《好地地，我做乜鬼無啦啦帶個港女Friend嚟台灣特訓？》: 【6】散心
講下講下，我哋就靜咗落嚟，無幾耐我都聽唔到咩聲，就瞓著咗。
第二朝我哋瞓到自然瞓，我醒咗都Kiki都仲未醒。我一起身望到Kiki，本來仲有睡意嘅我，擰轉身見到佢就成個人醒曬。
琴日嘅回憶都湧曬出嚟，成個人清醒曬。
不得不說，Kiki嘅睡姿真係好小朋友，攬住我放係床邊嘅喬巴公仔瞓，劈大個口得個隆，搞到我都忍唔住笑咗出嚟，霎時間覺得，如果Kiki做我女朋友都唔錯喎？
你諗乜鬼啊？你心入面明明仲有可妮㗎，你真係呢！
我間房係無廚房，你朝早想食早餐啊，要自己唔係唔得嘅，要自己去買器材返嚟整囉。
所以直接落樓下買係最快。
我梳洗好之後，就落街買早餐，以我對Kiki嘅了解，佢同我都差唔多係垃圾口嚟，食唔慣啲咩高級嘢，買咗啲我認為佢鐘意食嘅嘢返去。
當我返到去嘅時候，Kiki已經起咗身。
「起咗身啦？」我仲以為佢會有排瞓添，琴晚佢實夜過我瞓。
「你出門口已經嘈醒咗我啦。」Kiki坐係張床度玩手機，真係手機不離身嘅人。
「買咗早餐俾你食啦，快啲落床食啦。」我將啲嘢食放係張Ikea枱仔度。
「咁好？」Kiki即刻好興奮咁沖落嚟，「哇，係台灣早餐啊！」
見到佢好似小朋友咁，我都開心嘅。
「你買咗啲咩俾我啊？」小瑤雀躍咁係咁摷嚟睇。
「嗱！嗰袋啊。」我指一指俾Kiki睇。
佢打開完之後，就開始港女啦，「下？我都唔食蛋，又唔飲豆漿……」一臉嫌棄嘅表情。
「你真係呢，港女嚟㗎喎你。」啊，買埋俾佢仲嫌三嫌四，真係呢！
「唉我同你換啦，你食我嗰份。」
「你嗰份咩嚟㗎？」佢完全無視咗我話佢嘅嘢，淨係掛住食。
「哇！有小籠包喎，我最鐘意食㗎啦！」真係挑剔……
「係啊，好似你個波咁囉。」我一時口快快…….
「屌你啦！」Kiki好大力咁一嘢拍落嚟，「我以碼有B囉！」
其實我都知，都係串下姐……琴日揸車都feel到嘅。
「係食就食快啲啦，一陣約咗個台灣朋友帶你出去玩。」我催促Kiki。
「下？你唔同我講嘅？」Kiki啱啱啪開隻筷子，諗住開餐，點知俾我喱句搞到呆咗係度。
「叫個fd嚟帶你去散心仲想點啊？我fd好好人㗎，你唔好蝦人添啊。」我先小人後君子咁講。
「你早啲同我講等我有啲心理準備啊嘛！加上我依家又未化妝未襯好衫！佢幾時嚟啊？」原來佢係擔心自己個樣……
咁又係嘅，第一印象咁緊要，尤其是佢依家失戀緊，任何男性對佢嚟講，都可能係下一春。
「無咁快你放心啦，我約佢晏啲去食個早午餐，所以喱個早餐食少少就好，係俾你試下台式早餐咁咋。」
「快！依家已經9點啦！」佢用行動嚟話俾我知咩叫快。」
跟住佢就全程開始整理緊佢自己，我坐係張床度食花生打機。你知男仔㗎啦，出個街洗幾耐姐，但女人唔一樣，出街好似打仗咁。
佢先係吹頭整理咗個頭髮先啦，跟住又要電下頭，我唔知佢個喼邊得嚟咁多位，仲要裝埋啲衫啊化妝品，成個百寶袋咁。
接住落嚟，就係重頭戲啦，喱個變身嘅過程都有幸俾我見到。Kiki執好曬佢頭先食早餐張枱，將啲化妝品放曬上嚟。
上面啲顏色，你無返咁上下功力，你根本分唔清。
等佢襯埋衫最後再加工一下，前前後後大約個半鐘至兩個鐘左右啦。
犀利犀利！我都唔知打咗幾多鋪機，夠我爬一個排位了。
我哋出發去餐廳嗰邊，我個fd都去緊啦。
我哋都係揸直路，由台灣大道一路揸落去，我後面嗰個已經坐到無曬感覺咁，仲好自然咁玩緊手機，錄緊ig story。
「WOW!!!!!」揸揸下車，Kiki係我後面鳩叫。
「你嚇鬼死我咩，揸緊車㗎嘛。」
「無啊，啲電影都係咁樣嗌㗎啦坐電單車。」
