【屋村7-11驚魂】落樓下7仔食個叮叮飯，竟然咁可怕...: 13
阿欣表情又變得有ｄ驚，好似唔係好同意我既諗去：「有人操控？．．．你未聽過果把恐怖笑聲，如何你聽過，可能未必會咁諗．．．或者果個阿叔講得無錯，我地應用係撞鬼，搞到我地番唔到出去．．．」
我：「成班人一齊係間７仔度集體撞邪！？咁講實在太牽強．．．而且，就當真係一入黎依間７仔就會撞邪，咁你點解釋阿季嬸？佢又因咩事無啦啦失蹤左？
阿欣：「咁．．．依層我又唔知．．．」
我：「你冷靜ｄ咁諗下，果個神秘ｍａｄａｍ所講既說話，係咪暗示左其實我地有方法逃走？真係咁猛撞鬼既話，佢整死我地都仲得啦，洗咩咁擔心我地走姐！？」
阿欣聽到我咁講，開始好認真咁思考，而我就繼續講：「根據出面既情況，再加上我對果位ｍａｄａｍ所講既野既感覺，我覺得有人用左唔知咩方法、唔知咩原因，將成間７仔同埋我地帶左黎依度。佢地恐嚇我地，唔俾我地周圍走，即係話其實我地仲有方法離開，我估計季嬸應該係無意中走甩左。」
阿欣突然諗到ｄ野：「咁．．．唔通貨倉果度係逃離依度既出口！？事關聽四眼哥哥講，季嬸佢最後去既地方就係貨倉入面個廁所！」
我點頭同意：「無錯，我都覺得貨倉好有可疑，不過仲係ｄ野未諗得明，首先係部fax機，如果真係將間７仔帶到去另一個空間，咁點解釋個fax機仲仲打到電話？而且好似只能夠打到去一個假既報案中心果度．．．第二，依度既電力供應依然正常。依乎有人係度做左手腳，但目的係咩，我就未諗到．．．」
阿欣：「其實唔洗諗咁多，直接去貨倉睇下埋得ｌｏｒ！」
我：「暫時唔好住！強國夫婦佢地就係貨倉門口前面，佢地成班人宜家都失控咁，咩都聽唔到入耳，如果我地行埋去，佢地可能會對我地不利。而且，如果ｍａｄａｍ係有目的去困住我地，佢應該係度監視我地既一舉一動，如果唔知頭唔知路黎咁黎，我地反而有危險！」
阿欣聽到我咁講，有ｄ疑惑：「你係話果個ｍａｄａｍ監視住我地？．．．咁好似唔合理ｗｏ．．．佢應該見唔到我地．．．」
我唔係好明阿欣既意思：「你點解咁講？頭先阿四眼哥仔唔係話，果個ｍａｄａｍ警告我地唔好再離開咩？如果佢唔係監視住我地，又點會咁講？？」
阿欣繼續講：「嗯．．．其實當我地再打９９９求救果陣，果個ｍａｄａｍ都好似好正常咁，佢只係重覆提醒我地唔好周圍走．．．但係，當四眼哥哥話佢知你走左出去，佢先開始變得好奇怪，又係度怪笑，最後就警告我地唔好再離開．．．」
阿欣既意思，即係話果個ｍａｄａｍ原本並唔知道我走左出去外面？
係因為閉路電視有盲點？定還是，佢地帶我地黎依度既目的，根本係唔需要監視我地一舉一動？
真係越諗越唔明．．．
我繼續問阿欣：「咁，除左依點，你仲有冇發現ｄ咩線索？又或者有冇咩奇怪野？」
阿欣俾我咁問，佢就望住果架雜誌架：「嗯．．．其實我都唔知算唔算奇怪野．．．不過我頭先入黎便利店買野果陣，有件事我有少少在意．．．」
我係住佢雙眼既焦點，望住果個雜誌架問：「你所指既係咩事？」
阿欣指住雜誌架上面：「果本雜誌．．．我好似有ｄ印象．．．」
我走埋去雜誌架拎起果本雜誌，係一本逢星期二出版既八卦雜誌
「你係話依本？睇過都冇咩出奇姐，你可能早一兩日睇過呢。」
阿欣繼續話：「嗯．．．我好似上個禮拜就已經睇過，但我都唔肯定。」
上個禮拜已經睇過？我隨手揭左幾頁睇下，不過由於平時好少睇雜誌，所以我對本雜誌一ｄ印象都無，所以我揭左幾下就將本雜誌遞左俾阿欣，然後我又隨手拎左份今日賣剩既報紙，坐番係阿欣隔離睇。
阿欣拎住本雜誌揭左幾下：「嗯．．．好似有少少熟，但係我唔肯定。」
「ｄ八掛雜誌，每個禮拜講ｄ野都差唔到架啦。」
「或又係．．．」
我一邊同阿欣講，一邊拎住份報紙黎睇，頭版標題係「今天香港，明天台灣，民眾齊反服貿」，平時我都好少睇報紙，關於時事新聞，我都只係靠上網睇，我大約記得，依件事都好似搞左成個禮拜。
