《好地地，我做乜鬼無啦啦帶個港女Friend嚟台灣特訓？》: 【8】散心III
我由佢影，已經講到口水都唔想浪費了。我自顧自睇風景，好好欣賞喱個短暫嘅時光。
本來摩天輪係幸福嘅，好多情侶都係甜甜蜜蜜咁走入摩天輪入面，一齊睇美麗嘅風景，一齊感受與世隔絕，只屬於兩個人嘅空間同時間，一件多麼浪漫嘅事。
如今我哋坐入面，享受緊啲尷尬氣氛，佢就為咗影相扮無事，扮開心，其實呢？
放低部手機之後，表情全部都係崩緊一齊，有時我都唔明為乜。
可能每個人宣洩方式唔一樣㗎？
抱住老娘就係日日都開開心心去旅行，老娘過得好好嘅心情去話俾個男仔知，等個男仔後悔？
我猜，大約係咁嘅心情掛？一種自欺欺人嘅開心。
「喱度行一陣之後去逢甲？」落咗摩天輪之後，我問Kiki。
其實佢講得出唔執著同我係咪男女朋友咁坐摩天輪，係因為佢點都想影靚相po上去掛？
但我就寧願無同佢坐過，仲好。
我同Kiki係outlet行完，佢買咗件衫，見無咩好行，就話不如去逢甲。
「逢甲係咪嗰個好大嘅夜市？」Kiki淨係聽過下個夜市，而且佢對街市嘅印象就係好多嘢食。
「um……都係嘅，好多嘢行囉。」
「咁去囉！我哋去掃街。」Kiki一臉興奮。
我再打開佢ig story，哇頂你啊，上面啲線細到呢，俾我真係一半都睇唔落去。
最後我係全部睇曬嘅……
「依家去仲好早喎。」我望一望個錶，依家先5點幾。
「反正係度又無嘢做，早啲去早啲返去啊嘛。」
既然佢都講到咁，咁咪早啲去囉，順便睇下可妮有無返工先。可妮佢返緊野飲鋪，台灣好多大學生都係去啲野飲鋪返part time，所以通常你都會見到啲野飲鋪啲人好後生，有啲鋪頭仲要專請靚仔靚女添，都係吸引生意嘅一種嚟嘅。
我哋用咗一個鐘頭搭車兼搵路，台中唔似香港同台北咁方便，有地鐵。喱度去逢甲都要轉兩次巴士，無做返咁上下功課都要搭的士啊。
好彩我識路。
逢甲我都唔知行咗幾多次，就好似香港人點都會識銅鑼灣一樣，點都有嚟過。
我去咗睇下可妮間野飲鋪，就係逢甲大學門口前面條路，轉個靚彎就到。
我企係遠處望下佢係咪間鋪度。
「喂！你做咩啊？」Kiki睇唔明我做咩。
「睇下嗰個女仔有無返工囉。」我鬼鬼祟祟咁講，「依家好少人，佢可能會發現到我㗎。」
「你驚咩姐？掛住人就去搵人啊嘛。」Kiki講到十分之響亮。
「噓！」我忍唔住捉住佢膊頭，「你細聲啲洗死咩？」
「都唔知你驚乜，男人老狗有咩好淆姐。」
「啊……你依家就識得大大聲話我，你咁有膽啊，就搵返你個ex講啊嘛。」我怕語氣會太惡，串親佢，已經溫和啲串佢。
「我係女仔，點同姐。你堂堂一個大男人，要偷自己心上人，似咩樣啊？」
我知Kiki都係為我好。其實我都知，我應該進取啲先係，但好多時現實唔係你想點就點……
「我知，我咁樣做好廢，但我都唔想咁廢㗎，我只不過係一個小毒撚，何德何能啊？」
「平時幫你俾意見，聲大夾惡咁樣話你，但真係到咗自己落場呢？你試諗下，平時啲教練聲大大咁屌柒啲隊員，但如果佢自己真係操刀落場呢？真係落到場就唔係咁講法㗎……」
Kiki開始明白我，「咁又係，我叫你放膽去，但俾著我自己，我依家都無咁嘅勇氣放膽去搵返佢。」
我遠處望住可妮，佢依家好忙咁打理間鋪，入面得佢同另一個係度執緊嘢，一副全黑打扮嘅佢，都掩蓋唔到佢嘅可愛。
見佢咁辛苦係度做嘢，更加令我有種想保護佢嘅衝動。
