《香港傭兵》: [Day 19－神秘工廠] PART 05
同日倫一邊食嘢一邊竊聽...
酒吧裡面...身邊周圍嘅黑社會講嘢都幾大聲...
而佢哋嘅對話內容除咗充滿粗口之外，仲有好多都係有關於喺黃金海岸呢度生活嘅點滴...
當中有唔少都係關於唔同幫派嘅黑社會有唔同嘅地盤...工作...崗位...
喺佢哋嘅對話之中，可以分析出好似話邊啲人係去睇碼頭...邊啲人去管東面嘅攤檔...西面嘅攤檔...平台上面嘅攤檔...
邊班人喺邊個時候守東西入口...巡邏...全部都細分得好清楚...
真係估唔到...一個龍蛇混雜嘅地方...竟然咁有規矩...秩序...
而當中最吸引到我嘅注意...就係...
「大佬...你有冇見過...佢哋？」
「有啦...嗰晚我都喺度...」
「真係有啲咁嘅人㗎？！」
「屌你唔係我親眼見到都唔信！」
「真係好似電影咁撚樣㗎？」
「誇撚張過電影呀！真係有激光劍㗎佢哋！」
冇錯...就係關於我同綽姿...
「真係有激光劍㗎？但係勁得過槍咩？」
「咁就真係唔撚知喇...不過算撚數啦...反正嗰班好似叫SP...SPIR...SPIRIT嘅人...都唔係我哋嘅敵人...」
「啱吖啱吖...佢哋都話冇乜事唔好惹嗰班人...」
佢哋？邊個佢哋？
會唔會又係西貢獻命？
應該就係...
「總之就咪撚理咁多啦...遇到佢哋都避之則吉啦！」
「係嘅大佬...」
國安局...西貢獻命...黑社會...仲有我哋SPIRIT...
可以話都有利益關係...最起碼都唔係敵人...
同日倫一齊都聽咗唔少嘢...而且都差唔多食飽...
「呢餐等我請～」日倫就拎個銀包，起身。
『邊好意思吖？』我都想拎個銀包出嚟...
「冇咩唔好意思嘅。」日倫帶住微笑擰擰頭，就行去搵個侍應俾錢。
呃...真係好似唔係咁好意思喎...
日倫俾完錢，我都拎埋箱咖啡豆跟住日倫行出酒吧。
「都差唔多係時候...」日倫望一望我手上箱咖啡豆。
『嗯嗯...拎埋過去就出去荃灣。』調查神秘工廠...
「嗯...首先要同我去拎返啲裝備先。」日倫就繼續帶住我向出口方向行。
『嗯嗯...』係喎...唔記得咗日倫收埋咗啲裝備...
講開裝備...一陣交完啲咖啡豆俾Owner之後，都要返屋企拎...
「係呢...頭先班黑社會講嘅...係你哋？」日倫邊帶住我行邊問一問。
『呃...係吖係吖...上次同綽姿嚟執行委託吖嘛...』我都跟住喺日倫身邊...
「哦～咁前日嗰個喺東涌出現嘅行者應該就係你啦～」日倫帶住微笑打量住我～
『呃...係吖係吖...我都知唔應該咁揚嘅...』上晒新聞又上晒網咁...
「其實久唔久都有行者執行委託嘅時候，俾路人見到...之但係甚少好似你咁揚～」日倫忍住笑咁點點頭～
『呃...』媽好柒吖...
「你...唔似係執行委託...」日倫邊行邊打量住我。
『我...唔係執行委託吖...』差啲Get唔到日倫想講乜...
「咁點解你要喺咁多人面前出手？」日倫再打量我一眼，望返上前。
『我...我只係想救嗰個小妹妹...』就係咁簡單...
「原來真係...真係唔敢相信...唔係親自問過你...你親自講出口...」日倫眼眉望一望我...點一點頭...
『我都知我多管閒事㗎喇...』浪費精神液又惹起外界關注...
「唔係唔係...」日倫帶住微笑擰擰頭，「我係估唔到...SPIRIT裡面竟然有一個咁有正義感嘅行者。」
正義感...連日倫都覺得我...
