《香港傭兵》: [Day 19－神秘工廠] PART 06
“吼～吼...”紅Van好快就飛到嚟小欖...西貢獻命嘅路障...
都係一樣...終於見返西貢獻命嘅光頭佬...
驟眼所見...佢哋嘅面上...都比起之前多帶幾分緊張...
果然真係...有啲暴風雨前夕嘅感覺...
“吼～依！依！吼！”駛過西貢獻命嘅路障之後，繼續逢彎劈彎！直路直衝咁喺鋪滿楛葉嘅青山公路上飛馳！
一路上日倫都冇出過聲...只係望住出面...望住風景...
至於坐喺前面嗰兩個靚女？都仲有傾計嘅～不過就勁細聲囉...
我就唔敢再八卦喇...免得又俾人當成變態佬咁睇啦...
“吼～依！吼！”唔使幾耐...離遠就見到啲...建築物...
離遠嘅山頭有一棟棟木屋...鐵皮屋...
海邊又有幾棟舊樓...
又嚟到深井...
“依！吼...吼...”紅Van開始減慢車速...我已經見到幾個Full Gear嘅警察巡緊。
又見到路邊有幾架警車停泊咗喺度。
喺幾塊藍色紅色LED路牌之間駛過...再喺幾架鐵馬之間駛過...
“依！依...啪！”紅Van停定後，隨即打開車門。
我同日倫就跟住前面嗰兩個靚女落車。
落到車之後，兩個靚女就急急腳咁行。
我同日倫就慢慢咁行...同嗰兩個靚女嘅距離就越嚟越遠。
離遠咁望住兩個靚女嘅背影穿過警察設置嘅閘口...又望住幾隻Full Gear嘅警犬由頭到腳咁掃視嗰兩個靚女...
然後我同日倫都以正常步速穿過警察設置嘅閘口後...
“沙 沙 沙”沿住鋪咗唔少碎沙石嘅路面行多幾步...
『係唔係搭紅Van過去吖？』我望住企咗幾個麻甩佬嘅小巴站...
「唔急住...喺度行返轉先。」日倫雙手插住樓袋咁向住深井入面行。
行返轉先？
跟住日倫行入橫街...同唔少住喺呢頭嘅居民擦身而過...
當然仲有唔少得就係駐守喺呢頭嘅警察。
穿過幾條橫街，向住...海邊嘅方向行過去...
然後路過一間七仔，日倫就行咗入去。
入到七仔，見到有兩三個警察喺度食緊魚蛋...日倫就行埋去三文治嗰邊揀揀。
又...食嘢？
其中一個軍裝A咬住魚蛋咁問個便裝：「喂...有冇收到咩風姐？」
由於間七仔都幾細間...我哋嘅距離都幾近...聽得好清楚...
便裝又咬住魚蛋咁答：「冇咩風喎...」
軍裝B又插把口：「唔覺得奇怪㗎咩？呢排都唔聽見上頭有咩指示咁...」
便裝又懶懶閒咁：「真係唔知喎...唔理啦～我都就快調返出去～」
軍裝A就屌咗一句：「屌你就好啦！我都想調返出去吖！」
「殊...」便裝望咗過嚟！
呢個時候...日倫遞咗盒三文治去我面前：「芝腿治啱唔啱？」
『呃...啱...啱吖...』雖然就唔係太肚餓...
「嗯...咁就兩件芝腿治啦。」日倫拎多件芝腿治就行去櫃檯俾錢。
我都跟喺日倫身邊...等佢俾完錢就行返出七仔...
「唔好講咁多粗口啦...當緊更㗎嘛...俾人聽到唔好㗎...」
「係～係係係...」
同日倫行出七仔之後，佢就遞咗件芝腿治俾我。
接過件芝腿治望一望：『你咁快就肚餓喇？』
「肚餓？唔係～」日倫擰擰頭，行到過嚟海邊挨喺欄杆，「用嚟掩飾㗎姐～」
『掩飾？』掩飾啲乜？
日倫冇出聲...只係帶住微笑擰擰頭...拆開盒芝腿治望住個海，咬一啖芝腿治。
呃...咁有情調望住個海吹住海風食芝腿治？
好啦好啦...