「佢屋企好窮，係台灣咁樣嘅家庭好平常，至少可以自力更生，唔知係咪因為咁，養成佢咩都靠自己。」我向Kiki講出可妮吸引我之處。
「搞到我成日都唔知點樣親近佢好，我向前行一步，佢就同我後退一步，漸漸地我都無咗接觸佢嘅勇氣。」
我再掃一掃Kiki全身，er⋯⋯我嘅意思係上下望一望Kiki全身。
再同Kiki講，「你睇下你啊，學下人啦，唔好成日靠男人先得㗎。」我挑釁佢。
「咩……咩姐！我依家好靠男…男人咩？我……」
「我都有靠自己囉！」Kiki講成句都講到口窒窒咁，丁點自信都無。
「唉，算啦，叫你一時三刻做到係難㗎啦，至少俾你知道喱個想法姐。」
「我哋都唔同類型，好似佢咁獨立嘅女仔，我諗我做唔到。」
「做咩啊？咁快認輸啦？」
「認輸嗰個係你咋掛？」Kiki反客為主，調返轉頭插返我一刀。
「我？幾時有啊？」
「你追都無追就認輸囉。」
「……」我唔知點解自己唔反駁Kiki，一時之間說不上話。
「你以為就咁企係遠方，默默地付出，人哋就會感受到？」由Kiki喱位港女講出口，令我覺得好不可信。
但佢的確無講錯到。
「一陣你就明㗎啦。」
「明？點解啊？」Kiki不明所以。
「你去行下街啦，等多陣你就知。」一時三刻都解釋唔到咁多，總之佢睇咗就會明啦。
Kiki走咗入去一間格仔鋪度睇，而我就係同樣嘅位觀察住。
有時諗落，自己都好傻，一路等住一段唔屬於自己嘅幸福。
過咗大約10分鐘，佢終於嚟到，於是我sd 個whatsapp叫Kiki出嚟。
「做咩？得啦？」Kiki收到whatsapp好快就出嚟。
我無出聲，直鈎鈎望住可妮嗰個方向。
係可妮面前，一個男仔買咗個麵包，遞俾可妮。可妮先是一臉驚訝，然後笑容滿臉地接過個男仔買嘅麵包，露出一個甜甜嘅笑容。
只見佢哋開心地講咗幾句，可妮係個男仔臉上留下一記吻跡，幾句過後，個男仔就消失係我哋眼前。
望住個男仔離去，自己只能夠呆咗咁企係度，咩都做唔到，既無奈，又嬲自己。
望住可妮一副甜蜜嘅笑容，喱啲嘢我的確俾唔到佢。
「我都唔知點講你，我自己感情事都一樣好糟糕，但見到你咁，真係唔知話你傻仔好定戇居好。」Kiki講完之後，我無出聲，因為我就係咁，面對自己鐘意嘅人面前......
膽小、懦弱、淆底，唔敢正面咁去面對自己嘅感情。驚囉，驚失敗，驚最後咩都無。
我同Kiki陷入短暫幾分鐘嘅沈默，然後佢就粒聲都唔出咁慢慢向前行。
「喂......你做咩啊？」我問Kiki。
過幾秒之後我就明啦，Kiki向前行嘅方向，係可妮嘅方向嚟。
我呆咗咁企係度，我好想走，我好驚俾可妮見到，甚至乎有啲嬲Kiki，佢做咩事咁多管閒事姐！
後尾見到佢只不過係買杯野飲，而可妮都無發現到我，我先無咁驚。
最後Kiki買咗杯野飲，走返過嚟，我即該拉住佢走。
「做咩姐你？」Kiki面不改容咁問我。
「係我問你先啱啊？你做咩無啦啦走去買姐，你知唔知你嚇死我啊？」我嬲嬲地咁同佢講。
「買杯野飲姐，有咩好驚？」
「驚俾佢發現囉！」
「之前中學嗰陣，甚至到依家，我都唔覺得你咁膽小，雖然你有時係戇鳩鳩咁，但有時真係幾man嘅，但依家你真係......」
「咁......點同姐，係自己鐘意嘅人面前，我就係咁㗎。」
「算吧啦你，你咁樣一路等囉，睇下等唔等到佢主動同你講話鐘意你，想同你一齊？」
