《好地地，我做乜鬼無啦啦帶個港女Friend嚟台灣特訓？》: 【7】散心II

「真的假的？」可妮係我係台灣鐘意上嘅一個女仔，我想追佢㗎，但佢實在太難追……
 
點解？因為佢太過於獨立。喱個評價唔單單係我，其他人都係咁認為。
 
基本上，可妮生活係唔需要男人，咩事都自己搞得掂，我有時見佢辛苦，想幫輕下佢，卻經常俾佢拒絕，話自己可以解決得到，做咩要靠人哋？
 
唉，連做朋友，親近都覺得難，更何況要一齊？
 
「真的啦，騙你幹嘛。」
 


「那她在哪裡做？我偶爾可以去看她一下。」我認真。
 
「誰是可妮？」Kiki搭唔上話，跟住八卦一下。
 
「你不知道嗎？」傑克有啲奇怪，以為我哋咁好朋友，竟然會唔知。
 
「Kiki她還不知道啦，香港那邊的朋友都不太知道我的感情事啦。」我不嬲都會將兩邊嘅嘢分返開，咁樣無咁煩。
 
「可妮就是于安喜歡的女生啦。」傑克臉帶笑意。
 


「哦，就是她喔？」Kiki個八卦樣，做到出曬面。
 
「對啊，你知道？」
 
「無啦，只事有講過DD啦。」
 
我笑咗出嚟，佢講普通話真係好好笑。
 
「你想知道的話，我可以講給你聽喔～」傑克調皮咁講。
「喂！」我知道佢都係講下笑，循例上都要扮下嘢嘅。


 
「哈哈！開玩笑啦，怎麼了？不能講喔？」
 
係我哋閒聊嘅時候，我哋嘅餐點亦啱啱好上嚟。
 
「你們的餐點都到齊囉。」服務生好有禮貌咁講，個心聽落都舒服好多。
 
而且大部分都好有禮貌，唔似得香港周不時都西口西面嘅。
 
「無餐具嘅？」Kiki一臉奇怪咁講。
 
「啊，台灣啲餐具係要出去自己拎㗎。」正當我解釋嘅時候，我期望緊Kiki係會出去幫手拎下，因為佢係坐最近餐具嗰邊嘅，由佢去拎係最為方面。
 
但Kiki不為所動。
 


「做咩啊？你哋唔係去拎咩？」琴日先覺得佢無咁港女，依家又犯病啦。
 
「我去拿吧。」傑克睇得出咩事，自己主動話去拎。搞到我勁唔好意思，唔知點好。
 
喱一點要記落嚟，遲下同佢講，喱啲咁港女嘅行動真係想佢改曬佢！
 
除咗拎餐具要我哋拎，就連埋單都一樣係咁理所當然。
 
最後係我俾埋Kiki嗰份，我廢事要傑克難做人。
 
本來中學嗰陣Kiki都無咁過份，係到近喱一年，我半年左右返一次去，佢都已經係咁，等我去埋單。
 
我嗰陣未意識到咁嚴重，心諗一餐半餐無咩所謂啦，但依家好似唔係咁了。
 
你最後問返佢拎錢又唔係，唔問佢拎又唔係咁，唉…



傑克臉上露出尷尬嘅表情，但喱個表情無係佢臉上停留好耐，一陣間就無咗。
 
然後佢就自動自覺拎錢出嚟，然後客氣咁同我哋講：「你們難得來到，這一頓就我請吧！」
 
「那……怎麼好意思？」我偷瞄Kiki一眼，見佢無任何動靜，成件事好理所當然咁。
 
我到依家都唔明點解會有喱種心態出現，成個腦都係問號。
 
如果你係覺得男仔出街係理所當然咁要俾錢，咁女仔係咪都要理所當然咁俾男仔屌？
 
咁唔係㗎嘛……
 
「沒關係啦，我偶爾請一下有什麼所謂。」
 


「謝謝啦。」Kiki有禮貌咁講。
 
傑克埋完單之後，佢話有事要走先，咁喱樣唔係因為怕咗Kiki先話要走，而係佢本身真係有事，一早同我講咗㗎啦。
 
我哋互相道別之後，我就諗住帶Kiki去麗寶樂園玩下。
 
「一陣去邊啊？」Kiki好似咩事都無，仲好開心咁同我傾偈。
 
但我真係忍唔到，我決定點都要同佢講一次，我唔想佢再繼續咁落去。
 
你話我八婆又好，多管閒事都好，我只不過想為佢好，喱種價值觀真係唔好。
 
「麗寶。」我冷冷地道。
 
「咩嚟㗎？玩咩㗎？」依家又成個細路女咁，但此刻我只係更覺得佢港女。



