【屋村7-11驚魂】落樓下7仔食個叮叮飯，竟然咁可怕...: 4
阿叔聽到，依然一副恥笑既咀臉，而其他人就有少少覺得佢兩個神經有問題咁。
「咁你有冇試過打電話俾你個朋友？」
作為一個毒男，我依個時候竟然成個高登神探上身咁款，而其他人聽見我咁問強國夫婦，都覺得make sense，所以大家都等待依兩條痴線友會有咩回應。
強國男人聽見我咁問，又開發有少少激動：「鵝緊係有打俾鵝個朋友啦！點知打左俾佢，淨係鵝聽到佢把聲，佢就好似聽唔到我講野咁！激死鵝！」
「咁之後呢？」
「鵝就收左線，然後再打一次ｌｏｒ，點知第二次打，部電話已經收唔到訊號。果陣時條街仲越黎越大貌（大霧），鵝地兩個係咁行都係行番黎依度附近，最後大貌（大霧）到咩都望唔到，鵝地兩個驚起上黎，咪係咁亂跑lor．．．最後．．．最後咪又係跑左入黎依度．．．」
聽到強國夫婦咁講，我好似發現左Ｄ野。
「呀！話時話頭先我明明想打俾我老公，叫佢黎接我，俾你兩個嚇一嚇，搞到我咩都唔記得左添。」
師奶再次拎部電話出黎，嘗試再打俾佢老錢，而果個長髮女仔亦都一樣，我估計應用係打俾佢屋企人，睇黎個個人都繼續當果對強國夫婦只係盪失路發up瘋，無加以理會。
而我俾果位師奶咁講一講，突然醒起我老豆老母差唔多依個時候會番到屋企，以免佢地番到屋企唔見我會擔心，所以我都嘗試打番去。
「嘟．．．嘟嘟．．．嘟嘟．．．卡嚓。喂？」電話另一邊接通左，接電話既係我阿媽。
「喂，阿媽呀，我係阿嵐呀，頭先我落左樓下７仔食野，好快會番上黎．．．」
「喂？喂？你搵位邊呀？大聲Ｄ啦，喂？」
「喂，阿媽呀，我係阿嵐呀，你聽唔聽到呀？」
「喂？喂？」阿媽把聲我聽得好清楚，但佢就好似聽唔我講野咁。
係依個時候，我聽到阿媽後面有另一把聲，原來係我老豆：「咁夜邊個打黎呀？等我聽過．．．喂？邊位呀？喂？」
「喂，老豆呀，我係阿嵐呀。」
「都無人講野．．．夜ｍａｍａ邊個咁無家教係度玩電話呀？？」老豆講完依句就收左線。
真係俾佢地激死，至少都要望下來電顯示睇下邊個打黎啦，仲話邊個無家教．．．之唔係你個仔個老豆ｌｏｒ．．．
收左線之後，我即刻再打一次番屋企，但已經打唔通，我望下個電話，竟然無晒訊號。
「明明頭先仲打到架．．．」
企係隔離果個師奶咁講，睇黎佢同我情況一樣，而我再望去果個長髮女仔，咁o岩佢又不約而同望向我，四目交投，我馬上就意會到，個女仔並唔係對我有意思，只不過佢部電話都同我地一樣，打完一次之後就無晒訊號。
由頭先本黎暫時緩和既氣氛，突然開始又變得不安。
依個時候，我身後傳黎一把聲，原來係四眼哥仔，唔知係咩時候，四眼哥仔離開左部收銀機。
佢係飲品櫃果邊行番出黎，好疑惑咁講：「點解季嬸唔見左人既？」
「季嬸？你果個拍檔季嬸？你頭先唔係話佢入左倉果個廁所咩？」地中海阿叔追問。
「係呀，我見佢入左去咁耐都未番出黎，咪打俾佢lor，唔知係唔係佢部電話既問題，我聽到佢up咩，但佢就聽唔到我up咩，於是我咪走入去倉諗住拍門叫佢lor，點知原來都無人用緊廁所．．．」
係依個時候，雖然大家覺得好唔對路，但都仲未了解到成件事既嚴重性。
「會唔會係你記錯左呀四眼仔？可能阿季嬸去左屋村入面果個公廁呢。」
地中海阿叔質疑四眼哥仔。
「無理由記錯架ｗｏ，我好記得佢同我講話要去一去廁所，然後佢就走左入去貨倉果邊，無幾耐阿叔你就入黎買啤酒喇。」
依個時候，長髮女仔都傾埋一份：「阿收銀哥仔，你講果個季嬸，佢究竟行開左幾耐呀？」
四眼哥仔望一望錶：「大大話話都有成半個鐘喇。」
長髮女仔若有所思：「就算佢真係好似阿叔咁講，季嬸係去左屋村入面果個公廁，都無理由咁耐都未番架．．．」
長髮女仔講得好有道理，而且我都相信四眼哥仔無記錯，若然係去廁所，實在無理由唔用７仔貨倉入面果個，反而要行出去用較遠既公廁，除非佢根本唔係去廁所啦。
聽完大家咁講，總括而言依度有幾樣奇怪事：
１）出面大霧得好唔尋常，連街燈既光都見唔到。
２）強國夫婦話佢地係出面行黎行去都會番到黎依間７仔，但依點未經證實。
３）大家既手提電話，好似都出現左問題。
４）四眼哥仔既拍檔阿季嬸，似乎係間７仔入面唔見左，但都唔能夠完全排除係四眼哥仔記錯左，不過季嬸失去蹤影就係事實。