我真係發夢都估唔到，我會當住街咁樣俾Kiki咁樣教訓。
「咩姐！男人嘅浪漫你識啲咩啊？」我唔知係因為我唔甘心俾Kiki咁樣教訓啊，定係俾藉口自己，但我知自己係唔想承認喱件事。
「唉......算。」Kiki嘆一口氣。
「可能愛情喱家嘢就係咁，無論你係咩人，踩咗落去之後，個個人都一樣。」
「我同可妮，係我一到台灣第一個識嘅台灣女仔。」
我同Kiki搵咗個泰式餐廳，坐低慢慢食之餘，開始講起我同可妮嘅相遇。
嗰陣時我啱啱過到嚟台灣，有別於你過嚟旅行，係你捨棄香港好多嘢，隻身走嚟台灣。
講真，當時係想過嚟之後唔想再返香港，香港都好多朋友走得就走，知自己考到垃圾咁樣，就疊埋心水過台灣算。
只不過初到步嘅我，咩都唔識，無人無乜，朋友都唔多個。
有啲一齊過嚟香港朋友，都仲未熟到，不過知道有啲女仔啱啱嚟到仲要晚晚以淚洗面，因為習慣唔到喱邊嘅生活。
過嚟無幾耐，基本上日日都好快過，識新朋友啦，有香港，有澳門，通常喱啲都係識得最快，跟住落嚟就係識啲自己系嘅。
我哋系上面有安排啲迎新活動，都係俾我哋識下朋友，搵下自己堆，開始個個都建立到自己堆，我都係嗰陣識傑克。
有時識朋友都好睇直覺，嗰陣真係直覺行頭，就係咁覺得傑克幾好人，可以做到朋友，然後就越嚟越fd。你問我有無咩原因，真係無，連點樣fd到都唔知。
係喱一個禮拜當中，有好多林林總總嘅活動俾你去識班上嘅同學仔，可妮係班上數一數二嘅靚女嚟。
可妮係嗰種好可愛，好台灣女友feel嘅女仔，當然把聲唔爹啦，但表情、同埋嗰種天然呆嘅氣質好吸引到我對佢嘅注意。
當然班上面仲有其他好靚嘅台妹啦，但最吸引我嘅，都係可妮。
其實仲未有機會同佢接觸㗎，成個禮拜我只係默默地關注緊佢，我由一開始嘅時候已經輸咗。
因為我一開始嘅時候已經好膽小，就連之後迎新營大好嘅機會都錯過埋，就算俾人話我抵死，我都無得反駁，因為連我自己都咁覺得。
跟住無幾耐，我哋就有迎新營，姐係香港嘅Ocamp，我哋係由五個系一齊搞，所以時間會俾其他系嘅Ocamp早。
我一早就收到我嗰組嘅組員名單，無邊幾個識......
我識嘅就係傑克同埋其他幾個男仔啦。
「喂，港仔！你那組有沒有美女啊？」佢哋都好鐘意用港仔叫我，一開始係有啲反感，不過叫叫下就慣啦。
「不知道欸，都不認識。」我無奈地同佢哋講。
「我跟潔薏一組欸！超棒的，哈哈。」睇到呀傑克一臉好爽嘅樣，都登佢開心嘅。
潔薏係我哋班上最靚嘅班花，有樣有腳有波仲要有埋屎忽，難怪佢會興奮嘅。
但一樣嘢足以打破曬所有優點，就係佢有男朋友。
得啦，幾興奮都無撚用。
佢男朋友仲要係高中校隊隊長，高大又靚仔，係好匹配嘅一對。
忽然間我醒起一樣好重要嘅事。
「欸，你們知不知道那個......」死啦，我仲未知佢叫咩名。
我大概形容下可妮嘅特徵啦。
「哦，你知那個滿可愛的女生？」我估傑克知我想講邊個。
「對啦對啦！就是她，她叫什麼名字？」
「怎麼？嘻嘻。」傑克對我壞笑，好核突個死人樣，「對她有意思？」
「沒有啦，只是想知道而己啦。」我唔想咁快就講咁多。
「好啦，哥懂，哥懂。」接住落嚟就聽到傑克哈哈大笑。
「她叫趙可妮，現在還沒有男朋友啦。」
「她以前讀女校，所......」
咪住先！咁熟嘅個名？
我再睇返個名單，發現「趙可妮」喱三隻字大大隻咁寫係我個組上面。