【屋村7-11驚魂】落樓下7仔食個叮叮飯，竟然咁可怕...: 10
聽到地中海阿叔咁講，其他人終於明白係咩意思，換句話說，我地三個並唔係有咩幻覺，因為單靠幻覺都無可能令到條繩夠長去圍住依度行一圈。
唔係幻覺既話，咁即係表示我地的確由７仔離開，然後一直向住右邊行，但唔知點解，我地又會係間７仔左手邊出現番，情形就好似果對強國夫婦所講咁，行黎行去都行番黎依間７仔。
了解左成個情形之後，７仔入面所有人都即刻陷入恐慌。
強國女人之前好耐都無出過聲：「鵝都話鵝地唔係盪失路架啦！！鵝地頭先真係行泥行去都行番泥呢度架！！」
四眼哥仔嘗試解讀宜家既情況：「唔通我地真係好似漂流教室果班生咁，同間便利店一齊去左第二個世界！？」
師奶個樣，已經驚到喊出黎：「咁．．．咁．．．咁點解會咁架！？！？我地係咪永遠番唔到出去呀！？咁我地點算好呀？嗚嗚．．．老公．．．你快ｄ黎救我呀．．．嗚嗚」
地中海阿叔就合埋眼，好似打坐係坐係地下，好驚咁話：「一定係撞鬼！我地一定係撞左鬼！喃嘸阿隬陀彿，有怪莫怪，有咩得罪請多多包涵．．．喃嘸阿隬陀彿．．．」
西裝友抱住個頭，不斷抱怨：「痴線、痴線、痴線架！！！！如果唔係走入黎買煙就咩事都無啦！！！」
長髮女仔亦都坐係地下度，喊起上黎：「嗚嗚．．．嗚嗚．．．點解會咁架．．．我仲有好多野想做，我仲好努力讀書想上大學．．．我唔想咁樣呀．．．嗚嗚．．．」
頭先既經歷對我實在太震撼，我跪左係地下，雙眼無左焦點，唔通我地以後都番唔到出去？個腦又諗番頭先係出面行既情形，但諗諗下，個腦就不斷回憶左好多事，由頭先落黎７仔打算食個叮叮飯，再諗遠ｄ諗番起我老豆老母，再諗遠ｄ諗下我既人生．．．
面對咁匪夷所思、生命受到威脅既狀況，我先至發覺，原來我既人生真係好不知所謂。
如果我早知道我今晚打後既時間都要留係依間７仔度渡過人生最後階段，咁我肯定我以前唔會浪費時間困住自己係屋企去打機，我肯定我唔會為左份牛工去浪費我既人生，我肯定會試下周圍流浪去睇下依個世界．．．
但無論我有幾後悔，宜家講咩都已經太遲，以前我成日以為自己仲後生，將來仲有好多機會去做好多野，但機會其實一直都有，只係我自己以前無珍惜，直到宜家無左先黎無悔，我真係好唔甘心．．．好唔甘心！！
「你講夠未呀？？你知唔知自己好撚煩呀！！」突然俾西裝友既說話，打斷左我既思緒，原來西裝友企左起身，對住地中海阿叔講野。
「仆你個街，我念經關你撚事呀！？宜家我地俾鬼整呀！！你想出番去就咪撚阻住阿叔我念經。」
「無撚用架喇！！！我地番唔到出去架喇！！！你條老野你明唔明呀！！！」係咁恐慌咁壓抑既環境，令到大家都變得有ｄ煩躁。
「嗚嗚．．．嗚嗚．．．」師奶同長髮女仔只係識得坐係度喊。
再係咁落去，我地最終只會等死．．．我唔想自己就咁玩完，我唔想死得不明不白，至少，我唔想就咁放棄，無論咩方法都要試下！
我終於鼓起勇氣，企起身好大聲同大家講：「你地唔好噪！！！」
大家聽見我咁大聲呼喝，佢地終於靜左落黎望住我，等緊我講野咁。
我：「我同大家一樣，我都唔想就咁死係依度，所以．．．所以我地應該再試下出去一次！」
阿叔聽到我咁講，即刻就話：「你都痴線！！你想出去你自己出，你咪撚搞我！」
師奶對於我既提議都好驚訝：「唔係呀？？如果一陣出左去盪失路，又搵唔番依度，咁點算呀？？留係依度，起碼仲有間７仔，我地仲可以捱多陣！」
