《好地地，我做乜鬼無啦啦帶個港女Friend嚟台灣特訓？》: 【11】有啲感情係一開不可收拾
「你開心就得啦。」
「點啊，心情好返啲未啊？」
「好返啲啦， Yeah！！」Kiki勁用力咁攬住隻公仔，樣子甚是甜美，原來令佢開心係咁簡單。
「我哋再行下逢甲啦，你都仲未行曬。」
最後Kiki係逢甲買咗一堆衫返去，係返去嘅途中，Kiki如常咁坐係我後面，幾次落嚟，漸漸已成習慣。
「我聽日要返學啦喎，你有咩做啊？」我問坐係後座嘅Kiki。
「無啊，你返你嘅學，我要自己搵節目㗎啦。」Kiki好似都幾期待出去玩咁。
閒聊幾句之後，我就繼續專心揸車。
返到去，我繼續執嘢同埋準備定聽日返學嘅嘢。而Kiki呢？好開心咁係度玩公仔，同隻公仔影相啦，放上story啦，公開同全世界講隻公仔係佢夾嘅，佢先係最犀利嗰個。
喱啲嘢我都見怪不怪，女人都係喱種咁嘅生物。
到咗第二日返學，我準備起身返學嘅時候，Kiki仲好似瞓到隻死豬咁，完全無知覺咁。
最撚神奇嘅係，我上完第一堂之後，無無聊聊睇下ig，發現Kiki係Story po咗嘢，條友仔出咗去食嘢，仲要食好嘢。
今日係學校，我撞正可妮同佢男友。
「嗨！」可妮熱情咁同我打招呼，台妹真係好鬼死可笑，好正……
「你男友又下來陪你喔？」可妮男友係台北讀書，間唔中都會落嚟陪下佢。
係台灣，台北同台中已經係異地戀啦。
係香港，屯門同筲箕灣都照樣可以出嚟拍拖啊。
「對啊，難得明天放假嘛，所以他就下來給我一個驚喜嘛。」可妮撓住佢男朋友嘅手臂，一臉甜美可人。
「下？明天放假？明天不是禮拜三嗎？」我諗緊係咪佢無堂咋？
但諗諗下唔係啊，佢有啲必修仲要同我一齊上添。
「明天雙十節嘅，學校當然放假啦。」
係喎，聽日雙十，我都唔記得咗添。
雙十姐係十月十號，係台灣嘅國慶嚟，同大陸唔一樣，大陸嗰邊係十月一號，而台灣建國係十月十號，所以就例為法定假期。
同佢哋道別之後，我繼續去上我嘅堂，唔知點解我第一時間就係諗起Kiki。
難得放假，當然係諗住好好地帶佢出去玩啦。
於是我whatsapp佢：喂，聽日原來放假喎，不如聽日出去玩啦？
估唔到開學無耐就放假，爽！
Kiki：好啊！去邊啊？
Kiki好快就覆返我，以為佢無咁快覆㗎嘛，佢話出咗去玩，會無咁得閒添。
佢問我去邊，搞到我都要諗下添，事關又真係唔知去邊好。
上網查下附近有咩地方，然後唔洗好耐就諗好去邊。
我：去高美濕地？
Kiki：好啊。
我：你今日去邊啊？
Kiki：無啊，去行下街睇下嘢食下嘢咁樣囉。
其實我問嚟都多餘，佢ig都po咗好多，打啲caption又幾文藝咁，但我都會關心下，驚佢自己一個出去唔掂。
我：自己一個咁勁？
Kiki：係啊，台灣嚟㗎，又唔係其他地方，係台灣我自己一個完全無問題喎。
成堂我就係咁同Kiki sd msg，感覺好似男女朋友咁，喱啲就係曖昧？
我對喱種曖昧嘅感情好模糊不清，好是陌生，但喱種唔清唔楚嘅關係又令人感到愉快，充滿著神秘感。
