《好地地，我做乜鬼無啦啦帶個港女Friend嚟台灣特訓？》: 【5】談心II
「點解啊？」喱句說話係我今晚聽得最多嘅一句說話。
「我記得張小嫻一本書講過，容易忘記嘅人係幸福嘅，記性好嘅人反而痛苦。」詳情我唔記得係咩書啦，但我對喱句特別印象深刻。
「因為我哋念舊，成日懷憫過去，唔捨得走出嚟，一直放係心入面。但人哋？早已將當初嘅事放低、忘記了，去開展下一段感情，而我哋仲傻傻企係原地。」
我講完之後，我望下Kiki，佢已經係一個醉醉地嘅款。左右搖下搖，同一個啱啱瞓醒嘅人無兩樣。
很好！真係屌你個老母，講完等於無講過一撚樣。好明顯條友仔都無聽到我講乜㗎啦，真係俾佢搞到少少燥。
最後咪又係見到佢個sad樣嬲唔落，高form到依家，大大話話都識咗5年幾，我都係第一次見佢咁嘅樣，無可否認佢今次真係用情好深。
我見佢開始唔得啦，但仲死都話要飲，後尾就拉佢返屋企。
Kiki係酒吧出嚟之後好返啲嘅，唔知係咪因為俾風吹兩吹，佢成個人有返精神。
「做咩啊？做咩出…出…出咗嚟啊…啊？」Kiki死唔斷氣，「返…返去繼續飲啦！」
「走啦！仲返咩去啊？」我都係第一次拖住個醉漢返去，仲要係女仔，當中少不免會抽水啦，但今次好似無朝早坐摩托車咁激。
「唔返啊！我要繼續飲！」一般醉酒佬會做嘅嘢，佢都差唔多做齊啦，除咗嘔。
「好好好，返去我度再飲好無！？」我一氹二帶，拖住佢返去。
咁佢最尾都俾我勸掂，但奇怪嘅係，我以為佢已經醉到傻，但去到屋企樓下嘅時候，就清醒返，雖然講嘢仲係鳩下鳩下，但係又有文有路。
「返到去我要沖涼先啊。」佢好似無事咁喎又，我摸唔透。
竟然佢都講到咁，我咪由佢囉，係我印象中，女仔沖涼係麻煩啲㗎啦，我沖涼話咁快就出嚟啦，洗幾耐姐。
係Kiki沖涼期間，我照舊整理下間房，我不嬲都唔想我間動亂七八糟咁。
「得啦，到你沖啦。」Kiki沖完涼出嚟，我忍唔住去望佢一眼。
喱一望真係不得了。Kiki著住一件緊身小背心同埋小短褲，平時著得寬鬆嘅佢，遮住曬佢迷人嘅身材。
佢髮尾仲滴緊水，頸上攬住一條粉色嘅毛巾，一邊用毛巾擦緊啲水，一邊行緊過嚟。
『唔好望，唔好望。』我係心入面同自己講，努力克制住自己。
但我身為一個血氣方剛嘅男人，有乜可能唔望？就算你依家唔望，之後嗰啲時間呢？
你以為只有一日嗎？你係要忍幾個月啊，如果真係如Kiki所講。
Kiki第一時間就坐係床到，撓起佢嘅二郎腿，跟住係度㩒手機。
個性感嘅姿勢，十分之誘人，我敢講，無人一個男人係對一個如此誘人嘅女人無動於衷，話無諗歪嘅話肯定係呃你。只不過我哋同禽獸有別，係唔做姐，但唔代表唔會諗。
我唔得啦！我快快手執幾件衫入去沖涼冷靜下。
入去沖涼真係有效果，原本有反應嘅我，入到去都無曬。
沖完涼出嚟，開啟返個聖人mode，Kiki趴係張床度，背對住我，小腿朝天上擺，圓潤嘅屎忽，所有嘢一覽無遺。
開完之後咪又係做返凡人。
又要扮啦屌，真係好辛苦。喱種辛苦係佢嚟之前，我完全無想像過，我以為大家都係朋友無乜嘢，但你始終係一個正正常常嘅男人。
所以點解其他人會唔放心自己另一半同異性去旅行，真係好易出事。最好嘅解決方法，就係避免喱啲嘢。
當我拎好曬床鋪，諗住今晚打地鋪做廳長啦，點知Kiki講：「你瞓地下啊？」
我話：「係啊，你瞓床得啦。」
「洗乜啊，你張床咁大，一齊瞓咪得囉。」Kiki絲毫不介意，但其實我好介意啊大佬……
我唔係驚你啊，我係驚我自己。
我間房幾大嘅，雖然啲嘢全部都係單人設施，但唯獨張床係雙人床嚟。
「唔係咁好嘅……」我輕輕地婉拒。
「你又無女朋友，我又無男朋友，加上我相信你嘅。」Kiki加上一個天真活潑嘅笑容，嗰顆純真嘅心直直插入我心。