我再揭下內頁睇睇，「藥房奶粉告急，港家長鼓譟」、「黑心食用油流入香港」、「民建聯無恥，賣港求榮」
依ｄ都唔係咩新聞，基本上每日都發生係香港，直至我望到一單係報紙右下角既新聞：「搭客誤墜軌，遭火車輾斃」
雖然搭客墜軌依ｄ意外唔係第一次發生，不過相比起頭先果幾單，總算係比較罕見，所以我對依單新聞都有ｄ印象，我記得好似係幾日前發生既事．．．
我望一望報紙日期，「２０１４年３月２１日，星期五」，無錯ｗｏ，的確係今日既報紙，唔通係我自己記錯左？定還是類似既意外，近黎唔止發生左一次？
「做咩事望住份報紙望到眼定定？」
「無，無咩事，我睇下今日既新聞姐。」
「喂喂，大家過一過黎，我有ｄ野同大家講！」
係零食架果邊，突然傳黎地中海阿叔把聲，我就掉低份報紙，同阿欣行過去睇下咩事，而四眼哥仔亦都企起身，由收銀櫃行過左去熟食櫃果邊，唯獨師奶仲係好似未回番神咁，繼續坐係地下。
西裝友都企左起身睇下咩事，但佢似乎仲係防範其他人行埋佢個零食架「領土」度，戒心好高，同一時間，我見到強國男佢依然拎住把刀，面向我地，佢兩夫婦仍然好有敵意，似乎大家既神經仲係好緊張，驚俾其他人搶野，所以我地都唔敢行得太近。
相反，阿叔佢笑笑口，成副烚熟狗頭既死樣，睇黎都唔慌係好野，不過更加值得我留意既，係佢雙手拎住左幾支水。
「大家聽我講先，我已經代表左各位，向依對『同胞』夫婦進行『斡旋』，宜家佢地接受我地用食物同佢交換水。喇！大家睇下我，我頭先已經交換左幾支，手快有手慢冇架！」
『同胞』、『斡旋』．．．屌你老母你個地中海阿叔，我見到佢講頭先幾個字既時候，十足十當正自己係ｄ濕鳩高官見同國家主席咁既死款，面上有種顧盼自豪，明明只不過係一間７仔入面，明明大家都唔知有冇命番出去，都唔知條撚樣有咩咁開心，不過依個世界就係咁，總會有ｄ人鐘意做阿頭，鐘意其他人聽晒佢講野，阿叔正正係依種仆街。
我地其他人你眼望我眼，似乎大家對於地中海阿叔既提議，抱有少少戒心。
「o拿，我地宜家總算叫做坐埋同一條船，正如頭先果位後生仔咁講，我地應該要一齊諗方法離開依度先o岩，宜家我地交換食水，就可以避免大家自相殘殺，起碼可以吊住條命，然後再諗計離開依度。」
依句說話由阿叔把口講出黎，真係好無說服力，由其他人既表情黎睇，大家對於依個提議都有少少戒心。
「咁點交換法先？」西裝友問強國男。
「巧（好）簡單，鵝會睇下乃地手上有咩食物交換，再決定乃地可以交換幾多支水。若果乃地唔願意換，鵝唔會逼乃你，如果無左鵝ｄ水，乃地都唔洗有命番出去啦。」
強國男人既依番說話，根本唔係交涉，而係威脅，佢好明白，人可以唔食野好多日，但唔飲水既話，兩三日已經死得人。
估唔到一間細細既７仔，宜家仿如香港既縮影，我地既水源一樣係俾ｄ仆街強國人操控住。
當我地其他人仲諗緊應該點做既時候，頭先本來坐埋一邊既師奶，突然企起身講：「我．．．我想換．．．」
「咁乃手上有咩？」
「我．．．我有依ｄ．．．可以換到幾多支水」師奶拎住幾盒三文治，佢再望一望身後既早餐櫃，示意佢身後既食物都可以用黎交換。
「乃果ｄ．．．好快過期喎．．．o拿，鵝用一支水，交換乃五盒三文治。」
「五盒？？．．．咁點得架．．．」
「乃換就換，唔換就算！」
「我換！五盒就五盒！」師奶根本無得揀，因為佢果邊ｄ食物一到期，就會連一支水都換唔到。
「 喂，你真係換俾佢呀？？」西裝友似乎想叫師奶諗清楚。
師奶：「咁唔係點？？你有其他方法咩？？依家有得換，唔洗爭，起碼唔洗渴死先啦！」
西裝友聽見師奶咁講，都開始猶豫。
果然，每個人既諗法都一樣：如果我出手對付強國男，咁邊個會幫我手？依個係非常現實既問題。
阿欣同師奶唔洗諗，佢兩個幫唔到d咩手，四眼哥仔又咁怕事，阿叔更加唔洗旨意，最後只係得番西裝友可能幫到下手。
另一方面，單係強國男既身形已經佔優，加上拎住把刀同埋佢老婆又會幫手。