嗰晚Kiki好夜先返嚟，我都差唔多瞓啦，佢返嚟嗰陣仲好開心，四面咁嘅口。
「咩事咁開心啊？有豔遇啊？」我開玩笑地說。
「你又知嘅？」Kiki眉開眼笑，嗰種開心樣，唔似係講笑咁講。
「真係㗎？」我半信半疑。
「只不過我幫個路人執到個銀包，佢勁好人囉，不停講多謝之外，仲話要加我line，我都load咗陣咩係line，哈哈。」
係台灣，遇到咁熱情嘅人並不稀奇，成日都會有人拎香港同台灣，話香港人好冷漠，好多事情不聞不問；而台灣就好熱情，好有人情味。
但事實就有兩面嘅，我係度居住咁耐，台灣人有啲係好古道熱腸，但有啲係知人口面不知心，話唔定會係度伏緊你，就好似你返大陸你遇到有個人無啦啦係度纏住你，你都會有所防備一樣。
香港係事不關己，己不勞心。唔知係咪一路以嚟習慣咗咁樣嘅模式，我嚟到台灣都係無辦法好似佢哋咁對人無乜戒心。
「你又真係唔怕人哋裝你彈弓喎。」我擔心佢會俾人呃，到時候我又唔知點樣救佢啊大佬。
唔好以為台中好安全啊，好多風化案之餘，台中仲出名多黑社會。
「怕乜啊，我又無錢，最多咪又係吉兩下。」佢毫無畏懼。
「又唔見你俾我吉兩下？」我衝口而出，想收都收唔返，我只係想串下佢，唔係真係想……
唉，媽啊，我到底做緊乜？
「嚟囉！怕你啊？」
我心入面諗起唔撚係掛熊幅圖，同我依家個表情一撚樣，我都唔知點樣化解喱一幕嘅尷尬好，個腦閃過好多嘢。
真係咩？定講笑？佢試緊我？定係認真？
「咪玩啦，你自己一個出去小心啲啦，你唔好以為台灣好安全先得㗎。」
我都係過唔到自己嗰關，一開始又話當人係朋友，唔會亂嚟，依家呢？
好似真係鐘意上Kiki啦，雖然對住可妮仲會心酸酸，但係見到佢依家咁幸福，開始會為佢感到開心，心酸就逐漸減退。
Kiki對於頭先嘅戲言，只係笑笑就帶過去。
不過Kiki係度，我屋企好似打仗咁，一啲佢買返嚟嘅衫啦、化妝品，仲未計啲一早擺咗出嚟嘅化妝品。
本來我間房都尚算整潔，點知由Kiki入嚟一齊坐之後，就返唔到轉頭。
你有時仲會係間房嘅唔知邊個角度見到Kiki嘅Bra，哇真係好難唔令人有啲咩幻想。
但慢慢落去就習慣了，當睇唔到就得啦。
「聽日下就去高美濕地，夜晚你想去邊啊？」我一早沖好涼係張床度諗住瞓，Kiki都係張床度嘅，但係佢就涼都未沖，唔知幾時先有得瞓。
啲人話相處好同住難係真嘅，依家一齊住我先睇到Kiki更多唔同嘅一面。
「無啊，求其搵個地方去都得嘅。」
跟住我都無出聲，係度思考緊去邊好嘅時候，諗咗幾秒之後，Kiki無啦啦彈咗一句出嚟。
「不如落club囉？」Kiki輕描淡寫咁講，但對我嚟講係有唔少衝擊。
「下？」
「做咩無啦啦落club啊？」
「無啊，見無聊無嘢做，又想落去識下台仔囉。」以Kiki嘅姿色，落club一定識到好多台仔狗公囉。
「你都可以去識下台妹㗎，大家互相照應下姐。」
一嚟我見自己唔會想去喱啲地方，二嚟我都唔想Kiki落去，去到真係蝕底曬俾人。
「我唔係好鐘意嗰啲地方喎……」我嘗試婉拒。
「你未落過club？」Kiki認真問。
