！想o厄鳩阿叔我？？無咁易！！」
「我ｏ厄鳩你ｄ咩呀！？」
「你個仆街仔，慌唔係知道頭先我地俾果個恐怖ｍａｄａｍ嚇撚死，宜家就黎亂鳩咁ｕｐ撚化我地，你梗係想引我地行出黎，然後就搶撚晒我地ｄ野定啦！！肯定係！」
「哦！！！乃奶奶，鵝都差ｄ俾乃ｏ厄左！ｏ嗱，鵝警告乃地呀，乃地是旦一個想出古惑，乃地所有人都無得同鵝交換水！！」
「屌你老母，我先無你地咁撚無聊，頭先我真係見到有個頭係入面架！」
「咁你拎出黎俾我地見識下ｌｏｒ！」依個地中海阿叔，突然又變番平時認屎認屁果個死樣。
俾佢地咁屈我，我帶住少少唔憤氣，個膽都大左少少，我再行近ｄ，用手將垃圾桶果個櫃門拉開左，見到成個黑色垃圾桶膠袋。
「算啦，唔好搞啦！．．．」師奶佢地依然有ｄ驚。
我用遮柄將黑色垃圾膠袋拉左出黎，其他人望住個膠袋，唔多唔少都會驚，包括頭先牙擦擦既阿叔，驚唔知有咩係膠袋入面。
我再用遮頭去「督」果個膠袋，「督」左幾一，再嘗試「了」開個袋口望下入面，好似真係唔見有咩古怪野。
我見無咩古怪，所以越黎越大膽，索性用手倒轉個垃圾袋，將入面ｄ野「ｄｕｎ」出黎。
一地都係垃圾，莫講話人頭，連電話都唔見有！咁頭先點解會有電話響聲傳出黎？？
我望下個垃圾櫃，入面咩都無，我再用把遮「督」下櫃入面其他位置，唔似有咩暗格之類既地方，而個垃圾櫃係緊貼住幅牆，簡單ｄ黎講，根本無地方可以用黎收埋野。
「你個死仔你點解釋，入面咩都無呀，人頭！」
「咁你點解釋ｄ電話聲！？頭先唔止我一個人聽到，你地大家都聽到！」我反問大叔。
「．．．喂喂喂，我醒起喇，我記得頭先你入黎７仔之後，買左盒野跟住就餐枱果邊開餐，我地其他人都冇行過埋去．．．肯定係你整古做怪！」
「你都痴線！我果陣時入黎７仔食個宵夜，鬼知會無啦啦走唔番出去架！？點樣整古做怪呀！？仲有我部電話一直都係我自己度！」我一邊講，一邊拎住自己部電話。
阿叔亦諗唔到點駁我，而好明顯，根本就無辦法解釋得到頭先所發生既事，大家對住地下果堆垃圾，同埋果個空既垃圾櫃，無人可以提出一個合埋解釋。
「頭先．．．你真係見到入面有．．．一個．．．頭？？」阿欣細細聲問我。
「嗯．．．應該係．．．」
我答得唔係好肯定，搞左成晚，其實我個人已經好混亂，依一刻，連我都想說服自己係眼花睇錯。
「算喇算喇！ｏ拿，我一早已經講過架啦，我地係俾鬼搞呀！你地見啦，頭先果個恐怖ｍａｄａｍ，仲有沒啦啦聽到電話響聲，今次真係好猛，可能ｄ鬼係想搵替身呀！」
「搵替身？？咁．．．咁會點架？係咪我地都會死架！？」師奶一聽到阿叔咁講，即刻好騰雞。
「我細個聽過ｄ老叔父講，一個人時運低就會俾鬼埋身，之所以時運低，可能係你身體狀態唔好，又或者休息得唔夠，好彩既話，訓番覺好就會無事．．．」
地中海阿叔長篇大論，我真係無心機繼續聽落去，搞左成晚，本來已經累到仆街，但頭先果一幕將我既神經拉得好緊，真係身心俱疲，所以我坐埋一邊，打算合埋眼等自己冷靜一下，但一合埋眼，我又試諗起果個「頭」。
我望一望部手機上面個鐘，原來已經零晨三點半，平時依個時間，相信大部份人已經訓晒覺。
我地成班人，大大話話係間７仔入面已經三個幾鐘，出面既狀況完全無變，都係一片濃霧。
我頭先仲認為，所有野其實背後有人操控，但宜家我開始動搖，究竟係太累所以眼花，定還是好似阿叔所講係俾鬼搞，我自己都唔肯定，只係覺得好想抖下。
「唔知道．．．聽朝會唔會就冇事呢．．．」阿欣坐係我隔離，望住出面既霧，原來佢都無理會果個阿叔。
老實講，希望訓醒覺第二朝就會回復正常，依種諗法係人之常情，但我先後兩次出去，我好清楚，如果諗住訓醒覺就會無事，未免太天真。
「嗯，可能訓醒就會無事。」我知道我咁樣講，其實對安撫阿欣起唔到好大作用。
唔知幾時，原來阿叔已經發表完佢既偉論，其他人亦坐番低，佢地講左咁耐，似乎都未得出一個答案。另一方面，大家都唔係好放心訓覺，我諗一來大家經歷左成晚都已經好驚，二來又擔心有人搶野。
「老婆，乃休息一下，等鵝守住。」
我地唔理咁多，我同阿欣拎左幾盒朱古力奶同埋幾個包，收埋係自己件衫入面，然後就合埋眼，因為我真係頂唔順。
本來初初都「澤」醒左幾次，因為諗起果個「女人頭」，但由於太累，最後都係訓著左。
唔知過左幾耐，我俾一ｄ聲整醒左，我睜開眼，就見到四眼哥仔企左起身，係熟食櫃果邊偷望強國夫婦。