《好地地，我做乜鬼無啦啦帶個港女Friend嚟台灣特訓？》: 【9】回憶
唔係掛？真係有咁橋？
「她沒有男朋友？」我好似淨係聽到喱句重點。
「對啦。」子愷佢係隔離插嘴，我哋依家三個係宿舍傾緊迎新營大計，為咗確保大家嘅目標是咪一致，廢事搶咗人哋條菜就無謂啦。
「Yes!!!」我好興奮咁叫出嚟，感覺機會向我行緊埋嚟。
「幹嘛？」佢哋兩個用奇怪嘅眼神望住我。
於是我講咗我頭先發現嘅事俾佢哋知。
「真的欸，她真的跟你一組欸！」佢哋都為我高興，但同時都係度愁緊。
「你就好啦，可以跟她一組，我跟她都不知道該怎麼辦。」子愷好無信心咁講，佢高高地，肥肥地，性格又好恰，做朋友嚟講，佢真係好唔錯。
班上面靚嘅台妹都多嘅，不過每種類型嘅女仔都有，百花齊放。有可愛型、MK型(有紋身啦，染咗個唔知咩顏色嘅頭髮)，亦都有文青女神型。
我哋三個分別鐘意上唔同類型嘅女仔，人有分唔同類型，所以鐘意上嘅都有唔同類型。
班上面仲有其他男仔fd嘅，不過有報迎新營嘅，只係佔少數。
到咗迎新營嗰日，前一晚我仲好似中學生咁，因為學校旅行有得同女神接觸而興奮，嗰種雀躍係越嚟越難搵㗎。
尤其是知道自己同可妮一組，臨瞓前就有好多幻想，會唔會因為咁樣一齊啦，之後好開心拍拖咁啦，諸如此類。
屌，諗下都興奮！
翌日，整裝待發，call埋三五知己一齊出發。
去到集合地點，好多人已經到咗，我哋亦各自四散，去返自己嘅隊入面。
可妮佢就坐係我哋隊頭，雙腳抱膝，呆頭呆腦咁四周圍觀望。
然後我同佢對上咗一眼。
佢好似知道我係班上面嘅人，由佢表情睇落，頭先焦慮嘅心情入面好似有返啲安心、熟悉感。
喱個眼神，會唔會係一個好嘅開始呢？
我心諗。
「咁睇嚟你大把機會姐。」Kiki一路食飯一路好專心咁聽我講故仔。
本來我仲沈醉係回憶當中，一嘢俾Kiki勾返出嚟。
「屌你，聽故就咪駁故啦！」我講到都無心機食眼前碟飯了。
我同可妮對望咗一眼之後，我就係坐係隊尾後面。
我哋組嘅隊輔(姐係組爸組媽啦)，都好關心我，知道我係香港人之後，不停問下我嘢，唔難睇得出佢哋嘅好奇心。
仲係咁稱讚我靚仔，我自問又唔係咩靚仔，都係聽下就算，但環觀我哋啲組仔，又真係無乜邊幾個靚仔，有一個係幾型，但其他都好毒，一陣陣台灣鄉下味。
喱個唔係重點，重點係我同可妮……
係我哋出發嘅途中，佢仲好怕羞咁，無乜點同人傾偈啦，但反觀好多人已經融入曬。
可能喱一點都係我鐘意嘅，鐘意可妮嘅靦腆，鐘意佢嘅嬌羞可愛。
去到營地，我哋全部人安排住邊先，然後放低啲嘢，出嚟集合。
出嚟集合嗰陣撞到都係一齊出嚟嘅可妮，喱個巧合好似係天賜俾我咁，我知大家嘅目的地都係同一個地方，於是上前打個靚招呼。
「嗨！」
「嗨！」可妮第一句同我講嘅說話。
然後我哋就無嘢講…….跟住落嚟淨係得一齊行去自己team。
頂，我唔知係緊張定點，但頭先真係好尷尬啊，老母啊…….