「你真係好特別。」日倫點點頭，繼續望住前路行。
我...我真係好特別？
特別咩吖？特別戇鳩又多管閒事？
唉～算啦～我都係做自己想做嘅事姐～
喺自己能力範圍以內...覺得係正確嘅事！
跟住日倫身邊行出黃金海岸...
班守住入口嘅金毛MK仔都忙於搜查進入嘅貨車。
我就跟住日倫身邊，行得遠啲...再遠啲...再遠多少少就行入草叢...
喺草叢之間再行得入啲...行多幾步...就見到把精神刀柄、匕首同一支精神液...
驟眼睇...應該係Level 1精神液...
日倫好快手咁綁返把匕首上大髀...插返把精神刀柄入大褸之內...腰間之中...同時袋返好支精神液之後，我哋都行返出草叢。
沿住馬路旁邊一直行...行到過三聖...過埋置樂...差唔多到市中心...
四周都水靜河飛咁嘅樣...
而日倫都冇出過聲...雙手插住褸袋靜靜咁行...
直到行到嚟Today Coffee店外...
「我喺度等你啦～」日倫離遠咁望住Today Coffee。
『哦...好好～好快～』我就拎住箱咖啡豆急急腳咁走入Today Coffee～
“叮 叮”
一入到店內，Owner就喺櫃檯入面抹住檯咁望住我：「嚟咗喇？」
『係吖係吖～唔好意思有啲遲～』我就放箱咖啡豆喺櫃檯。
「哦～唔遲唔遲～」Owner放好箱咖啡豆之後，遞咗張五十蚊紙俾我，再望望落地玻璃窗外，「嗰個係你朋友？」
我接過Owner手上張五十蚊紙之後，望望企喺出面嘅日倫：『係吖係吖～我朋友嚟嘅～』
「係吖...」Owner帶住微笑打量住日倫，「做咩唔入嚟坐陣吖？」
『冇...我哋仲有嘢要做～』除咗Owner打量住日倫之外...仲有...
子茵...
坐喺落地玻璃旁邊嘅子茵...眼定定咁...望實企喺出面嘅日倫...
陽光透過落地玻璃...照射喺子茵身上...有如天使一樣散發出光芒...目不轉睛咁望住企喺出面嘅日倫...
「原來你哋仲有嘢要做吖？咁我都唔阻你喇～快啲去啦～」Owner都打量住日倫，拍拍我手臂。
『哦哦...咁我走先喇～拜～』同Owner揮揮手...
“叮 叮”就行返去日倫面前。
「搞掂喇？」日倫雙手插住褸袋，打量我一眼。
『嗯～搞掂晒喇。』好彩今日都好似冇乜客～幾驚Owner問我得唔得閒留喺咖啡店幫手。
「嗯...」日倫點一點頭，眼眉望望四周，「呢區真係好危險...」
『吓？唔...都係㗎...特殊區吖嘛...都真係幾危險㗎...』可能日倫少入嚟啦...但我都已經喺度生存咗兩個幾禮拜...危機意識再薄弱都好...都深深咁感受到呢度嘅危險...
「嗯...都係同你返去拎裝備先。」日倫點一點頭，就轉身行。
『嗯～』我跟住喺日倫身邊行。
向住屋企嘅方向行，沿路都遇到唔少人。
男男女女都有...
年輕嘅廿幾歲，大年紀啲嘅四十幾五十歲。
呢個鐘數都開始多人...今日都真係幾多人...
係因為...少咗西貢獻命嘅出現？
或者真係...
喺路過身邊嘅男男女女嘅面上，多咗啲...笑容...
少咗西貢獻命班仆街作威作福，日子真係會好過啲？
或者...對呢度嘅市民嚟講...真係好啲...
我都好希望...呢種日子可以保持得長啲...
唔使幾耐就行到返嚟屋企。
『等等我...等等我好快...』我都快快手手咁拎返套緊身衫褲同行者長袍入廁所換！
「嗯～慢慢～」日倫就行近窗邊...
快快手手咁換返套緊身衫褲著埋行者長袍出返嚟插返把精神刀柄喺腰間同綁埋把匕首喺大髀...日倫都仲係望緊窗外...
『呃...有問題？』見日倫望住出面咁耐...總係好似怪怪地咁...