我都拆開盒芝腿治咬一啖...望望海...吹吹風...
望住兩三隻海鷗喺海面上飛嚟飛去...岸邊又冇乜人...
除咗我同日倫，就只有兩三個人釣緊魚。
算唔算得上寫意？OK咁啦。
然後又有兩三個Full Gear嘅警察巡過...同其中一個釣魚阿叔俾禮。
個釣魚阿叔都係...警察？
話口未完，又有個釣魚阿叔行埋去：「喂張Sir～咁啱吖？」
張Sir望咗一眼：「喂咁吖黃Sir～都係Off吖？」
黃Sir整好支魚杆：「係吖～咁啱都係Off咪過嚟釣釣魚囉～」
嘩...咁輕鬆㗎咩？話晒呢度都係最接近特殊區嘅地方喎...
張Sir又望住個海：「喺呢度唔釣魚都唔知有乜好做～」
「係吖係吖係吖...係呢...」黃Sir勾完魚餌，望望四周...望咗過嚟！
我立即望返出海！咬啖芝腿治！
黃Sir就繼續講：「點吖點吖？傾成點吖？」
傾成點？有乜傾？
好似...係啲重要嘢咁喎...
我又豎起耳仔竊聽竊聽...
「其實都傾好咗㗎喇...佢哋會接...」
佢哋？邊個佢哋？又會接咩吖？講得太細聲唔係聽得好清楚...
等我再留心啲先！
「真係㗎？咁有冇話幾時？」
「實際嘅時間，就冇交代清楚...之但係...快㗎喇...」
「快？真係快？之但係...好似仲未有安排喎...」
快？安排？
「係吖...聽佢哋講都應該真係好快㗎喇...至於安排...遲啲啦...安排嘅嘢好快㗎姐...」
遲啲先有安排？咁即係安排啲乜吖？
「都係嘅...好彩喺度遇到張Sir你姐～等我有個心理準備！」
「使乜心理準備吖...都係跟Order做咋嘛...」
「係嘅係嘅...不過講真嗰句...一早就應該由佢哋接手啦！」
佢哋？即係邊個姐？
講咗咁耐...都仲未講出係邊個接手！
「應該話一早就應該由佢哋嚟管...不過算啦～我哋都話唔到事...釣魚啦～」
「係嘅係嘅～釣魚～」
講到尾都係冇提過邊個接手...邊個管...
係警察內部嘅高層人事異動？
咬多幾啖芝腿治...諗多兩諗...
背後又有幾個警察巡過...
「好想快啲離開呢區吖...」
「你哋冇聽講過咩？」
「殊！張Sir同黃Sir喺嗰邊吖！」
「唔好講...唔好講...」
然後又有幾個睇起上嚟應該住呢頭...著住街坊裝嘅居民行過...
「班差佬都唔知靠唔靠得住㗎...」
「差佬靠得住，豬乸會爬樹啦！」
「唉...真係晚晚都瞓唔著...」
「搬囉...」
「那有錢？！」
然後...
「走喇。」日倫食埋最後一啖芝腿治就轉身行。
『嗯...』我都食埋最後一啖，跟住日倫身邊。
向住大馬路嘅方向行...穿過橫街...
當行到冇乜人嘅地方，日倫諗一諗：「睇嚟...好快有大事發生...」
『嗯？』何出此言？
日倫望一眼四周：「解放軍會接手呢區。」
『吓？！』頭先嗰兩個阿Sir所講嘅...就係解放軍接手嘅事？
「頭先佢哋所講嘅...就係解放軍。」日倫點一點頭。
『真係佢哋...』其實我頭先都估到（唔好話我馬後砲！），只係冇證據去支持。
「其實我早前都已經調查過...」日倫再望望左右一眼，「而家可以肯定。」
『原來你都有調查過呢邊嘅事？』調查型行者...真係乜都查？
「咁啱姐～」日倫帶住微笑擰擰頭。
原來係...咁啱...
咁啱都查到咁多嘢？
調查型行者果然唔簡單～
『由解放軍接手...都好正常～其實真係...應該由一開始就係佢哋守呢區...』真係一個千載難逢嘅機會...
「唔係咁簡單...」日倫諗一諗...