就係咁，一堆既顧慮，一堆既計算，最後就連曾經諗過出手既人都放棄，唯有接受一個明知係搶劫既所謂交換方案。
「o拿，太太乃咁決家就明智喇！為表示神意(誠意)，鵝先拋支水俾乃，乃再抛幾盒三文治過黎，大家咪撚住(諗住)玩野呀，邊個出古惑鵝以後唔同佢換水！」
講完之後，強國男就將一支水抛到師奶附近既地下，師奶即刻好似執到金咁攬實支水，然後用另一隻手，逐盒三文治抛俾強國夫婦。
「咁咪好lor，大家都有水飲有野食，仲有冇人想換呀。」
唔知點解，阿叔果樣成個港奸咁，好似一邊笑笑口，一邊諗計點樣出賣大家咁款。應該就係依條仆街出賣我地，教曉強國男依條賤計。
「我都換！六包零食換你一支水！」西裝男亦都唔想執輸。
「咪住！乃果d薯片都唔飽肚，六包換鵝一支水？邊有咁澤數(著數)，八包就同乃換！」
「八包！？我俾咁多你，咁我之點覺呀！？」
「乃唔想換就算啦~」
西裝男好唔情願咁：「...八包就八包啦！」
強國男：「吖呀！唔巧意思，o岩o岩加左價，宜家要十包！頭先乃係出面跑左咁耐，實係好口乾~」
強國男睇準西裝友係唯一一個無水依一點，將支水由八包零食既價位，一野炒到上十包，眼前依個金融財俊都要屈服：「...好喇好喇，十包就十包！」。
西裝男明明應該好口渴，但當佢換到支水之後，都只係飲左一細淡。
「點呀？乃地仲有冇人宜家想換呀？」
「我...唔洗換...」四眼哥仔收銀櫃收埋左d食物同水，可以頂到一段時間。
「咁乃你兩個呢？」
依個時候，我望左強國男隔壁果個貨倉門一眼，我慶幸頭先無同大家提議走入去貨倉睇下，如果唔係入面d物資實渣都冇，似乎強國夫婦仲未醒起依樣野。
「我地唔洗換住...」我再向阿欣佢望左一眼，似乎佢都明白，咁樣交換，對我地好不利。
我地仲有d飲品同麵包，頂多一段時間應該無問題，但長遠唔係辦法，要諗下點對付依對仆街強國夫妻先得。
阿叔：「咁好喇，宜家大家休息下食下野，一陣我地再諗下有咩方法出去！」
「鈴...鈴鈴...」
正當大家坐低諗住休息之際，7仔入面，突然傳黎電話鈴聲。
「邊個...係邊個電話響??」
有電話響，即係表示有人聯絡到我地。
「唔係我果部wo」
「鈴鈴... 鈴鈴...」
電話鈴聲再響起，大家不約而同望向聲音來源-7仔角落位果張餐枱。
大家唔敢離開自己既「領土」，只係企起身，望去落角頭果張餐枱，上面除左頭先我食剩果盒豬扒意同埋罐可樂之外，就咩都冇。
「鈴鈴... 鈴鈴...」
「好似係枱後面果個垃圾桶傳出黎架wo...喂，仲唔快d搵人聽下！？」
突然收到外界聯絡，好似出現一個新希望，大家都覺得好應該去試下接聽，但似乎無人願意離開自己既領土，於是乎，得我一個行埋去個垃圾桶度。
我望下垃圾桶附近既位置，都見唔到有類似手機既物體。
「鈴鈴... 鈴鈴...」電話繼續響起，今次我好肯定係垃圾桶入面傳出黎。究竟無啦啦7仔垃圾桶入要會有電話響？
「喂！你仲係度發晒呆做咩呀！？仲唔快d聽下邊個打黎！」
俾地中海阿叔催生晒，我半推半就伸手推開7仔垃圾桶果塊細細既「閘門」，打算望下入面有咩既時候，我見到永世難忘既一幕，唔單只見到，係差少少就掂到...
「呀！！！！！！！！」
我忍唔住大叫左出黎，成個人向後跌低左，仲係地下向後爬左幾步。
師奶同阿欣兩個聽見我咁大叫，都已經嚇到彈開左，其他人見我咁既表情，即使唔知發生咩事，都本能反應地遠離果個垃圾桶。
「喂！咩事呀？？你見到d咩呀！？」
「做咩事咁驚呀？？」
我坐係地下，大家你言我一語，似乎都好不安咁等待我去回答。
究竟係咪我眼花？頭先只係望到好短時間，我就嚇到縮手...
「喂，你嚇到傻左呀？應下我地啦！」
「...頭先...頭先...好似見到...」
「見到咩姐？？」
我吞一吞口水：「我頭先好似見到...入面...有一個...一個頭！仲對住我笑！！」