西裝友亦都潑冷水：「你唔洗預我！我一日跑唔到兩場馬拉松架，一陣如果連間７仔都搵唔番就真係死得喇！」
而頭先曾經好主動提議出去睇下既長髮女仔，依個時候已經無再出聲，我諗佢已經覺得好驚，至於四眼哥仔同埋強國夫婦就更加唔洗問。
我繼續講落去：「你地唔洗擔心．．．我無期望你地會陪我咁做，今次我自己一個出去睇下．．．」
四眼哥仔：「你諗住自己出去？？咁好危險呢！」
我：「我知．．．但係我諗大家都知道，我地已經無其他方法．．．再係咁落去，我地遲早都會死．．．」
大家雖然好理解我既說話，但佢地都唔贊成再出去睇下，不過，既然宜家只係我自己一個出去，佢地亦唔再反對。
宜家有個人話幫自己走出去睇下，點睇都唔係壞事，就算有危險，都係人地既事，佢地咁樣諗，係人之常情。
所以我無怪佢地點解咁仆街，我好明白，依ｄ就係人性，每個人都有自己既考慮，而我決定再出去７仔外面睇下，都係基於自己既考慮，我無咁偉大諗住要去救其他人，我只係唔想自己既人生咁就玩完。
相比起上一次出去，我已經由驚恐變為有少少憤怒，有果種「一於同佢死過」既感覺。
我走去雜誌架果度，將頭先遺棄左係門口果條繩執起，再將條繩綁係自己左手。
長髮女仔見到我唔似講笑，於是好認真咁問：「你真係決定自己一個出去？？」
我一邊用繩綁自己隻左手，一邊好嚴肅咁答佢：「嗯...我唔知咁做有冇意思...但我真係唔想就咁死係間7仔入面。」
長髮女仔聽到我咁講，唯有講：「咁...你要小心...」
我：「嗯，我會。」
我轉頭再同四眼哥仔講：「阿哥仔，同上次一樣，麻煩你幫手計時，過十分鐘唔見我番黎，就拉一拉條繩。」
四眼哥仔：「無問題...」
佢地所有人都企晒起身望住我，
無再講d咩野，個種神情就好似送我最後一程咁款，就連平時吋柒柒既地中海阿叔都一樣。
我企係7仔門口，盤算左一陣，決定好之後應該點做。
當然我唔係真係有一個咩明確計劃，我只係想試下頭先未試過行既路線。
我今次出左門口之後就一直行，事關頭先長髮女仔講得o岩，繼續留係依間7仔可能唔係好事，所以我直覺地認為，越遠離間7仔就越好。
同上次一樣，當離開左7仔幾步之後，周圍就越黎越暗，好快就一片漆黑。上次有人陪住行，要驚都有人一齊陪我驚，但今次得番自己一個，周圍咩都望唔到，講真我堅有d爻。
唔知係自己心理作祟，定還是出面既氣溫改變，我覺得比起頭先凍左好多，為左唔想長時間留係度，我越行越快，再過左陣，我直頭唔理睇唔到野依個問題，開始跑起上黎。
行左咁耐都無話撞到d物件，再一次證明依家我地所身為既位置已經唔係原來既世界，一諗到依點，我更加想快d離開。
由於條繩綁住係左手，所以一路跑一路fing手既時候都係「chok住chok住」，誰不知，我突然覺得，依種「chok住chok住」既感覺消失左，所以我即刻停低檢查下左手，條繩雖然仲綁住隻手，但係條繩已經「dum」係地下，咁即係話，條繩斷左！
無啦啦又會斷左都有既，今次真係死火，我應該唔理照樣繼續跑，定係番轉頭？如果我好似西裝咁搵唔番間7仔咁點算？
雖然係我自己提議再出黎睇下，但依一刻真心有d後悔。
**「視點」再轉番7仔入面，大約五分鐘之前，以下發生既事，我都係後黎聽其他人講先知**
長髮女仔一直企近門口，望住出面睇唔透既霧：「都已經出左去幾分鐘，唔知道佢點呢...」
阿叔：「唉，都唔荒有好事發生啦！」
依個時候，西裝友突然諗到d野：「喂，咪住！其實我地同外界未完全失去聯繫架！頭先你地話報到警，既然仲同外界聯繫到，話唔定仲有機會番出去！」