跟住玩遊戲嘅時候我都有同其他人一樣，試著點樣去融入啲組員。
間唔中我同可妮都有幾句嘢講下，但好多都係點到即止，怕怕醜醜咁就拉走咗了。
過程係開心嘅，我都識到唔少新朋友，玩遊戲嘅時候大家都好投入，而且台灣啲迎新營入面啲game唔似香港嗰啲咁淫賤，無咩身體上嘅接觸。
反而喱啲遊戲令到我哋玩得更加放。
到咗夜晚，我有係組爸組媽嗰邊聽到今日夜晚先係重頭戲，叫我哋大家一定要認真咁對待。
聽完佢哋咁講，搞到我都有些少期待添，究竟係咩呢？難免有啲心邪嘅諗頭嘅。
到咗夜晚黑，佢哋帶咗我哋嚟一個好黑嘅荒野度，亦都好嚴肅咁同我哋講：「如果你們是不能玩的，覺得害怕的，一定要跟我們講，我們會幫你們安排的。」
「沒有做好心理準備的人，勸你們不要進去。」
平時嘻嘻哈哈嘅組爸，依家都拉低咗個笑容，一臉嚴肅咁同我哋講。
『真的假的？』
『我有點害怕欸……』
底下一陣竊竊私語，唔難知道其實佢哋心入面有啲淆底嘅。
我注意到可妮企係後面自己一個，有點徬徨無助。
我察覺到喱個係好時機，於是拎起啲勇氣，一步一步入過去可妮度。
有時人就係忽然間咁大膽，偶爾俾自己衝動一次。
你未衝動過呢，你可能因為咁樣錯過一啲美好嘅事情。我好慶幸當初有勇敢過，儘管個結果唔係自己想像中咁，但事實就係無得再強求落去。
「你還好嗎？」我關切地問道。
唔知佢係咪真係好驚啦，可妮佢今次防備心無咁重，坦然咁同我講：「我有點怕……」
「是因為裡面嗎？還是怕黑？」
「不是啦，因為聽說有人感應到裡面……說有些髒東西……」可妮越講越小聲，生怕俾唔知咩嘢或者咩人聽到。
「不會吧？」我一向都係無神論者，更加唔係幾信喱味嘢，所以我唔係幾明有咩好驚。
「我想應該不會有事的，畢竟那麼多人嘛。」
「希望是吧？」可妮仍然都係憂心忡忡。
「那…我先回去吧。」我怕自己太狗公會嚇親佢，我都唔想咁急進，唔知怎的，就係想行前一步，再拉開距離，打一個拉打戰，這一場戰役，係一場持久戰。
係我嘅預料中，佢係會好似之前咁，俾我走啊之類嘅，我過嚟嘅目的除咗係想進一步之外，就係想可妮心入面會記住我，而唔係單單只係迎新營同佢同一組咁簡單。
「你可以留下來陪我嗎？」可妮輕輕伸佢嘅小手捉住我短袖衫嘅衣角。
聽完之後，我唔知點形容，依家就好似啲小學生作文咁，好開心啊，好興奮。
高層次一啲就係中學作文，不能夠喜形於色。所以佢睇唔到我嘴角不自住向上揚嗰個畫面。
我無回答可妮，只係默默地坐係佢旁邊。
守護佢。
係咪突然間覺得喱一下好型呢？會溝到女呢？
事實係我唔知應該點應佢，好似講咩都唔係咁好，所以索性唔講。
心裡上，我係柒咗。
不過算啦，最緊要可妮唔知，佢受落姐。
我就咁靜靜地坐係可妮隔離，而我哋就係度等緊負責人安排，依家前面好似一片混亂，唔知發生咗啲咩事。
我後尾聽返，係因為夜遊入面好似「有嘢」唔俾入，四面都係俾高山包圍住，基本上係無風可侵，所以奇怪嘅係，當工作人員想點火拜下嘅時候，點極都點唔到火，再唔係就係一點著咗就熄滅。
有啲唔信邪嘅組爸，都話係門口度感受到背後好寒，係由背部一路寒到上頭頂。
更有一個其他組嘅女仔話感應到嗰啲嘢，話好唔舒服，玩唔到夜遊。
