《好地地，我做乜鬼無啦啦帶個港女Friend嚟台灣特訓？》: 【10】萌芽
過咗無幾耐，好似係幾個禮拜咋嘛，就係可妮ig上面睇到佢同嗰個男仔嘅合照。
我都仲繼續同可妮有傾偈，咩都傾下，嘗試下係佢心目中重要嘅位置上佔一席位。
但換嚟嘅係攰到筋皮力盡嘅我。
我嗰晚同傑克去咗學校附近嘅酒吧飲悶酒，姐係同Kiki去嗰間。
基本上Kiki做過嘅嘢，我都全部經歷過，比Kiki做得更加徹底。
飲快酒，加速自己死亡。日日都頹廢咁過活，成個禮拜無去上過堂。
係直到俾傑克格硬拉我出去，去台北走返轉，等我個心可以散走一下，我先正常返少少。
最慘嘅係，我仲會間唔中見到可妮，不時會回憶泛濫。見到面仍然強裝無事，笑面迎人咁串下佢依家拍拖好幸福啦。
最令我感到奇妙嘅係，反而可妮拍咗拖我哋先真係熟，可以互相講下笑。
我心涼咗一塊，好似強調緊我咁：可妮並不屬於你。
「所以你話，我同你，邊個慘啲？」我老實咁講，臉上擺咗一個唔情願嘅苦笑。
「你。」Kiki都好坦白咁講，一支纖幼嘅銀針穿過自己身體，刺中你原以為收得好埋嘅一角。
「你仲未放得低啊嘛？係咪？」
「係啊，仲係放唔低……」Kiki放低手機，螢幕上見到佢開緊whatsapp，對話嘅人係佢前男友。
Kiki又再睇返以前啲紀錄，同埋關注下佢ex。
「我比你更加耐，已經兩年啦，我都仲未放得低。」
「咁你又叫我放低？」Kiki飲住杯珍珠奶茶，嚟台灣差唔多個個都會飲返杯。
「我同你講嘅嘢，其實都係同緊自己講。」我幾乎割開自己個心同Kiki講㗎啦，我自己做唔到姐，我都希望我朋友做得到。
「咁又係嘅……正如我頭先都叫你放手一樣。」
「愛情真係呢，究竟係咩玩意呢？投入嘅時候係如此著迷，但要抽離卻如此艱難。」
「好似吸毒咁。」此刻我同Kiki嘅感受係一樣嘅。
兩個都係失意嘅人。
係咁微妙嘅一瞬間，我竟然有一絲念頭，覺得Kiki做我女朋友都好似唔錯喎？
但喱種錯覺好快俾我拉離現實。
無感覺就自然無動力，當有一日有感覺嘅時候，話唔定真係可以…？
我哋兩個依家個氣氛都幾尷尬下，仲要大家都帶住一個沈重嘅心情。
「喱餐我俾啦。」我唔知咩事會講話請Kiki，但我唔係基於咩紳士風度，而係心甘情願。
「你係我第一個過嚟玩嘅fd，所以俾我請你一次咁多囉。」印象中我真係有請女仔嘅人，唔多。
「唔好啦。」估唔到平時港女開嘅佢，會拒絕？
「你講嘅唔係無道理嘅，我真係應該多啲為男仔諗下。以前嘅我太自以為是啦，話唔定就係因為喱一點，我ex先會唔要我。」
Kiki真誠地道，原來我講嘅嘢佢真係有聽入去，不禁令我對Kiki改觀。
更發覺佢會係一個可造之材，當一個港女脫變嘅時候，就會變成一個真正嘅女神。
甘心拜服係佢嘅石榴裙下。
「真係咁識諗？轉曬死性咁？」我以囂張嘅語氣去掩飾我內心嘅尷尬。
「真係㗎…喱趟旅程我真係學到新嘅嘢。Um⋯⋯我都唔知點講先清楚，總好似睇清好多嘢咁，唔單單淨係局限係自己身上。」
「喂！做乜講到咁正經姐，我哋唔洗咁正經啊，講到好似你嚟俾錢上堂咁。」
「唔係㗎，我嚟喱度就係想變得更加好。」
「其實我有認真反省過，我好羨慕啲拍長拖嘅情侶，人生大大小小嘅難關都有人陪你行過，嗰種一齊經歷過歲月嘅感情最為真摯，亦都係最無價。」