師奶聽到，突然覺得有番d希望：「又係wo！！我地宜家再試下打多次999啦！」
地中海阿叔：「無錯！！」
之前好反對報警既阿叔，一支箭走入去收銀櫃果度，拎起部ｆａｘ機既電話聽筒。
「喂，係唔係咁打架！？！？」
「你要禁左依個制先。」
阿叔手忙腳亂咁，四眼哥仔就係側邊幫手，再禁埋個「ｓｐｅａｋｅｒ」制。
宜家依條ｆａｘ機電話線，已經成為大家唯一可以用黎同外界聯繫既途徑。
唔係，咁講法唔o岩，正確黎講，係９９９依條熱線先係唯一途徑，事關之前用依部ｆａｘ機打其他電話都係唔通。
７仔入面所有人，都圍住收銀櫃，希望電話另一邊可以帶黎一線生機。
。
「嘟．．．嘟嘟．．．嘟嘟」
「仲打得通呀！今次唔洗死喇！」師奶好興奮咁講。
「卡嚓。９９９報案中心。」聽到電話接通左，大家差ｄ係度歡呼，而接聽電話既，又係一位ｍａｄａｍ。
「阿．．．阿ｍａｄａｍ，救命呀，你快ｄ搵人黎救我地呀！」平時講到自己好叻好巴閉既阿叔，已經緊張到組織唔到說話，一味叫人地黎救佢，但又唔講清楚咩事。
「等我黎講！．．．喂，阿ｍａｄａｍ呀，我地宜家係ｘｘ村果度果間便利店，我地依邊發生左Ｄ好奇怪既事，除左打到俾你地之外，我地已經同外界失去聯絡，仲有生命危險．．．」西裝男嘗試令到ｍａｄａｍ可以盡快意識到成件事既嚴重性，所以特別提到「有生命危險」。
「又係你地呀？頭先我咪話左，我地已經派左警察黎ｌｏｒ。」今次Ｍａｄａｍ既語氣好差。
「但係已經過左成個鐘頭啦！！一個警察都見唔到呀！！」聽到ｍａｄａｍ愛理不理咁，師奶都忍唔住插嘴。
「咁煩架．．．我地警察做野係有程序既，叫左你地等下，就繼續等下啦！」
邊度有ｍａｄａｍ咁講野架？？大家都覺得好奇怪。而且，ｍａｄａｍ把聲開始變得有ｄ奇怪，好似每講一句，說話速度都會比上一句快。
「有冇搞錯呀！？！？再咁等落去，到時我地死晒喇！！」阿叔都發起火上黎。
「總之你地所有人都唔好四圍走，繼續等警察黎就得啦。」
「但係．．．我地依邊，有一個人頭先走左出去睇下．．．」四眼仔照舊咁怕事。
「咩話？？走左出去？？走左出去？？我之前唔係叫你地唔好四周圍走架咩？？？下！？走左出去？？走左出去？？走左出去？？走左出．．．」
ｍａｄａｍ把聲，速度比之前再快左，而且語氣越黎越怪，聽落去有ｄ恐怖，所以其他人覺得有ｄ唔妥。
「咁．．．咁我地見咁耐都無人黎．．．咪．．．」
誰不知，電話另一邊，ｍａｄａｍ把聲唔只越黎越快，越黎越高音，佢仲講左一ｄ匪夷所思既說話：
「吼！！！我咪同你地講左，千 ！ 其 ！ 唔 ！ 好 ！ 行 ！ 開！！！！點解呀！？點解呀！？點解你地咁唔聽話？？點解呀！？點解呀！？點解呀！？點解呀！？點解呀！？點解呀！？點解呀！？點解呀！？．．．．．」
「呀！！！做咩事會咁既？？」長髮女仔越聽就越驚，縮埋左一邊。
「點解呀！？呀．．．呀．．．呀．．．嘻嘻嘻嘻！！！！嘰嘰嘰嘰！！！！嘻嘻嘻嘻！！！！」突然間，電話另一邊唔再係人話，取而代之，係一陣好恐怖好令人心寒既笑聲。
「你地再行開既話，所有人都要死！死！死！！！死呀！！！！！嘻嘻嘻嘻！！！！嘰嘰嘰嘰！！！！嘻嘻嘻嘻！！！！你地再行開，我就殺晒你地！！嘻嘻嘻嘻！！．．．」
「嘻嘻嘻嘻！！！！嘰嘰嘰嘰！！！！嘻嘻嘻嘻嘻嘻嘻嘻嘻嘻嘻嘻嘻嘻嘻嘻．．．．．．．．．」
全間７仔，充滿住果位ｍａｄａｍ既恐怖笑聲。