「…….」我無理到Kiki，肚入面有氣，我要Kiki知我嬲。
 
因為做朋友咁耐以嚟，我都未試過嬲佢。
 
應該係話，我好少會對朋友發嬲，雖然唔係啲咩大毒撚，係毒撚界我資歷尚淺，但我平時都毒係屋企，同普通毒撚一樣，打機，得閒睇下AV打下飛機。
 
所以Kiki見到我唔出聲，嬲爆爆咁款，佢都嚇親。
 
我哋等緊直通巴士去麗寶樂園嘅期間，都有成十幾分鐘時間，過程中我一句嘢都無同Kiki講過。
 
直到上咗車，Kiki先戰戰兢兢咁問我。
 
「你……無咩事啊嘛？唔開心？」
 
我好撚霸氣咁無理佢，做男人，一定要硬！
 
企硬！
 
「你……嬲我啊？」Kiki小心翼翼地問。
 
我無答到佢。
 
「咩事啊，你講啦。」急性子嘅佢，終究係忍唔住喱種冷空氣。
 
「你啊，唔可以再成日咁理所當然咁要男仔幫你做喱樣做嗰樣，更加唔可以理所當然咁要男仔幫你埋單。」我見佢咁有誠意，就同佢講。
 
「哦，你就係咁樣就嬲？乜你咁小氣㗎。」哇，估唔到我俾佢話返轉頭。
 
「小氣？我都係為你好咋。」
 
「男仔不嬲都係咁㗎，同親我出街嘅男仔都會主動幫我埋單，唔係我講㗎。你睇下啦，頭先都係傑克主動話要埋單嘅。」Kiki唔單止理所當然啊，講都講得理直氣壯。
 
哇，一時之間我都真係唔知點反駁佢。
 
我平心靜氣冷靜咗幾秒之後，「Kiki，其實頭先傑克係好唔情願㗎你知唔知？」

「有咩？我見佢笑得好開心喎。」Kiki仲笑笑口咁。
 
「係咩？唔通人哋發你脾氣落你面？」Kiki佢對朋友好無錯，但係異性面前，就係一名港女。
 
有啲人啱做朋友，但唔啱做情侶。
 
「咩喎，咁人哋都慣啦…….」佢發現駁唔贏我，然後又出女人嘅絕招。
 
扮可憐。
 
大多數男人都會受喱招嘅，建基於佢對你有意思，覺得你應該受到人憐愛。
 
但唔好意思，依家老奉咁款，我覺得唔需要啲咩憐愛。
 
就算上連登開post，問全能嘅連登仔，佢一樣都係會俾人狠狠地屌。
 
「我係想你唔好再咁樣落去，你頭先咁樣好容易嚇走啲好男仔㗎。」我見佢態度軟化落嚟，我都無謂再得寸進尺，得饒人處且饒人。
 
「咁人哋請係人哋紳士喎，我接受都正常姐。」
 
「我同你講，無一個男人會拒絕一個女人食完飯後俾返錢佢。」
 
「佢最後收唔收係另一回事，但你係男人嘅心目中已經加咗分，覺得你係一個賢慧嘅女仔，唔港女。」
 
「認真啊，你咁大個女，真係無俾人話過你港女？」

Kiki思考良久，先吞吞吐吐咁擠出一個「有」字。
 
「咁咪係囉，你自己都知啦，但又無反省過。」我不留情面。
 
「咁唔係點姐，我又唔知點做，你就淨係識屌我……屌囉屌囉，咁鐘意屌我，俾你屌啦！」
 
Kiki激動得制，搞到大聲得制，搞到嚇親車上面啲乘客，然後搞到佢哋望住我哋兩個。
 
好彩喱度唔係香港，聽唔明廣東話，如果唔係聽到頭先嘅對話應該會報警。
 
「唔好嬲唔好嬲，我點會屌你啊？」調返轉我叫Kiki唔好嬲都有嘅？
 
「所以你放心啦，你嚟台灣，我會徹底剷除你身上嘅所以港女格。」我拍曬心口保證。
 
「但有時真係習慣咗啊嘛……」
 
「知啦，鬼叫你靚女咩？咩都俾人寵慣曬。」
 
「咁……你係咪唔嬲我啦？」算Kiki有良心啦，仲識得關心我。
 
「我嬲你都係因為你嗰個行為實在唔好，搵個方法令你聽得入耳姐。」
 
「啊……你！」Kiki大大力扭我手臂，「好啊！玩我啊嘛？」
 
「痛痛痛……」睇Kiki身型纖瘦，但用起暴力上嚟，唔輸俾啲黑警。
 
「邊有啊，係同你去玩啊。」我投降。
 
「總之呢，你聽得入耳就得啦！」