「我都好想有啊，但唔知點解總係拍唔長咁，坦白講我都唔知點解，遇到事情或者溝通唔到，就好似斷咗線咁，想補都唔知點補好。」
「究竟係咪我問題呢？我真係唔知。」
我本來想安慰下Kiki，或者解答下佢嘅問題，但係Kiki擺低咗錢之後，就走咗出店外，留係我係度。
咁我都好自然咁去買單，我慢慢發現Kiki一點一滴咁慢慢改變，係佢變啊？定係我慢慢接近真實嘅佢？
我買完單出去嘅時候，我以為Kiki係出門面等緊我啦……
點知我轉個撚頭行出去，Kiki就消失咗，唔知去咗邊。
不留一絲痕跡，我到底應該去邊度搵你嘅蹤跡？
Kiki唔見咗之後，我即刻拎部手機出嚟打俾佢。
好幾通電話都無人聽，我有幫佢整上網啊，係無本地電話姐，但打whatsapp call會有反應㗎嘛。
跟住我打埋line，facebook啦，都係同一下場。
我開始心急啦，慌慌張張咁四圍不停咁搵佢。
跟住我「屌」咗出聲，條仆街就係食飯嘅隔離鋪頭度，係入面夾緊公仔。
真係仆你個街，搞到我虛驚一場。
所以話啊，有時啲嘢係自己嚇自己嘅姐。
「喂！」唔知係咪因為頭先慌張得制，搞到我有啲嬲嬲地，「你做咩事無啦啦咁樣走咗去啊？」
「無嘢啊！」Kiki仲惡過我，我以為佢會識驚添。
「你做咩事啊？你知唔知我好擔心你啊頭先？」
「我唔知啊！我淨係知我依家好唔開心！好自卑啊，我都唔知幾耐無試過啦。」
Kiki唔理旁人眼光，就算俾其他台灣佬睥住都照發洩。
「屌！又夾唔到！個機係咪廢㗎仆街！」Kiki爆曬粗咁，到依家我都仲未理解到佢點解無啦啦心情咁差，本來仲好地地。
「做咩啊？因為頭先令你諗起ex？」我嘗試估下，不過都八九不離十㗎啦。
「係啊！佢到依家仲未搵我，我有時會忍唔住諗好多嘢，跟住越諗就越負面啦。」
「啊！」Kiki好似痴撚咗線咁大大力拍落部機度。
「喂，你唔好癲啦，人哋以為你痴咗線㗎，喱度台灣嚟㗎。」
「台灣咪好囉！又唔會有人影到跟住擺上連登。」
「屌你啦，你遲下上咗報之後，香港唔會知咩？咁樣又唔係上連登？真係癲少陣啦。」
「我唔理啊，你幫我夾返個啊！」Kiki發完脾氣之後，就係扭計啦。
「好好好，你話點就點啦。」經驗話我知，喱個時候唔係拒絕佢嘅好時機。
我好專心咁幫佢夾隻公仔，直至我行埋去先留意到入面係一隻屎公仔。
係一個屎型emoji嘅公仔嚟。
「你好哋哋做乜要隻屎公仔啊？
「我鐘意囉！好乎合我依家個心情同埋個人，留佢做個紀念都好啊。」
我就睇下邊隻最近最易夾，好專心咁夾緊隻公仔。
最後，係連我都操埋底。
「我唔信！我唔信我夾唔撚到。」
「係咪呢，係咪呢，都叫你唔好心急㗎啦。」
「就得㗎啦！信多我一次。」
然後成個全世界就安靜咗落嚟，好似啲運動選手咁，關鍵時刻總係特別安靜，特別專心。
「哇！！！」連聲驚呼之後，隻公仔因為佢三角形撞上個邊邊，然後碌咗出嚟。
「Yeah！！」Kiki興奮咁蹲低去拎隻公仔出嚟。
「我咁大個女第一次夾到公仔咋。」
「又唔係你夾嘅……」
「你講咩啊？」Kiki大大力咁拍落嚟。
「你嘅你嘅。」
「哇！好開心啊。」Kiki好好笑容，同頭先發曬脾氣嘅佢唔一樣。
Kiki真係好唔一樣，同可妮相比。可妮佢文靜溫柔好多，而Kiki多嘢講啦，一時一樣啦，總係令我捉摸唔透。
但喱一刻，我真心因為Kiki開心而開心，見到佢咁開心，我亦都感到好滿足。