【屋村7-11驚魂】落樓下7仔食個叮叮飯，竟然咁可怕...: 8
地中海阿叔企係一邊越聽越火：「屌你老味你班撚樣講夠未呀！？成撚日係度胡思亂想，睇戲睇到痴撚晒線，邊得黎咁多神秘氣體呀，我依家碌鳩就真係充滿神秘氣體喇．．．即係吹鳩漲呀！」
我其實睇依個阿叔唔順眼好耐架喇，聽條撚樣成日吋柒柒，我終於忍唔住開佢波：「屌你老味，你成日講到自己咁把炮，又唔見你行出去！？你真係咁撚勇就晨早走出去啦，洗撚係度賴死唔走咩！」
「呀屌你個打靶仔，阿叔我貴為慈雲山比利，有咩撚風浪未見過？神秘氣體！？神你老母！細路我教精你啦，依ｄ係叫做「鬼um眼」，阿叔我紅光滿面，ｄ鬼搞唔撚到我既，如果我一走左，ｄ鬼分分鐘上你身呀！到時你要跪係地求我唔好走添呀！」
我：「係呀係呀，我真係好撚驚呀．．．挑！拿，我諗左一個方法，你係咁撚勇既就同我一齊出去ｌｏｒ！」
地中海阿叔：「出咪出，你估我驚你呀！」
頭先長髮女仔講既野好似幾合理，如果出面ｄ氣體真係會令人產生幻覺，咁我地要走出去就唔係易事，而且其他人亦走唔到入黎，咁搞法我地就會一直同外界隔絕。
所以我就諗左一個方法，去驗證長髮女仔既講法。
我指住收銀機後面果個櫃入面既一卷泥龍繩：「四眼哥仔，依ｄ咁既泥龍繩，你地依度有幾多卷？」
四眼哥仔：「泥龍繩？等我睇睇先．．．平時用黎紮住ｄ紙皮，放左幾卷係度．．．有三卷呀！」
我：「ｏ拿，我地將依幾卷泥龍繩駁埋一齊，長度應該有二百幾米。將依三卷卷泥龍當係廁紙咁放係個雜誌架度，而繩頭就綁住我地隻手，我地就咁樣行出去，其他人就留係７仔入面望住條繩，如果我地出去之後．你地見到條繩亂咁舞，即係話我地可能真係受到幻覺影響，到時候你地拉住條繩，提醒我地要沿住條繩番轉頭。若果咁好彩俾我地行到出去，我地就快速拉條繩三下，到時你地就沿住條繩離開７仔。依個方法你地覺得點樣？」
西裝友：「係醒ｗｏ！」
我：「點樣呀阿叔，你縮沙仲黎得切架ｗｏ。」
地中海阿叔：「車，你顧掂你自己好過啦，一陣咪撚驚到賴尿呀！」
四眼哥仔好似諗到d野：「我仲有樣野未諗得明...就當我地頭先幾個真係俾d霧搞到有幻覺，但點解釋我地部電話宜家無晒訊號呢？兩者好似無關係wo...」
無錯，四眼哥仔既問題問得好。
長髮女仔：「咁依層...我都唔知道...」
我：「我反而咁睇，其實成件事既核心，係點解出面會有依d神秘氣體。會唔會係因為出外發生左一d大型事故，搞到出面有咁多令人產生幻覺既氣體？若然出面真係有咩大型事故，咁無線電話網絡受都影響都唔出奇。」
四眼哥仔點頭：「嗯...可能真係咁樣。」
我：「如其係度靠估都唔係辦法，要出去睇下先可以知道咩事。」
我講依一句既同時，特登將視線放係地中海阿叔身上。
「你望咩姐？阿叔我隨時可以出發啦，係等緊你咋！」
依個時候，長髮女仔竟然提出：「其實...我都想出去睇下...」
師奶：「唉呀，你咪制呀，都唔知出到去會發生咩事！」
我對長髮女仔講：「佢講到岩，出面究竟係咩情況都未知，可能會好危險，到時我地未必照顧到你，所以依d野都係等我地d男人去做啦。」
阿叔：「嘩嘩嘩，成個大英雄咁款wo~~~出面又有幾撚危險呀，吹得就吹！」
長髮女仔依然幾堅持：「但我真係想試下出去...」
師奶：「你諗清楚先好wo！」
我亦好嚴肅咁同佢講：「其實你真係無必要去冒險。」
長髮女仔:「因為我唔想留係度...我硬係覺得繼續留係度，會有d唔好既事會發生...所以我真係想盡快黎開！」
睇黎無人可以改變佢既決定，所以我只能夠提議：「咁一陣就由我打頭陣行最前，到時你跟係我後面啦。」
阿叔第一次認同我講既野，同長髮女仔講：「無錯！到時你一於跟係佢無面啦，而我就負責殿後！到時有我地兩個男人前後包圍你，你大可以放心！」
阿叔既用意我好清楚，佢之所以想殿後，無非因為如果到時有咩意外，佢都可以快d跑番入黎７仔。
我再同四眼哥仔講：「阿哥仔，你可唔可以幫我地計時？如果我地三個出左去十分鐘，你都見唔到我地番黎，又或者條繩無反應，咁即係話我地可能出左事中左幻覺，你地到時就拉住條繩，咁樣做希望可以將我地叫醒．．．」
於是乎，我、長髮女仔同埋地中海阿叔就好似小學生排隊咁企好，其他人幫手將三卷泥龍繩駁埋一齊，然後將繩頭穿過我地三個人既左手再綁住。
我企係最前面，抖左一口大氣，望住７仔門外既濃霧，感覺真係好陌生，明明幾乎每日都會進出依間７仔，但宜家竟然好似太空人離開穿梭機咁大壓力。
我地三個太空人，檢查好條太空救生繩索係綁實左之後，終於踏出第一步。