十六歲但非處子身嘅女孩: 3.2 我地出黎見個面
我離開公園，行入搭𨋢大堂，拑「上」，𨋢門打開，有一對新婚夫婦著住頹T踢拖行出黎，佢地雙方有講有笑，女嘅就用手繞著佢老公嘅手臂，兩小口好溫馨咁一齊落街，而我就走入𨋢，24樓返屋企
我臉上帶著沉默，從外口袋中攞出鎖匙開門
「喂呀妹，麵包呢？」 老豆一見到我開門就問我
我繼續默不作聲，返入房閂埋門卷入張被到，腦海裡面仲係有同一句說話喺到回轉「你係咪當呀Rick 係水泡？」
除咗呢句之外，我腦海簡直係一片空白，究竟點解我會就咁俾Cyrus一句就動搖我？我當Rick 係咩？係男朋友？係水泡？
電話響，我伸手去書枱，攞起我叉緊電嘅手機，望一望個來地顯示—— 「Rick Rick 豬」
「喂......」我又拖長尾音咁應咗句喂
「你頭先去咗搵Cyrus？佢做咩冇啦啦搵你嘅？夜媽媽你仲去搵佢？都唔知佢有咩企圖，佢搵你做咩呀？你有冇事呀？」我一聽電話Rick 就一輪嘴咁問我野，我都唔知我應該答佢邊條問題先
「我冇事，佢大概同我解釋返佢之前同我講分手嘅原因，同佢成績唔好嘅事咋嘛，我同佢傾咗一陣啫」我冇同Rick 講Cyrus 話我當佢係水泡嘅事，我唔想呀Rick知，因為我就連自己都唔肯定，我唔想因為受到人地嘅質疑而影響我同呀Rick 之間嘅感情，我唔想因為咁而嘈交
「點解頭先我wts 你唔覆嘅？」我嘗試扯開話題
「頭先我訓著咗呀，今日陸運會咁攰又拗柴， 我一返到屋企就攤咗喺梳化到訓咗啦，你又唔早d 同我講Cyrus 搵你，如果唔係，我可以即刻仆出黎搵你呀嘛」
「我有wts 到你㗎，係你訓著咗冇覆我咋，更何況你拗柴就唔好周圍走啦」我駁嘴
「咁危險嘅關頭你應該直接打電話俾我，炸爆我機直至我應你為止，就算隻腳唔得，都飛的黎搵你呀嘛」佢好語重心長咁對我講
「你以後唔好再見個Cyrus！」
「嗯，知道」我從來都好聽呀Rick 話，佢話一就一，話二就二，而今次我相信都唔會例外，Rick 佢雖然係大男人主義，但我知道佢咁做其實都係想保護我，佢亦都好錫我，對我好好仲成日氹我開心，而我好清楚知道，我係好鐘意呢種被愛嘅感覺
「做咩把聲冇黎神氣咁嘅？你要知道我而家唔係話你呀，我只係唔想你傷心同難過咋，唔好再亂諗野啦，你仲有我呀」Rick佢令到我覺得好安心，有佢喺到，安全感真係100分
「冇野呀，我只係有d 攰啫，我而家沖涼訓覺啦，早抖」
「好啦，早抖啦」
去到晚上，我仍然輾轉反則，徹夜難眠，腦海裡面依然有「你係咪當呀Rick 係水泡？」嘅回音
第二朝又要返學，琴晚得勁差，就係因為咁，所以我個樣特別殘，個黑眼圈特別大，成隻喪屍咁返學。仲要琴晚話落街買麵包點知就同Cyrus 傾咗成粒鐘，連麵包都冇買，今朝又冇早餐食
「喂Anki，做咩陸運會一完咗，個人都殘咗咁多嘅？」行到去學校門口，就見到Mika
「冇辦法啦，個人老咗，樣都殘埋」
「你上個禮拜先過咗十六咋喎，咁快就認老？我呢d 年頭出世嘅咪變老姑婆？」Mika 佢同我講笑，而我面上都終於露出笑容
「你快d 溝返條仔，咁咪唔洗做老姑婆囉！」我喺到大聲笑Mika，行下笑下講下，就已經返到 6樓嘅班房
第一堂，係最難捱嘅bio 堂，悶到嘔電又一大堆唔識讀又唔識串嘅英文，揀bio 讀真係一個折磨，仲要double lesson，真係會冇命
「Good morning class. Today we will continue our chapter 2.5.......」bio 老師 Miss Choi 喺到唸經
我一路轉筆一路發呆，腦裡面都仲係「你係咪呀Rick 係水泡？」呢句說話好煩心，我已經由琴晚諗到黎而家
「你係咪當呀Rick 係水泡？」.......
「你係咪當呀Rick 係水泡？」..
「你係咪當呀Rick 係水泡？」...........................
「 Anki, Can you answer me what is the function of......」突然之間有句英文暫斷咗我嘅白日夢，Miss Choi 就企咗喺我面前
我手足無措，只想搵旁邊嘅智儀求助，智儀佢揭開書嘅第84頁，highlight 咗段字，於是我就照住黎讀，好彩都順利成張過到骨，差d 又俾人話
「唔好再發白日夢啦，專心d 上堂啦」智儀喺我隔離輕聲細語
「知啦，我頭先冇訓著已經好叻㗎啦」我同智儀一拎轉頭望向後面，已經見到Ivan 同其餘兩個男仔訓咗覺
終於完咗朝早果三堂黎到小息，我擺好本bio 書之後就伏咗喺枱上面休息，用外套遮住個頭，唔想有人搞我
喺我訓著之前，我聽到附近有腳步聲，聲音漸行漸近，就停咗喺我面前，有人一手揭開我件外套，由窩裡嘅黑暗劃出一道光，我就猶如見光死一樣嘅疆屍，原來呢條阻住我訓覺嘅粉腸係Kenneth
「喂，借份中文功課黎抄呀，我未做曬呀」唓，又係問我抄功課，有邊次係見佢做得曬所有功課呀
「拎去啦，走開，唔好阻住我訓覺」我把聲好懶洋洋
「做咩咁眼訓呀？琴晚做賊黎？」個死人頭係都要阻住本小姐補眠
「收皮啦，再講我就唔你抄 ！」
「得得得」
我繼續訓繼續遮住自己個頭
「我想問下Anki 喺唔喺到？」
「佢喺果位到訓緊覺，個人好燥底喎」
「哦，得㗎啦，我自己過去搵佢」
「Anki...... Anki.... 起身啦」有人推一推我個膊頭叫我起身，我冇理到佢，將個頭拎向第二邊，再用手整一整件外套，遮住我個睡相
「你快d 起身先啦， 唔好訓啦」佢都係繼續推我
「好煩呀你，抄就抄啦咁多野講，行開呀！唔好阻住我！」我揭開件外套但係咪住眼講，因為光線實在太燦眼。當我一開眼嘅時候，就發現身邊果個原來係Rick ，唔係問我抄功課嘅Kenneth
「做咩事呀？我見你琴晚咁夜返屋企，一定冇買麵包做早餐啦，我頭先特登喺小賣部買咗魚蛋燒賣俾你食㗎，我咁好心都仲要俾人鬧添」Rick 摸住我個頭同我講
「 Sorry 呀，我以為又係Kenneth 煩住我咋，多謝你呀，我就快餓死啦」我即刻攞起支韱，吉咗粒燒賣
「好啦，放完閃啦，而家上中文堂啦」Mika 行返埋位之後同我講
「咁我返上去上堂啦，放lunch 見啦」Rick 同我揮一揮手之後就走咗