「我唔忍心見住我fd瞓地下，同埋係我過嚟玩，有咩可能要主人瞓廳？」
此時此刻，Kiki港女嘅形象全部化為烏有，嚟到台灣之後發現咗佢令人感到可愛嘅一面。
我不禁為我今朝鬧佢嘅說話而感到內疚，真係鬧錯佢啊！簡直係天使。
「咁好啦，你都講到咁囉，你今晚唔好搶我被就得啦。」講下笑化解下啲尷尬先。
過咗無耐，我哋等埋個頭乾，跟住就熄燈瞓。
我哋互相講咗句早抖之後，就墮入了黑暗。咁Kiki就瞓入面，而我就瞓出面，我張床係靠係牆邊嘅。
第一次同女仔同床共枕，雖然大家都知唔會有啲咩，但總係有莫名嘅緊張感。
我連大氣都唔敢抖啖，仲好清楚咁聽到自己心跳添。你話啦，你叫我點瞓得著先得㗎？
我本來係背對住佢瞓嘅，但係喱個漆黑嘅環境中，時間過得異常漫長，你會慢慢感受到時間一滴一滴流走嘅感覺。
我忍唔住，擰轉身。卻俾我發現Kiki仲係度㩒緊手機，因為佢都一樣背住我，但手機屏幕嘅光照咗落牆度，唔難發現。
「仲唔瞓？」我多口關心下。
「你都係啊。」我聽佢聲線，感覺好似有啲沈重。
「做咩事啊？」直覺話我知，好似有啲嘢唔妥。
我坐起身睇佢發生咩事啦，跟住我就望到啦，條友仔係度睇返以前啲相。
知道咗之後，我秒速瞓返低。
「仲以為你飲完酒會好想瞓，點知仲係度睇以前啲相。」我嘆了一聲大大嘅氣。
「其實……你講嘅，我都知啊，但我個心仲好掛住佢。」咔嚓一聲，係熄屏幕嘅聲音。
「身在其中係難抽離㗎啦，但我知道你之後再回望返依家嘅自己，一定覺得自己好蠢。」
漆黑一片嘅晚上，係容易令人胡思亂想，一啲負面情緒沿住床邊一路爬，爬入你心靈。
「逼自己唔好諗，瞓醒又係一條好漢。」我理智咁同Kiki講。
喱啲失眠嘅日子我唔係未經歷過，如今諗返起，我都唔知自己點撚樣捱過去。
「我每晚就係咁，望住以前啲相，越係開心嘅相，我就越痛，每晚都係痛住瞓，起身第一時間就係睇佢啲嘢，我都唔知自己幾時會好，幾時會放低佢……」
「放低佢唔洗時間，坦白講，你依家成日記住佢都無用，索性乾脆啲仲好啦，俾自己型返次啦。」
「唉，我都唔知點做好。明明以前好乾脆，話唔鐘意就唔鐘意，就算對方飛我，我都可以無咩事，全身而退。但依家？我都唔知點解做唔到。」
估唔到我哋係喱個伸手唔見五指，只能夠透過一扇窗搵到些少光茫嘅房間入面，仲要一男一女瞓係同一張床度，大家都係後生世仔，一樣都乾柴烈火，但咩事都無發生到。
將今日喱件事隨便話俾一班男仔fd知，你一定俾人笑到傻，咩都無做過就咁過一晚，我已經可以想像到佢哋會笑你咩：無能、戇鳩、係咪男人嚟㗎？
但老實講，喱種心靈上嘅交合，我更加享受，大家都係俾個心出嚟，同自己啲fd做嗰啲嘢，我真係做唔出，過唔到自己嗰關。
一旦破壞咗，我哋就返唔到去以前嗰種純潔嘅關係，至少我唔會過嗰一條底線。
就算自己幾想都好，始終都做唔出，就算今日係Kiki做主動都係咁話，換著第二個男人，會二話不說，屌咗先講。但我……我可能連扯都扯唔起。
「因為你之前無愛得咁深囉，喱啲嘢唔輪到你話事㗎嘛，係咪？」我係度諗，我哋會唔會就咁傾天光？今日只係第一日咋喎，之後仲有好長時間喎。
「嗱，你嚟到周圍去玩下，識下台仔，台仔player只係佔少數，好多個樣呢……普普通通咁啦，但勝在夠專一、夠溫柔。」
「我係度生活兩年，個人意見啦，我識嗰啲都唔差嘅。」
「我同自己講，過埋今晚就唔諗啦，去到一個新地方，去識新嘅人，開展自己嘅新生活！」Kiki講到好理想，好紅日feel。
「你係先好啊，唔好講完聽晚又打回原形。」同嗰啲每日話要早睡早起嘅人一樣，大部分都係做唔到嘅fd嚟。