「冇...」日倫擰擰頭，繼續留意住窗外，「只係習慣小心為上。」
『你份人都真係好小心喎～』我就行去打開個櫃...搵搵啲精神液...
「都幾㗎～」日倫行嚟我背後，「仲有存貨吖？」
『哦？』我望一望日倫，再繼續揀一揀，『係吖...之前出咗去搵神秘商人買嘅...』
應該帶邊支好呢？
唔...我見日倫頭先嗰支係Level 1...
我帶Level 1嘅話...又唔知夠唔夠用...
但如果帶Level 2嘅話...又怕俾綽姿話我浪費...
始終而家精神液都好缺...
「係神秘商人？」日倫帶住疑問，「咁都俾你搵到～唔容易搵㗎喎...」
『係吖係吖...算好彩又有驚無險咁啦...』啱吖啱吖...神秘商人又唔容易搵...
真係唔可以亂用精神液...
「有驚無險？」日倫仲係帶住疑問。
『係吖係吖...尋日喺元朗搵神秘商人嘅時候又遇到逆行者...』都係拎支冇咁鮮艷嘅Level 2精神液穩陣！
「喺元朗吖...」日倫諗咗一諗，「你同逆行者都幾有緣㗎喎～」
『嘩...』我袋好支Level 2精神液落褸袋，閂返好個櫃，企返起身，『我唔想同佢哋有緣囉！』
「哈哈哈～」日倫笑住口咁擰擰頭，「你咁出眾...好難唔吸引到佢哋㗎喎～」
『吓？我又有幾出眾吖？』我呢啲路人甲乙丙...
「學識低調啲啦...」日倫帶住微笑擰擰頭。
『關咩事吖？係無啦啦咁啱得咁橋咋嘛...』我份人點止低調...直頭抵屌啦...
「係喇係喇～拎齊嘢啦嘛？」
『齊喇齊喇～』
「咁行喇～」
同日倫一齊落返樓...橫過馬路...企喺路邊等...
『唔知又要等幾耐呢？』我望望條馬路...
“吱～吱～”就只有一兩架貨車經過。
「應該唔使幾耐就會嚟到...」日倫望望遠處，「嗱～嚟喇～」
我都跟住日倫望望遠處...真係有架紅頂小巴駛緊過嚟！
『你點知唔使幾耐就會嚟㗎？』
「唔知㗎～估㗎咋～」
『咁你都估得幾準喎！』
「OK咁啦～」日倫向住紅Van揮揮手。
”吼...依！！！啪”紅Van就急停喺我哋面前！
日倫一邊拎出五百蚊，一邊上車交到林雪手。
我都不敢怠慢！拎張五百蚊交到林雪手！
林雪眼尾望一望我哋兩個...未等到我坐定...
“啪！吼！依～吼～”就閂門開車！
坐喺日倫身邊，望望車廂內...唔係有好多乘客...
加埋我同日倫...都係得四個人...
另外坐喺前面嗰兩個仲要係女仔...
“吼！吼～”紅Van一直飛住咁行駛！過咗三聖！過埋黃金海岸！都係再冇乘客上車！
「痴鳩線嘅...」林雪就口噏噏咁，「早兩日就咁閪多人...今日又得返小貓三四隻...」
林雪當然就唔會知啦...
但以我估計...應該係同委託板上冇高價值嘅委託有關...
點解咁講？
因為行者見委託板上冇高價值嘅委託，就算急住出去搵精神液都冇用...
先唔好話搵唔搵到...有幾貴...唔好唔記得精神液唔擺得耐...
所以竟然都冇高價值嘅委託接...索性連精神液都唔好搵...睇定啲先...
至於而家同我哋同車嗰兩個女仔...係普通人？定係都好似我哋一樣...都係SPIRIT嘅行者？
留心留意佢哋兩個...應該廿歲多啲...坐埋一齊有傾有講...
「出一出去真係好貴呢...」
「冇計啦...但唔出去又好悶...」
「都係嘅...又有好多嘢得出面先有得賣...」
「所以久唔久都要出去行返轉～」
咁睇嚟...只係兩個普通女仔...
「殊...都係唔好講咁多...」
「嗯...而家真係有好多變態佬...」
然後兩個靚女就擰轉頭...冷眼咁打量住我...
被...被發現了！
媽！好柒呀！！！