「係啊，做咩？」我不禁有啲怕醜，唔可以未落過club咩？我驚無面……
「唔係，估唔到你真係咁純情姐，哈哈。」Kiki放低手上嘅手機，望咗我一眼。
「咩姐，咁我真係唔鐘意啊嘛。」
「好啦好啦，依家喱個年頭好似你咁嘅男仔買少見少㗎啦，你都唔洗隨波逐流嘅，最多我咪自己去囉。」
「咁又唔得喎！」我好理直氣壯咁講，我有乜理由俾Kiki一個女仔落club先得㗎？
「你唔洗擔心喎，我自己搞掂喎。」
「你真係咁想落？」我再確認多次。
「係啊，我又未係台灣去過，而且落去麻醉一下自己都好嘅，話唔定有條新路呢。」
我係覺得落club嘅女仔唔方咩好女仔，係好女仔就唔會落club啦，喱個係我一路以嚟嘅諗法。
但喱一個點，根據我一路相處落嚟，Kiki又唔係啲咩壞女孩，只不過係思想比較前衛姐。
「我落囉！」我好肯定咁講。
「你唔好勉強啦，你陪唔陪我都無所謂㗎。」
我唔知喱個係咪Kiki嘅以退為進，但我又無蝕嘅，當係去見識下姐。
「我唔放心你一個人。」
「就好似今日咁啊，我都唔放心你自己一個出去玩，驚你自己一個係出面搞唔掂，驚你會悶。」
「更何況你依家自己一個去落club？」
語畢，我哋兩個靜默咗一陣，氣氛有啲僵硬，唔上唔落咁。
「你真係好好人。」
又係喱張好人卡，不過我又未表白，我當作係真誠嘅讚美。
「好人可以當飯食咩？」我苦笑著說。
「傻啦，我覺得可以做你女朋友一定好幸福。」接著，Kiki就玩返佢嘅手機。
我唔知Kiki依家講喱啲說話係咩意思，究竟佢係一時之間缺乏愛或者係安全感啊，定係單純咁認為啊，我捉摸唔透。
「係幸福我就唔會到依家都無女朋友啦，根本係喱一刻之前就唔會成功。」我講得好是唏噓，已經唔再強求，有就有，無就無啦，都無所謂啦。
「聽日去搵下咪知囉，等姐姐我帶你去見識世界！」Kiki向我戚一戚眉，拋咗個媚眼。
「你係幾時開始有落club？」
「我啊…？都好耐之前，以前有一次唔開心，嬲嬲地自己一個落去，去下去下都習慣啦。」
「你一開始唔驚咩自己一個。」
「驚㗎，驚唔知會唔會融咗，但有時衝動起上嚟就係咩都唔理㗎啦，有咩好怕？你都已經糟糕透頂啦。」
咁Kiki又有佢嘅道理嘅，自己亦都試過，反正都黑仔開㗎啦，唔差再黑多幾次。
「好啦，總之聽日唔會俾你自己一個啦！」
Kiki好似笑咗一下，然後迅速變成抿嘴，咳咗兩下。
「我去沖涼啦。」
係佢嘴角係藏起咗一記笑容，只不過嘴邊嘅角落咁啱探咗個頭出嚟，唔經意咁俾我睇到中。
第二朝我哋瞓到自然醒，起身已經係中午一點鐘。琴晚佢搞掂埋啲嘢瞓已經係凌晨4點幾。
我早過佢起身，條友仲瞓緊，於是我起身梳洗，搞掂曬啲嘢佢都仲瞓緊。
最撚屌嘅係，條八婆原來有鼻寒聲。
依家仲瞓到殺豬咁，係咁扯鼻寒，如果我依家錄佢片再放上佢ig，應該完全顛覆佢女神嘅形象，哈哈。
諗起佢喱一幕就覺得好鬼好笑，之前嗰幾晚都無，係琴晚有囉，我諗Kiki真係太攰。
但喱一幕真係唔可以錯過啊，我靜靜地坐係佢床邊觀察Kiki睡姿。