【屋村7-11驚魂】落樓下7仔食個叮叮飯，竟然咁可怕...: 9
間７仔既左手面方位，係一個巴土總站，而右邊就連接住我果橦公屋，我住緊果橦公屋係舊式長形公屋，所以地面有唔只一個入口。
若果走出７仔向右邊行，大約行四、五十米左右，就會到達其中一個入口，所以我提議向右手邊行，希望可以番到入去大廈睇下。
出到７仔外面，詭異既感覺馬上加倍，我伸直手向前，就連手指頭都已經見唔到，似乎真係唔係霧咁簡單，當我一諗到依ｄ氣體可能會令人產生幻覺，我抖氣果陣下意識都「就住就住」。
由於咩都見唔到，所以我地唔敢行得太出，７仔係直接連住我橦公屋，所以間７仔同埋公屋地面第一個入口之間，都係牆壁，於是乎我地就靠近右手邊，用我地隻右手摸住牆，一步一步咁慢慢行。
起初，離開左７仔門口大約十零步，７仔入面既燈光依然可以透過濃霧折射番去我地既位置，我地仲可以見到少少光，但當我地再行前少少，周圍既環境已經逐漸變暗，直至全黑。
於是乎我用左手拎住部手提電話，當係電筒咁用，但其實根本起唔到咩作用，只不過係用黎壯下膽咁解。
突然間，有人從後拉一拉我件風褸，我當堂嚇左一跳。
「對．．．對唔住．．．」原來係長髮女仔拉住我件褸，睇黎佢有ｄ驚，不過都唔怪得佢，因為就連我都有少少爻底。
「唔．．．唔緊要．．．如果你想，你可以捉住我件風褸行．．．」作為一個毒男，平時叫我同女仔傾計我都會dead air，誰不知係咁妖異既環境，我反而夠膽叫個女仔拉住我件褸。
「唔該晒你．．．」
「唔晒客氣．．．」
「唔唔唔．．．唔撚完未呀你地！？可唔可行快少少呀？出面依度好寒呀，拿拿淋行快ｄ啦，我保你大呀！」屌，叫依個阿叔出黎一齊行，係我一個錯誤既決定。
**同一時間，「視點」就轉番去７仔入面既情況，以下發生既事，當時我並唔在場，我係後黎先知道：**
師奶望住果卷不停轉動既特大泥龍繩，由７仔雜誌架一直伸延出去門口右手邊，然後好憂心咁問：「阿四眼哥哥，佢地三個出左去幾耐呀？」
四眼哥仔：「差唔到六分鐘啦．．．」
師奶：「點解仲係好似未有其他動靜既．．．？」
依個時候，西裝友同埋強國夫婦總算抖順番條氣，但由於頭先佢地都經歷左人生中最不可思議既情況，所以都仲未完全回魂。
突然間，強國男人企起身問師奶：「鵝（我）想問下．．．頭先乃地（你地）係度話咩教室．．．咁究竟果班學生最後點樣？？」
師奶：「你話漂流教室？？果班學生最後點我就已經唔記得喇．．．我淨係記得，故事中段係講佢地係另一個世界生活左一段時間，最後結局係點我就無咩印象啦。」
強國男人繼續好奇咁問：「乃地（你地）唔係話另一個世界咩都矛（無）架咩？？佢地點樣係果度生存呀！？」
師奶：「咁佢地果間學校都一齊去左另一個世界架ｍａ，學校入面都仲有ｄ水同埋食物，咁佢地咪靠校入面ｄ物資，暫時維持生命ｌｏｒ．．．」
強國男人聽完之後若有所思。
無幾耐，強國男人指住四眼哥仔企緊既位置：「阿四眼哥哥，乃可唔可以俾我入一入黎，鵝都想試下用果部發屎雞（Fax機）打俾鵝果個朋友，睇下打唔打得通．．．」
四眼哥仔：「哦，無問題，你隨便用啦」
強國男人：「唔該唔該．．．」
依個時候，師奶指住７仔出面：「喂喂，係咪佢地三個呀！？」
不過，師奶所指住既方向，係７仔門口既左手面。
