【屋村7-11驚魂】落樓下7仔食個叮叮飯，竟然咁可怕...: 12
我坐底左，飲住果包朱古力奶，令我覺得放鬆番少少，無再咁緊張，然後就開始諗番成件事。
首先，由佢地口中得知，頭先報案中心接電話既係一位ｍａｄａｍ，而果位ｍａｄａｍ就突然變得好恐怖，仲警告我地唔好走出去。
我唔係現場，所以理解唔到果位ｍａｄａｍ有幾奇怪同埋幾唔得人驚，單純分析依件事，第一樣令我在意既係，明明係打９９９去報警，點解電話另一邊會突現有個咁奇怪既人？
其實唔計佢地頭先果次打９９９，之前兩次接聽電話既ｍａｄａｍ，我都已經隱約覺得果位ｍａｄａｍ把聲有ｄ古怪。
若然果位其實唔係ｍａｄａｍ，咁點解我地打９９９，個電話係會駁去依位神秘女人果度？
唔通電話線做左手腳？其實我真係好想驗證一下佢地所講既野，但係成部ｆａｘ機都跌左係地下，用唔用得到都成問題，加上其他人又阻止我咁做，似乎依個迷暫時無得了解多少少。
另一方面，我行出去果陣，而經先後證實左果對強國夫婦同埋西裝男既經歷係真。
簡單ｄ黎講，出面既世界已經唔再係合乎科學常理既世界，如果再合併埋神秘女人依一點，我得出既答案係，成件事應該係有人操控。
咁究竟幕後黑手係點樣將我地同埋間７仔帶黎依度？係同果ｄ霧有關？原本世界唔見左我地同埋間７仔，應該好大件事，佢地點樣收科？
而更重要既係，班人究竟想將我地點。
果位神秘女人既說話，我會理解為一種阻嚇性既警告，目的就係唔想我地走出去，換句話說就係要困住我地係７仔。
如果真係想將我地成班人困住係７仔度，唔俾我地走，咁佢地係唔係一早預計到我地會發展成搶食物同埋水既局面？又或者，根本係佢地期望發生既局面。
當我諗到依點，不其然會聯想到好多以前上網睇既故仔，講ｄ瘋狂組織，將ｄ人困埋一齊，等佢地自相殘殺，目的係為左完成一ｄ人類行為／人性既研究。
無論神秘女人佢地有咩目的，假如無方法離開依度，咁睇黎我地無可避免要為左搶套食水而去互相撕殺。
換句話說，我唔單只要諗到離開既方法，仲要同時間鬥快，係大家進一步失控之前諗到方法。
我好想將自己既想法同大家講，叫大家冷靜Ｄ，一齊諗計離開依度。
但係，強國夫婦 、地中海阿叔同埋西裝男，佢地四個宜家只係一心諗住點樣令自己唔洗死，我諗暫時同佢地講咩都無用。
長髮女仔、師奶同埋四眼哥仔就無咩殺傷力，不過經過頭先既事，我知道佢地都已經嚇餐死，就算我有咩新提議，佢地都未必幫到手。
所以我決定由依間７仔內部著手，靠自己去調查下有冇咩奇怪野，其實第一個我想睇既地方，就係貨倉，事關果度就係四眼哥仔個拍檔季嬸失蹤既地方。
不過以我所知，佢度門要用密碼開，就算四眼哥仔話我知密碼係咩，我都行唔到埋去，因為強國夫婦佢地就正正係貨倉門口出面，佢地實唔會咁輕易俾我靠近。
不過，貨倉依個地方可以遲Ｄ調查，因為我另外諗到，如果神秘女人係有目地困住我地係度，咁照道理應該有安裝Ｄ咩閉路電視，去觀察我地既一舉一動。
係成間７仔入面，有咩地方係安裝閉路電視既最佳位置，同時又唔會俾人覺得礙眼？
就係７仔真正用黎防盜既果部裝閉路電視既原本位置！
用咁既方法偽裝，唔單只我地唔會為意，就連係度打工既四眼哥仔都只覺得有咩出奇，佢只會一直認為果部係用黎防盜既閉路電視。
於是乎，我就行埋去收銀櫃果邊，事關正常黎講，便利店應該會安裝一部閉路電視用黎影住收銀機，一方面用黎防止７仔員工出古惑，二黎就算有人打劫便利店，都可以拍到兇人個樣。
行到去收銀櫃前面，我兩隻眼不斷遊走櫃後面既後置，好快我就發現左一部應該係閉路電視既物體，就正正係放煙果一排架既隔離，閉路電視體積唔大，有兩條線外露，同一般係店鋪見到既閉路電視無咩分別。
由部機所影住既方向同埋角度黎睇，應該未至於可以用黎監視到太多地方。
宜家新式既閉路電視，應該係會直接駁上網，將拍到既片段ｕｐｌｏａｄ到某個ｓｅｒｖｅｒ，所以就算有人做左手機，將部機拍地既片傳送到另外一個地方，應該都無方法睇到出。
係收銀櫃位置，我仲到四眼哥仔，原來佢坐左係櫃後面既地下，背住我，手上仲拎住支野飲同埋包餅。
