《好地地，我做乜鬼無啦啦帶個港女Friend嚟台灣特訓？》: 【4】談心

夜晚我哋決定去酒吧食嘢，飲下酒，嗌啲小食咁樣。
 
間酒吧我幾鐘意，幽清嘅感覺，佈置得幾有外國風味，沙發、吧枱應有盡有，而且仲有室外，係一個好適合放鬆嘅地方。
 
我最鐘意就係同三五知己一齊係度飲下酒，傾下心事。飲酒我唔係咁好，偶爾小斟兩杯。
 
嗰種純粹嘅快樂比起買醉，舒服得多。
 
我照舊點咗杯cocktail，Kiki都係一樣，不過就一直係度望住部手機，我見佢唔係係度打字覆人，而係不停係度碌手機。
 


直至杯酒嚟，我哋都係一句聲都無出過，尷尬？咁樣形容又唔係好貼切，因為佢根本無當我存在過。
 
Kiki好似自己一個嚟飲悶酒，而我只係嚟搭枱。
 
「喂！」我忍到自己嘅極限，終於要出聲了。
 
「你可以講你發生咩事未呢？你成晚係度㩒手機，我都一樣係唔會知你發生咩事，都一樣唔會幫到你㗎喎。」
 
「我知你係失戀先過嚟台灣散心，我都知唔少人會揀台灣散心，因為過嚟又平又快，又有嚟玩，至少你散心唔會話想返大陸散心囉。」
 


「過到嚟你係可以hea，但唔好咁樣唔開心，你只會浪費緊你過嚟嘅時間，我覺得好唔抵姐。」
 
好彩Kiki都聽得入耳，就算佢擺出心不甘情不願嘅表情都無所謂，最緊要開心返姐。
 
Kiki終於熄咗個screen，放低部手機，伴隨住一聲嘆氣：「唉。」
 
「咩事啊？」我關心地問道。
 
「佢有新女朋友啦。」Kiki無奈地說。



我嘗試估Kiki咩心情，因為Kiki仲未放低，而佢個ex就一早放低咗，仲有新歡添。
 
係喱個新世代，誰人給誰綠帽，分手後開始一段新關係，係多麼平常不過嘅事，多到每日都發生緊，我哋早已習以為常，見怪不怪。
 
係我哋上一輩嘅年代，拍好多年拖先係正常不過嘅事。依家拍好多年拖，係一件稀有嘅事。
 
「跟住呢？」我選擇聽曬Kiki係咩心情先。
 
「只不過過咗一個星期多啲，咁快就有新歡，仲話咩係我哋問題，性格唔啱，所以分手！」Kiki越講越是激動，拎起杯酒一嘢灌落去。
 
本來輕鬆傾心事嘅氣氛，變到係佢想劈酒。
 
佢再叫多瓶啤酒，飲地道嘅台啤。
 
「依家真係越諗越激氣！咩都講到好冠冕堂皇咁，跟住呢？仲同我講話，我同條女無嘢㗎，只不過係朋友嚟，最尾咪又係搞埋一齊！」


 
「咩都係大話！」嗰杯細細標嘅cocktail話咁快就俾佢飲曬，再戰台灣啤酒。
 
「斃就斃在你相信佢呢……」我淡淡地講出事實。
 
就算佢講大話，你唔信，佢一樣無成功到，無你乎。Kiki之所以會相信，源自於佢仲鐘意，繼而選擇相信佢。
 
愛喱種感情，一但陷入，就好難抽離，好似沼澤一樣。
 
「點解佢可以咁快忘記，一年幾嘅感情，話唔記得就唔記得，仲可以咁開心咁快樂，點解啊？」語畢，再灌多一杯。
 
哇，佢都算幾飲得，咁都無事，俾我就唔得啦，自問真係唔識飲酒。
 
「唉，長情點都係痛苦嗰個。你諗下你之前同其他人講分手，話唔定嗰啲男仔嘅心情同你依家係一模一樣。」
 


「自己種嘅情根，依家食返個果，咪當係還囉。」
 