「係啊係啊，咁你係咪上親郵輪都要講you jump I jump啊？」唔知咩邏輯嚟，好新鮮。
「你理得我啊！」我原以為佢咁樣會收手唔叫，點知仲繼續嚟，一邊鳩叫一邊拍片。
我哋去到嘅時候，我朋友已經到咗。
「嗨，你很早到喔？」我用熟練嘅台式普通話同我朋友講嘢。
基本上台灣嘅普通話係無捲脷音，所以講嘢輕快好多，間中夾雜下啲台語咁樣，就好似我哋講廣東話都要夾雜啲英文一樣。
「沒有啦，剛來沒多久。」傑克好客氣咁講。
「啊，這是我朋友，Kiki。」果然Kiki今日悉心打扮係有用㗎，Kiki打扮完係真係女神咁款嘅，我觀察到傑克望佢嘅眼神係不一樣。
男人係比女人更為膚淺嘅物種嚟。
「李好，我事Kiki。」Kiki佢今日無琴日咁膽小怕事，驚驚青青咁講普通話。
但咁就出曬事。
佢唔知拿來嘅自信，諗都唔諗就講出嚟，仲要講到一臉自信咁，不禁令我諗起古天樂講嘅普通話，加上謝霆鋒嘅自信。
「喂……」我想細細聲提下佢，但已經嚟唔切了。
「你好，我是傑克。」傑克佢笑笑口咁回應返佢，相互握個手。
反而我好似個局外人咁企咗係度，搞咩啊大佬……？
傑克用一個男人先會明白嘅眼神望一望我，同樣係男人嘅我，唔難明白佢嘅意思。
傑克：這妞很可以喔！
雖然佢成個人望落去係比較咸濕，佢亦都唔介意將喱啲真性情表露出嚟，但我知道佢係唔做啲咩咸濕嘢。總好過啲男仔，睇落正正經經，但其實內裏收埋一隻淫獸。
「這個餐廳很不錯的，很多網美也會來喔。」傑克介紹著這家餐廳。
環觀喱間餐廳，係好有feel，喱類型嘅餐廳台灣都好多，好文青風格。
淡黃色的燈光，配上一些古老的擺設，係擺設嘅中間，會擺放一啲綠色植物係度，望落更加自然。
我第一次去喱類型嘅餐廳嘅時候，我以為佢好貴啦，裝潢咁別緻，點知一打開菜單，只不過百幾兩百台幣，你除返開都係四五十港幣。
你依家去茶餐廳食都差唔多喱個價啦，但喱度更加有feel，服務更加好，嘢食亦好食。
不過食得多，都係會想食返香港本土嘢。
「哇！好平喎。」Kiki驚訝地說，佢嘅反應係我意料之內啦。
「啊，我事講很平宜。」Kiki笑笑地同傑克講。
唔知點解，我心入面有陣酸酸嘅味道。
喱種酸唔係對Kiki有非份之想嘅酸，而係佢哋兩個都係我好朋友，依家佢哋fd到我應該開心先係，但好幾次嘅無視同埋只係在意對方，而冷落咗我。
搞到我心酸酸，不是味兒。
「對啊，這邊我覺得滿划算的。」傑克個死仔，明明同我就唔係咁正經，係靚女加上新認識就扮曬正經咁！
「對了，你打算在這邊玩多久？」
「三個月吧。」
男人係認真嘅時候最有魅力，女人呢？我覺得係對佢有意思嘅男人面前，先最有魅力。
「哇，好久喔！」
「她是來散心的啦。」我幫Kiki解答。
「怎麼了嗎？」傑克關心地問道。
「我唔識點講，你講啦。」Kiki一臉尷尬，條友終於頂唔順啦？唔係好有自信嘅咩？
我擺出個勝利嘅笑容，得得戚戚咁望住佢。
「沒有啦，她就被戴綠帽，一氣之下就來了。」我幫Kiki解釋，成為佢嘅代言人。
「下？這麼正也會被綠帽嗎？不會吧？」傑克有啲唔係好信，瞄了我一眼，再瞄一瞄Kiki，眼神盡是懷疑。
我哋點下頭，以示無呃佢。
「好啦！你們有事盡管找我吧，可以幫的一定幫！之後有空就帶你們四處走走。」
「我到現在還沒忘記他。」Kiki認真咁講，就算佢唔講，喱啲事我都知。
「慢慢來吧，忘記一個人不是容易的事，沒經歷的，不算完整的人生，對吧？」傑克笑說，喱啲就係男人。
沈重嘅心情，只會放係心底，偶爾先會由心入面鑽少少出嚟。
「對了于安，我聽姿欣說，可妮找一份飲料店的工作欸，在我們學校附近。」