睇黎佢已經放棄左叫大家唔好搶食物，索性坐低休息。
「阿四眼哥仔．．．」
四眼哥仔聽到有人咁叫佢，突然好驚咁擰轉頭，先發現原來係我企係收銀櫃前面，佢仲好驚咁收埋支飲品同埋包餅，我見佢咁既反應，先至發現平時放係收銀機側邊既特價食物同埋野飲都唔見晒，相信係四眼哥仔收埋左。
「你唔洗驚．．．我無惡意．．．我只係想問你一ｄ野．．．」
「你想問ｄ咩呀？？」
我指住收銀櫃上面果部閉路電視問：「依間７仔，仲有咩地方裝左依種閉路電視？」
「閉路電視？．．．貨倉入面都有一部，你問黎做咩？」
「無咩既．．．其實我想問下，你今晚有冇發現到依間７仔有咩古怪既地方？例如，部閉路電視同係咪你平時見開果部？有冇更變過？」
「更換過？無ｗｏ，咪又係依部．．．古怪野，宜家間７仔咁樣仲唔夠古怪咩．．．」
「嗯．．．唔緊要，假如你諗到既話，麻煩你話我知。」
「哦．．．」
四眼哥仔講完之後又縮番落收銀櫃地下，我諗佢每一日，有唔時少間都係依個狹窄空間渡過，同果ｄ住籠屋既人無咩大分別，似乎依個收銀櫃唔單只係佢既「領土」，直頭係佢既避風塘，或者頭先佢已經俾人嚇壞左，所以只想留係一個佢覺得有安全感既地方。
由四眼哥仔既回應同埋表情，我諗佢根本聽唔入耳，佢似乎比較擔心人地搶佢ｄ食物同水。
係佢身上暫時拎唔到咩有用既線索，我唯有繼續靠自己。
「你．．．想做咩呢？」
原來係長髮女仔問我，我見佢依然坐係地下，兩隻眼紅晒，仲可以見到少少淚痕，不過佢心情宜家好似已經平伏番少少。
「你同我講野？」
「嗯．．．頭先我見你係度望黎望去，好似搵緊ｄ野咁，又指住部閉路電視問收銀哥哥野．．．」
頭先長髮女仔果樣仲係好驚咁，宜家總算冷靜番ｄ，但我睇黎都要小心ｄ講野，以免又觸動到佢神經。
由於佢坐左係度，所以我都行埋去坐係佢隔離，細細聲同佢講：「我其實．．．仲係度搵緊離開依度既方法．．．」
長髮女仔聽到我咁講，表情又帶點失望，反問我：「你覺得．．．仲可以番出去咩？」
我：「其實．．．我都唔知．．．但係，我真係唔甘心就咁困住係依度等死，唔通你又甘心咩！？」
長髮女仔俾我咁問，就ｄｕｐ低頭，好似又想喊咁：「我．．．我真係唔想死．．．我好想考入大學，搵份好工，等我夫母唔洗擔心．．．」
我好奇咁問：「你今年考大學？」
長髮女仔：「係．．．我上年公開試考得唔太理想，今年重考．．．我知道宜家競爭真係好大，我又唔係咩叻人，所以我今年真係好努力好俾心機，每晚溫書都溫到好夜．．．今晚我見溫書溫到有ｄ肚餓，所以先落黎買ｄ野食．．．點知．．．嗚嗚．．．」
講講下，長髮女仔又忍唔住喊。
見到佢咁樣，我就打算搵ｄ野安慰佢：「其實你上次考唔入大學，未必係你既問題呢，你都知啦，自從回歸之後，唔只考入大學，就連其他野既競爭都越黎越大，原本分配俾香港人既資源咪越黎越少ｌｏｒ．．．」
其實我之所以無端端咁講，因為我係過來人，出到黎社會做事，更加覺得競爭越黎越大，以前係香港，大家都窮，你努力係為左發達，但宜家係香港，你窮就只能夠睇住ｄ有錢人點樣控制遊戲，所以你努力只係為左生存。
長髮女仔：「有關係架咩．．．我淨係諗，應該係我唔夠勤力所以先考唔入大學．．．」
我身邊有唔少朋友，都有類似長髮女仔咁樣既諗法，佢地好單純地認為，係一個制度之下，大家用同一個比賽規則去較量，輸左只能夠怪自己能力不足。
但佢地唔會諗下，佢地既夫母係有份貢獻香港，所以佢地可以優先佔用一定既資源，係無可厚非，「公平分配」既真正意思，並唔係指要完全妄顧我地之前既付出，將我地既努力成果無條件咁分晒俾所有人。
當然，我並無講出自己既諗法，事關係其他人眼中，我咁諗只會俾視為憤青廢青，所以我一直以黎都選擇沉默。
我只係好老土咁講句：「放心啦，你今年實得架！所以千其唔好咁快放棄，我地一定要搵方法番出去！」
長髮女仔聽到我咁講，好似又有番ｄ盼望，表情終於都無頭先咁失落，仲有番少少笑容。
「係ｗｏ，講左咁耐仲未自我介紹，我叫阿嵐！」
「你好，我叫阿欣．．．」
阿欣：「咁，我地應該點做？唔通你諗到方法？」
我：「其實我懷疑，成件事，背後係有人操控！」