透個７仔既玻璃窗，四眼哥仔佢地都見到有三個身影靠近塊玻璃，一步一步由７仔左手面行向門口，由於太大霧，起初都唔係望得好清楚，後黎佢地行到門口，終於可以睇清楚，真係地中海阿叔佢地三個。
四眼哥仔問：「依！？你地做咩事圍住依度行一圈既？你地唔係話試下行番去隔離果橦公屋架咩？」
**「視點」再轉番去主角身上**
我同長髮女仔，仲有阿叔三個人，一步一步咁，不斷穿過永無止境既濃霧。
阿叔開始有少少驚：「撞鬼咩，行左咁耐都仲係咁大霧既！？喂．．．查實我地出左黎幾耐？？」
其實依個問題，我已經係幾分鐘之前開始已經不斷係心入面問我自己．．．因為按常理，我住果橦公屋既入口，明明只係距離間７仔大約四五十米，就算我地行得更慢，都無理由行左幾分鐘都未到，我頭先一直行，隻右手一直都摸住右邊，而右邊就只有一幅牆，根本就無咩大廈入口！！
會唔會真係好似長髮女仔咁講，係因為ｄ霧令到我地產生幻覺？？
我頭先唔敢開口講出自己既諗法，就係因為怕嚇親長髮女仔，宜家阿叔咁講，睇黎我地大家真係要正視依個問題，究竟我地應該試下繼續行落去，定還是提早沿住條繩番轉頭。
我望一望手機上面既鐘：「都差唔多有十分鐘架喇．．．佢地都應該等緊我地．．．不如我地．．．依！？喂喂，你地睇下前面，見唔見到呀？前面有ｄ光ｗｏ！」
長髮女仔：「係呀！見到呀！」
阿叔：「屌，終於唔撚洗再行！」
我地一步一步向住光源果度行，正當我地以為見到希望之際，眼前既景象真係令到我地三個呆左．．．我地發現自己原來係間７仔門口既左手邊，同一時間，我地三個見到雜誌架上果條泥龍繩，懸空咁向７仔門口右手邊伸延。
係７仔入面既四眼哥仔問我地：「依！？你地做咩事圍住依度行一圈既？你地唔係話試下行番去隔離果橦公屋架咩？」
當時我地三個都無理會四眼哥仔。
我見到長髮女仔既面色好差，而地中海阿叔隻腳就震晒。
我再望住自己左手上面果條泥龍繩，然後用左手「chok一chok」條繩，就見到眼前果條懸空既繩亦同時郁一郁。
見到咁既情況，我地三個已經嚇到即刻跑番入７仔，由於唔記得左手上既泥龍繩「實質上」係連住個雜誌架，我地咁樣一跑，差ｄ扯跌左個雜誌架。
師奶見到我地咁驚，即刻問：「喂，你地做咩事呀？？仲有你地做咩事圍住依度行一圈既
師奶見到我地咁驚，即刻問：「喂，你地做咩事呀？？仲有你地做咩事圍住依度行一圈既？？係咪因為中左幻覺呀！？？」
依個時候，阿叔同長髮女仔坐係地上，咩都講唔出。
其實我都震晒，但總算可以開到口：「唔．．．唔係幻．．．唔係幻覺．．．」
依個時候，西裝友同強國夫婦既面色都唔多好。
四眼哥仔追問：「你冷靜ｄ先，你究竟想講咩呀？咩唔係幻覺呀？」
我好努力咁叫自己冷靜：「我．．．我係想話．．．我地頭先只係一直行，無轉過彎．．．」
師奶：「咁仲唔係幻覺！？你地如果唔係圍住依度行一圈，又點會由７仔左手邊行番黎？」
我：「我地．．．我地又有咩可能．．．可以圍住依度行一圈．．．」
四眼哥仔佢地好似未明我既意思。
阿叔頭先一直坐係地下，驚到咩都講唔到，依個時候終於忍唔住：「你地試下用依條繩，圍住依度行一圈俾我睇下．．．條繩點會夠長係度行一圈呀！？！？」
無錯，如果要圍住依度行一圈，即係話要連埋隔離橦公屋咁樣圍住行一圈，但條繩先得果二百幾米．．．