之所以要等咁耐，就係因為決擇緊繼唔繼續好，但最後都係頂硬上。
我哋就咁坐係度成個幾兩個鐘，都仲未輪到我哋。
我已經聽到啲組員係度抱怨，怨聲四起。但我就希望就咁OK啦，就等依家喱個時間靜止啦。
無聊著，最後都係可妮打開個話題。
「你來台灣不會很想家嗎？」其實都靜咗咁耐啦，已經過咗會覺得尷尬嘅時候，但聽佢問得如此自然，證明佢都無頭先咁驚啦。
我都盡量用愉快嘅聲線同佢講，避免一啲沈重嘅說話。
「一開始會啦，會很不習慣的，可是慢慢的好像也就習慣了，反而會想要更享受現在的生活，畢竟對我來說是滿新鮮，滿好的體驗。」
枱起頭，可以睇到數顆星星。儘管唔係好多，但夜空中嘅一粒星星，已經好吸引人，隔離無其他星星，反而更加能夠專注睇嗰「一粒」星星。
「你為什麼想要來台灣啊？」佢喱個問題已經唔係第一次聽，就連我未嚟台灣之前，已經有香港fd咁樣問我。
「離開自己長大的地方，不是一件容易的事，我是想趁自己年輕的時候多去別的地方闖闖看，可是家裡錢又不多，又不能去英國那麼貴的地方。」
殘酷嘅現實令我無更加多嘅選擇。
屌，明明話唔係咁沈重㗎嘛，做咩搞到我好沈重咁…？
「我覺得你很棒欸，有自己的想法，自己勇敢的來到一個陌生的地方。」
我聽到係真係開心，甚至我偷偷望下可妮，睇下佢係咩表情。我偷瞄到啦，的確滿是欣賞咁，我感受到。
「還好啦，年輕就是帶點衝動，重點是看到自己慢慢改變，變得更好，也是很開心的。」
好想繼續咁樣落去，因為咁樣會我成功追到佢會大啲，至少依家我哋慢慢由零開始。
「欸欸，到我們了。」係不遠處嘅組員來過嚟提提我哋。
我哋之間嘅對話就咁必須中斷。
但我唔覺得有幾可惜，反而覺得令我哋互相靠近了。
我哋兩個幾乎係隊尾，頂…越近隊尾先越得人驚。
「不如我排最後？」我唔怕做最後一個，因為接近隊尾都會有組爸或者組媽睇住，所以唔算好怕。
「我想在你後面，感覺沒那麼怕。」
咁竟然佢都咁講，咁我就係佢前面，要好好珍惜喱個機會可以保護可妮嘅機會，話唔定遲下就無啦。
美中不足嘅係，企係我前面係一個男人嚟。本來我都覺得無乜嘢，但到咗準備要入去嘅時候先知，原來係要手拖手入去……
姐係我有機會拖可妮隻手？
心入面牽起一陣陣興奮嘅漣漪，連聲叫好。
前面個男人唔係重點，但當拖上手嘅時候，哇，嗰啲汗啊，腐蝕曬我隻手，仲要有黏性，你想甩都未必甩到。
但反觀可妮就驚驚青青咁，好似並唔係好願意想拖手咁，我唔知佢只係純粹唔想拖手定唔想同我拖，我希望唔係後者啦。
個時間越趕，佢就越無選擇嘅時間，最後都係輕輕咁拖上我。
可妮白滑嘅雙手，我感受到佢細細嘅手指，雖然喱個時候唔係咩甜蜜嘅時刻，但卻係我美好嘅回憶嚟。
入到去夜遊場地，要跨過個火盤，入面係一片漆黑，路旁有啲白色螢光棒係度，堆埋一齊形成一條路仔，指引住我哋。
周不時隔離會有「人」，隨時衝出嚟嚇你。
我有留意到啲「人」其實係扮出嚟，因為我見到有幾個係我識嘅師兄嚟，所以我變得更加唔怕。
我後尾好鬼衰，慢慢就放開個男人隻手，而佢都無咩嘢，佢前面都係女仔嚟，所以佢諗嘅同我應該都一樣，鬆開咗，唔好俾人察覺就無事啦。
可妮佢同我貼得好埋，當佢一俾「人」嚇嘅時候，我會因為咁樣食到佢豆腐。
