十六歲但非處子身嘅女孩: 3.1 我地出黎見個面
陸運會完咗個人特別攰，雖然淨係跳啦啦隊，但我已經好似做咗一年嘅運動量咁，一返到屋企就趴咗喺梳化到攤屍
「叮叮叮」煩到死，個個都喺呢個時候send 返d 相過黎，炸到我部電話成200 個message，而我呢d 懶人就緊係用人地部機影再等人send 返俾我啦，要逐個逐個send 俾人真係好麻煩，我寧願人地俾返我算
當我碌下碌下d 相之後先發現，哦？原來我同Cyrus 張相係用我部機影，咁始終block 人果個係我，unblock 人果個又係我， 我搵返沉咗底嘅Cyrus send 返我同佢好耐都冇再影過嘅合照俾佢
「thx」Cyrus 就咁應咗我一句，之後我就已讀佢
「你今晚得唔得閒？我有件事想同你講返清楚，可唔可以出黎見個面？」Cyrus 繼續問我
「好似唔係咁好，我地咁樣見面好唔方便」其實我都唔知可以點應佢好，又要避免尷尬又要有禮貌咁婉拒
「我唔會阻你好耐，就咁近近地喺你屋企留下個公園仔傾兩句得唔得？呢件事對於我黎講好重要，而你亦都有必要知」
「有咩唔可以wts 講咩？點解一定要出黎講？」我對Cyrus 抱住質疑嘅態度
「wts 好難三言兩語講曬所有事俾你聽，我地要搵個靜d 嘅地方講」
「咁好啦，只係傾一陣，唔可以傾太耐」我最後都係答應咗佢，因為我好想知Cyrus仲有咩要同我講
我覆完Cyrus 之後，第一時間wts 呀Rick，同佢講我今晚會去同Cyrus傾兩句，點知Rick 佢冇覆我，已經過咗三個鐘，佢都係冇覆過我。咁算啦，我直接去搵Cyrus
我喺屋企食完飯，之後話落街買d 野就出咗去
九點半，Cyrus 比我早去到我樓下嘅公園，我朝住佢嘅方向行過去，之後兩個人一齊坐喺長櫈
「對唔住Anki，咁夜仲要你落樓下」Cyrus 好溫柔咁同我講
「是但啦，有咩快d 講，講完我就走」我對佢好冷淡，始終都係前度
「我知道你仲好憎我、好嬲我，我知道我自己之前真係對你好差，成日都hea 覆你message，又唔理你，成日同fd 出街都唔同你出街，我係衰我係賤，我仲唔識珍惜你.......而家見到你同呀Rick 一齊咁開心又咁幸福，我真係覺得自己好抵死，好黑人憎，所有野都係失去咗之後先後悔.......」
講到呢到，Cyrus眼眶濕濕，佢拎轉頭唔俾我望住佢。唔知點解，見佢喺到喊，我自己都有少少心疼
「Cyrus 你唔好喊啦，都已經過去咗就算啦」我輕輕拍拍佢嘅背，希望可以令佢安心
「其實我之前咁敷衍咁同你講分手其實我都唔想。上年因為我d 成績唔好，好多科都係得2仲有科攞1 ，學校話有機會留我級，之後學校打咗電話俾我老母，老母鬧到我仆街仲好嬲，佢話如果我唔專心讀書又或者要留級嘅話就會送我去外國讀書，佢知道我同你拍拖之後就成日都話我掛住拍拖唔讀書，日日都鬧，日日都嘈。考下學期試之前，我老母佢已經幫我搵定英國d 學校，就連 Visa都整埋，『你快d 同你個女朋友仔講分手啦！你去外國就專心讀書，唔準拍拖！』佢咁同我講，我有反對過，我直程冇視佢，但佢就襯我沖涼就開咗我電話wts 你分手」
我心諗：有冇咁假？做戲先會有父母拆散啫，又話去外國讀書，又話老母唔俾拍拖，你估我而家拍青春校園劇？