我哋嚟到麗寶outlet，喱度有個好大嘅商場，隔離就係遊樂園，入面有玩水嘅設施。
 
「點啊？你去唔去樂園玩？」我一落車就問Kiki。
 
「麻麻地咋喎，我想影下相行下街咁啦。」
 
我指一指出面，係條馬路出面，一堆人係度影緊相。嗰度就係打卡聖地，基本上嗰度影相係最靚。
 
「嗰邊係影咩？」
 
我直接開ig俾佢睇相，類似係嗰個角度嘅相，Kiki一睇完之後，就捉住我手臂。
 
「行行行！如果唔係唔知要等幾耐啊！」女人為咗影相可以去到幾盡？
 
就算Kiki戒得到第一樣港女格，佢仲有其他港女格要改。
 
算啦算啦，話完佢之後，我都已經曬咗唔少腦力。
 
就下佢一次咁多，係度排住隊影相，係排隊嘅同時，我都有就下角度，睇下後面影唔影到。
 
麗寶出面係有好多彩虹色嘅建築，跟住上面有一個架係頂樓嘅摩天輪，係真係幾靚嘅。
 
「好啦。」我影到Kiki女神級咁。
 
「哇！唔掂喎。」Kiki一臉嫌棄。
 
「咩唔掂啊？咪影到你隻腳掂到底線，42寸長腿咁囉，咁仲唔掂？」我心很累啊。
 
「你睇下我個樣，我個樣都扭曲曬，都未準備好！」
 
係其他人眼中，應該都會以為我係Kiki男朋友，仲要係好廢嘅港男，俾Kiki咁樣插法，下下到肉。
 
「好，我再影多次啦。」慢慢試下試下，就到我哋企係最前影，亦係一個最好嘅角度。
 
由Kiki企好位之後，我就狂㩒快門。

我影咗好多張相俾佢，「影咁多，實得啦？」我抱住喱個想法去俾部手機佢，十足十中學生交作文咁，求其寫夠字數交出去嘅作品一樣。
 
「好啦好啦，得㗎啦，廢事要後面啲人等。」咁佢又衰唔曬，識得顧下人感受。
 
其實港女最大嘅唔好嘅地方就係，唔理人感受。
 
所以，當港女開始理人感受嘅時候，就係佢哋脫離港女魔掌嘅時候。
 
「咁點啊？有無滿意㗎？」
 
「你影成二百幾張喎，唔滿意都覺得你有誠意啦，係咪啊？」
 
「你仲要幫我影㗎！」Kiki指一指天上嘅摩天輪。
 
「唔撚係掛？」我覺得去坐摩天輪係好，但仲要影嘅話，我怕我會有審美疲勞。
 
「個摩天輪真係好靚啊，而且都好少有機會坐咁高嘅摩天輪。」Kiki一時港女一時細路，貪玩到乜咁。
 
「好！我都未坐過喱一個，我上次係坐過高雄嘅摩天輪。」
 
跟Kiki就行入個商場度，一邊行一邊睇相。

Kiki隻眼都無望過我，淨係掛住望部手機。唉，算啦，都慣㗎啦。
 
我哋直接去搵摩天輪，係排隊嘅同時，對面全部都係成雙成對。
 
頂，睇到都覺得尷尬，再望一望後面排隊啲人。
 
一撚樣……
 
「不如走囉？」我唔知邊度嚟嘅膽量，夠薑叫期待已久嘅Kiki講喱句說話。
 
「走？點解啊？」Kiki放低手中嘅手機，正視我雙眼。
 
「你睇下啊，喱度咁多人，咁多個都係情侶嚟㗎喎，我哋咁樣好尷尬㗎嘛。」
 
「邊個話朋友就唔坐得摩天輪㗎？」Kiki好是執著。
 
「唔係呢，嗰種感覺就好似情人節啊，聖誕節出街，出去都成雙成對咁，自己就隻身街出去。係無嘢，係無咩唔得㗎。人哋嘅世界咩都有，而自己咩都無姐，覺得自己慘姐。」
 
「咁你咪當住我係你女朋友，陪我坐一陣摩天輪囉。」
 
「咁係上面……嘻嘻嘻！」我開玩笑地說。
 
「食蕉啦你！死人咸濕仔。」
 
「陪我坐陣啦，想見下好風景啊，又係你話陪我嘅！」
 
「係啦，陪咪陪囉！」
 
上到摩天輪，都一樣見到前後車廂情侶一對對，而我眼前嘅Kiki呢，就拎住相機係咁影。
 
佢話想見下風景，其實唔係用「眼」睇，而係用「手機」睇姐。
 
正如我一開頭所講，po相並唔係想俾其他人睇，而係想俾一個人睇。
 
嗰個人，往往係令你感到傷心嘅嗰一個。