我知佢其實係想我安慰佢，但通常喱啲安慰有咩用姐？打完一針之後，當下係好返啊，但你係咪可以確保佢之後都唔會再病？
 
我都唔知打咗幾多針啦……

「其實我不嬲都話，感情喱樣嘅唔想可以亂咁玩，依家覺得以前嘅自己做得好錯啊呢？」我盯實Kiki，Kiki連直視我都唔敢。
 
我知佢以前太多嘢啦，佢會殺我滅口都唔出奇，以前嘅佢都傷害過唔少人，估唔到今次食返惡果。
 
上得山多終遇虎，今次遇到個比佢更好識玩弄感情嘅人。總有一天，你會情不自禁咁折服係另一個人手中。Kiki如是，佢個ex都一樣。
 
「咩都可以玩，唯獨感情唔可以玩，因為代價太大啦，玩唔起。」
 
一講起喱句，我亦都諗返起以前啲嘢，因為我以前都俾人玩過，一顆真心俾人搓圓撳扁，嗰種痛苦我都唔想再經歷多一次。


 
「咁我應該點做……我依家真係好痛……好痛苦。」就算Kiki唔講，我都睇得出嘅。
 
「你嚟喱度就唔好諗起佢，亦都唔輪到你掛住，人哋有新女朋友，你掛住人哋，人哋就嚟搵你？佢身邊嘅人唔係你。」
 
我一怒之下，搶埋佢杯啤酒嚟飲。
 
我嬲，唔係因為以前俾人玩，而係俾同一個人玩兩次。
 
直至依家，班朋友係我面前提起Sandy，我都會諗返起，自己當初係幾咁傻西瓜。
 
但我唔會因為咁樣就去玩返人，咁樣做真係好小學雞，人哋打你一下，就要打返人一下。
 
因為我曾經痛苦過，所以我都唔想其他人受到我同樣嘅苦。



Kiki頭先有問佢應該點做，講出嚟好簡單，而且Kiki都知應該點做㗎，但做唔做到係另一回事姐。
 
好簡單，但做就唔係咁易。
 
放手囉，只要你放得到，喱種痛苦就唔會再纏繞住你。
 
關於佢嘅任何事，who fucking care?
 
問題係，唔係話你想放就放，自己呃自己話放到，但其實心入面仲係掛住佢，唔捨得佢，咁有咩用姐？
 
放手需要時間，更何況Kiki係被分手嗰一方，一時三刻無事就奇啦，除非佢無認真愛過姐。
 
「放手啦，你嚟台灣就係為咗忘記佢姐？喱段時間就俾自己去散下心啦。」
 
「我都好想忘記佢，但點解佢可以忘記得咁快？」Kiki好似進入咗一個好神聖嘅mode，完全無事我所講嘅嘢，只係想將佢心入面想講嘅、不滿講出嚟。
 
「明明我哋之前仲咁甜蜜，佢真係好迷人㗎，我真係好想佢留係我身邊……」
 
我等，等佢講完先。幾乎次次佢打嚟吐苦水嘅時候，都係佢有佢講，我有我講，有時真係覺得好無意義，但又唔忍心見到佢自己傷心呢。
 
自己係咪真係太好人呢？唉……孽緣啊。
 
「你話啦，佢係咪真係好衰啊？留底我一個人。」
 
「係係係，佢係大仆街，你唔係。」我笑笑地說。
 
「係囉！我都係咁話。」好彩Kiki聽唔出我最尾嗰句意思姐，佢無非都係想我咁講姐，頭先嗰一下笑，充斥唔少無奈啊大佬。
 
然後，佢就自己係度飲悶酒。我等遲下先再同講啦，依家我講咩佢都聽唔入耳嘅。
 
就好似以前嘅我。每每遇到喱啲事情，就會感嘆：問世間情是何物。
 
大家遇到嘅愛情都八九不離十，好多道理你都好明白，但當你真係身在其中，喱啲道理都係無撚用。
 
明知係伏，你都係唔知痴咗邊條根要走去中下先安落。