「沖完涼之後，我繼續同佢吵大獲，後來老豆同呀哥都加入罵戰，佢地所有嘅矛頭都指向我，之後老母仲攞住我部電話俾我睇返佢偷用我部電話同你講嘅野，我覺得自己好失敗，我乜都做唔到。事後呀哥同我傾心事，佢叫我努力讀書，放棄你，如果我唔洗留班嘅話我就可以繼續喺到讀，可以重新追你多一次。我狠下心腸咁唔再覆你，亦都發奮圖強咁讀書」Cyrus 個樣好認真咁望住我「最後我都升到班，仲可以同你同班添，但點知，你過咗三個月之後就有新仔」
「我真係好唔憤氣，點解你可以喺短短三個月就放低我地之前一年嘅感情？實在太唔公平，你究竟係咪當呀Rick 係水泡？」Cyrus 瞪大對眼望住我，眼眶依然都係濕濕地
水泡？點解聽完佢講成段野之後，我會有種心up 嘅感覺？點解我會有種心酸嘅覺？點解我會有種後悔嘅感覺？原來我一直都錯怪咗佢，佢係有苦衷先會咁做，更何況分手果句唔係佢打，係佢老母打，難怪佢講完分手果句之後，講嘅野語無倫次，事前又冇鬧交，求求其其就咁send 句分手
「你跟本就唔知我有幾辛苦！你同我講完分手之後，我喊咗成個月，初初仲冇返學成個禮拜，日日都喊到對眼腫曬，我屋企人問我咩事我又要扮冇事，冇返學成個星期就連社工都搵我傾計，但係我仲要喺人地面前扮堅強，我唔想任何人擔心我，我同所有人都講大話，話我係因為考試大壓力而喊，為咗多d 時間溫書先一個禮拜唔返學。我以為我自己嘅情緒我可以自己處理，但事實唔係咁，我反而更加辛苦。有一次補課放學，我自己一個人走，冇同Mika、Ceci 一齊放，我一個人留低咗喺班房到喊，走廊有人聽到我嘅啜泣就行咗過黎，果個就係呀Rick........」
講到黎呢到，我雙眼愈咪愈埋，眼廉嘅影像愈來愈模糊，水珠慢慢填滿我嘅眼框，我漸漸看唔清眼前嘅Cyrus，一眨眼，眼淚就一串串咁流，兩行眼淚順住我嘅臉脥，並從下巴滴落我手背，係一粒暖暖又晶瑩嘅淚珠
Cyrus 用佢外套嘅手袖為我拭乾淚水，「唔好喊啦，我好怕見到女仔喊㗎」佢一邊溫柔咁幫我抺眼淚，一邊同我講
「Rick 佢留喺班房陪住我，聽我訴苦，只從分咗手之後，我從來都唔敢同人提起你嘅事，我就連你個名我都唔想聽到，佢好有耐心咁聆聽，我同佢傾到學校閂門先走。喺果三個月，Rick 佢對我好好，我唔開心又可以打電話佢同佢傾，有時佢又會喺小賣部到買野俾我食，氹我開心，仲會同我一齊放學，陪我行陪我散心，暑假又會一齊出街，冇幾耐之後，佢同我表白，之後我地就一齊咗。你都唔明Rick 佢有幾關心我，淨係識話我當佢水泡，我係真心愛呀Rick 㗎！」我一路喊一路講，情緒好激動
「我唔覺得你真係可以咁易就放低我地一年嘅感情，我地由中三一齊，去到之後要揀科唔同班，每次考試你都幫我一齊溫書，你點會咁易放低？你點可以咁易話放就放同第二個一齊？」Cyrus佢一而再再而三咁質問我
「我對呀Rick 係真心㗎！你唔好理我！」我一野推開佢隻手，怒睥住佢
我個腦裡面只係不停咁重覆同一句說話「你究竟係咪當呀Rick 係水泡？」我唔知，我好亂，我好迷茫
Rick 佢喺我最後落、最脆弱嘅時候照顧我、保護我、體貼我，我都因為話咁而鐘意咗呀Rick，唔通我真係已經當咗Rick做水泡？但我呢一刻都係真心愛呀Rick
「Cyrus...... sorry.......其實........其實我可能真係........」
正當我一路啜泣一路講野果陣，電話就響起
「喂........」我好細聲咁拖長尾音喂咗聲
「點呀你，落樓下買麵包都買咁耐，去咗好遠咩？」老豆打咗個電話催我返屋企
「嗯.....嗯..... 知啦知啦」
「sorry Anki，阻咗你咁耐，你就當今晚嘅事乜都冇發生過啦.........就當我地今晚冇見過面，sorry」