我嘅心跳因為可妮嘅迷人而加速緊，佢雙手因為緊張而捉到我好實，保護佢嘅意欲因為咁樣而萌生出嚟。
當有啲「鬼」想嚇佢，我就嚇返佢轉頭，扮狗吠啦，喴嘩鬼叫咁樣，務求趕走佢哋。
一步一步咁樣行出個夜遊場。
當喱個遊戲完結嘅時候，我心入面充滿不捨，更加唔捨得就咁鬆開可妮隻手。
當我哋停係有光嘅地方，可妮仲係緊緊咁捉住我隻手。
「我們到了，已經沒事了。」我個佢仲好驚，我捉住佢隻手都感覺到佢隻手係度震緊。
當可妮慢慢抬起嚟，係泛黃嘅燈光底下，可妮臉上剛好有滴淚珠劃過佢紅潤的臉龐。
「怎麼了？」我俾佢嚇親，就算中學班上面女仔多，但我都未試過有女仔係我面前喊。
「你沒事吧？怎麼突然間就哭了？」我手忙腳亂，心入面唔知點算好，要唔要幫佢拭走啲眼淚？點做先啱？
「沒事。」可妮回過來神來，然後對我淡然一笑。
「真的？」
「真的啦，我只是想起某些事情而已。」
我好似隱約察覺到啲異樣，但又講唔出係咩嚟。到咗後來我先明白，自己察覺到嘅，係可妮嘅過去。
而佢嘅過去，我並沒有參與到。
正當我以為我同可妮嘅關係會有進展，卻唔知咩事又打返回原型。今晚夜遊，就咁成為我難忘嘅回憶，同時間，亦影響咗可妮嘅決定。
唉，點解命運要咁樣玩鳩我？
「就咁樣？你哋就咁玩完？」Kiki食曬啲嘢，而我碟嘢好似仲未郁過咁。
「仲未嘅，但差唔多啦。」嗰一幕，直到依家都記憶猶新，幾唔想面對都好，佢一樣好似魔鬼咁出現係你腦海入面，揮之不去。
「快啦，講講講。」聽八卦就最開心，人哋感受就連都唔撚理下，唉。
跟住落嚟嗰兩日，同可妮感情好似幾好咁，大家都有講有笑，我哋之間嘅關係好微妙，究竟係若即若離啊？定係刻意保持距離？
我真係唔知。
就連營火舞，佢都無再選擇企係我隔離，轉而去女仔嗰堆度，咁我呢？咪拖住班仔囉。
離開營地，接近結束，我同佢極其量只可以話係朋友，我好似點都追唔到佢咁。
我心情由之前興奮不停，到依家不停咁煩惱緊究竟發生咩事，成件事好似坐緊跳樓機咁，上到最頂，然後無聲無息無預兆咁跌你落嚟。
可能你連驚叫嘅反應都未嚟得切俾，就已經完咗。
我哋組坐係車最入面，所以係最後先落車，一落車嘅時候，我發現不遠處有一個男仔企咗係度，我心入面不禁納悶。
直到佢向我哋喱邊揮手，而可妮又俾反應佢，我就知佢係我嘅頭號大敵。
可惜啊，係個男仔心入面，我根本什麼都不是。
我哋落車仲未解散，集合完，講下總結再影下相先收得工，但成個過程入面，個男仔一路係出面等可妮。
我之後係傑克口中知道，原來個男仔讀台北，專登係台北搭車落嚟搵可妮，就係擔心佢。
成個劇情好似那些年咁，佢就係柯景騰，我就係嗰條乘虛而入嘅死肥仔。
我同個肥仔唔同嘅係，佢係得米嗰個，而我就咩都無。比個肥仔更加失敗。
係可妮入去玩夜遊之前，佢有send line俾個男仔，同佢講自己驚，但又唔好意思同人哋唔玩，但個男仔有事無覆到佢。
我諗可妮當日喊，其中有個原因係諗起佢，同埋因為個男仔無覆到佢而唔開心，最後先明白到個男仔原來係佢心目中咁重要。
喱個，就係我無參與到嘅過去，佢哋兩個嘅感情完勝咗我對可妮嘅感情。
到最後，我只能夠眼白白咁睇住可妮行去個男仔度，而我，淨係得個「睇」字。
啊，仲有「酸」嘅。