『我知～唔係單單話搵武裝更勁嘅解放軍對付革命軍...係要借機令解放軍可以喺市區自由進出吖嘛～咁中共嘅控制能力就更強大喇～』呢啲嘢我呢個小市民都諗得到，老解支共唔會諗唔到嘅～
「唔係...唔係...」日倫擰擰頭，「都唔係咁簡單...」
『吓？』仲有得複雜啲？
「總之就唔係咁簡單...」日倫繼續向住大馬路方向行。
總之就唔係...咁簡單？
一路跟住日倫身邊行，佢都冇再講有乜咁唔簡單...
隻字不提...一粒聲都冇出...只係眼眉望幾望四周...向住大馬路方向行。
然後就行到嚟大馬路...
『搭紅Van過去？』我又望望小巴站...又企咗幾個麻甩佬等緊車。
「揸車過去方便啲。」日倫就拎部電話出嚟，撳幾撳。
『共享車？』今次我就醒喇～
「嗯～」日倫點點頭，望住向荃灣嘅方向行。
『之但係好多都用唔到㗎喎...』上次試過啦...唔係被人租緊...待修...就係唔知做乜唔租得...
「都係睇好唔好彩啦～」日倫帶住微笑擰擰頭。
睇好唔好彩？
明顯我就係永丸一洋黑啦...
“沙 沙 沙”喺鋪滿碎沙嘅馬路旁邊行...
行咗幾步...離遠就見到有架黑色嘅私家車。
日倫就望住架車行過去。
咦喂？唔係咁快就搵到喇嘛？
不過又唔好咁快開心住～話唔定又係被人租緊待修唔知做乜唔租得呢～
當我哋都行到埋去黑色私家車旁邊，日倫打開車門...
“咔...”真係打得開喎！
仲要咁順手就開到？！
喂...唔係咁好彩吖化？
不過都係嗰句～唔好咁快開心住～開得著架車先講啦～
我就行去另一邊車門...
“咔...”上車...
坐定定之後，日倫就嘗試撳個“Engine Start”...
“吱...吱！”真係著到喎！
『嘩係唔係㗎...』邊有咁順利㗎？
「哈哈～可能係我好彩開啦～」日倫扣好安全帶。
『調查型行者都係好彩啲㗎？』我都扣好安全帶。
「或者啦～調查都好講運氣嘅～」日倫俾一俾油...
“吱...吱～”
『咁我真係冇資格做調查型行者喇...』
「其實調查型行者都唔係咁易做㗎咋...」
“吱～”我哋向住荃灣方向駛過去。
『做嗰行，厭嗰行姐...』我都望望路面嘅情況。
「係我冇能力做行動型行者姐～」日倫揸得好定。
『點會吖？』坐得好舒服。
「你自己係行動型你唔知㗎咩？」日倫俾一俾油上天橋。
『我廢柴型啦...』完全冇Chok嘅感覺...好似喺平路一樣...
係架車好？定係日倫嘅駕駛技術高？
「哈～你又唔好咁講自己～」
『一條底褲都有佢嘅用處吖嘛～』
喺車與車之間...都好定...車速平均...就好似順住水流咁...
唔突出...唔起眼...好似隱咗形...唔存在咁！
我唔知道揸車嘅人有冇試過有呢種感覺...
但而家我有...
明明喺馬路上佔咗一架車嘅空間...喺馬路上行駛緊...
之但係就...知道有你嘅存在...冇人會在意你嘅存在...
好神奇...
“吱～”跟住幾架大貨車駛落荃灣。
「真係有好多貨車出入呢...」日倫一邊跟住前面架貨車，一邊望兩眼四周。
『嗯...新工業區...』我都望望工業大廈嘅出入口。
「喺外圍兜兜先。」日倫轉個彎。
『嗯...』我就繼續留意住街上嘅路人...出入工業大廈嘅工人...
“吱...”沿住工業區嘅外圍行駛...
「較外嘅工業大廈...應該都係啲普通嘅工業大廈。」日倫又跟住另一架貨車尾，望望四周。
『係吖...』都係普通嘅貨車...普通嘅工人...
「再入少少...就已經有啲唔同...」日倫轉入另一個街口。
再入少少...已經唔同？