《香港傭兵》: [Day 19－神秘工廠] PART 07
日倫所指嘅唔同...有幾大分別？
之前嚟過呢邊...去到離遠見到神秘工廠先發現人跡罕至...
但係而家呢個距離...應該仲未到...仲好遠...
“吱...”日倫慢慢咁轉入路口...
我留心觀察兩旁...一棟棟工業大廈...街道...
慢慢咁行駛...可以望得好清楚...工業大廈都係同頭先入嚟見到嗰啲差唔多...都係有咁多大大小小嘅貨車出出入入...
而喺街上來來往往嘅人...都係普通嘅工人...
「有冇留意到？」日倫繼續向前駛。
『留意到...同啱啱入嚟嘅差唔多...』真係冇乜特別咋喎...
「你留意吓啲工業大廈嘅出入口...」日倫望一望兩旁嘅工業大廈。
工業大廈嘅出入口？
都係有咁多大大小小嘅貨車出出入入囉...
仲可以睇到裡面...有唔少工人上落貨囉...
有咩咁特別呢？
「喺角落...黑色嘅半圓球體...」日倫繼續以均速直駛。
『係...CCTV...』冇錯...就係CCTV囉...
咁又有乜咁特別呢？
喺出入口有CCTV好合邏輯姐...
而黑色半圓球體嘅CCTV都好普遍吖...
唔好話頭先入嚟嗰陣，其實喺市區好多地方都係用呢種CCTV㗎啦～
我都見過唔少㗎喇～
「留意佢哋設置嘅位置...同埋對住嘅方向同角度...」日倫好專心咁揸車。
CCTV嘅位置...都係出入口嘅角落頭...居高臨下咁...
至於方向同角度...都係對住出面...馬路嘅方向...
咁又有咩問題呢？
睇住門口有咩人經過...出入...有咩事都可以第一時間發現吖～
好正常姐...
「佢哋所設置嘅位置...對住嘅方向同角度...都係同其他CCTV連成一線...」日倫再轉入路口。
同其他CCTV...連成一線？
「佢哋咁多隻CCTV所監視嘅畫面，係可以無縫連接。」日倫繼續以均速直駛。
無縫連接？
我再留意住出入口...角落頭上嘅黑色半圓球CCTV...
唔單止角度同方向...仲有距離！所拍攝出嚟嘅影像...又好似真係...可以無縫連接！
再留意多一陣...仲發現原來有啲牆身都有！
「雖然大廈同工人都係普通平常...之但係啲CCTV就刻意編排好。」日倫再轉入路口。
『佢哋咁做為乜吖？』我又唔明喇...
每間工業大廈都咁麻煩咁較好晒CCTV...都係俾返自己睇姐...無縫連接都冇意思㗎...
「佢哋...並唔係“佢哋”...」日倫特別強調後面嗰個“佢哋”...
吓？咁玄嘅？
色即是空空即是色啲Friend嚟㗎？
「雖然話每間工業大廈應該都係獨立...但CCTV就唔係。」 日倫望望左右兩旁。
吓？都係唔明喎...
「所有嘅CCTV係連去同一個地方。」日倫再轉入路口。
連去同一個地方？咁係咩地方？
「所有嘅CCTV都係屬於解放軍...簡單啲嚟講即係解放軍監控晒成段路。」日倫再以均速向前駛。
『係解放軍？！之但係...點解佢哋要咁做呢？』呢區都係工業區姐...出入都係啲工人同貨車...都冇乜嘢好監控啦...
「因為...係重要路線...」
重要...路線？
“吱...依...”日倫停咗架車喺路邊...路口嘅遠處。
「拎部電話出嚟...」日倫拎起部電話，撳撳撳，「開返個掃瞄...」
『哦...』我都拎部電話出嚟...開返個掃瞄...
望住個畫面...顯示住我哋而家身處嘅地圖...
「將地圖放大到去...」日倫又拉一拉個Mon，「前面個路口...」
『哦哦...』我都將個視點放到去...前面個路口...
呃...做乜鳩呢？
我同日倫一直都望住個Mon...等...等...等了又等...
唔係等咗好耐...等咗一陣...但唔知等乜鳩咁...
然後...再等多陣...
“吱～”我就見到...地圖上...路口之中...出現一架...兩架...幾架巨型貨車！
我望返上前...望住個路口...正正就有幾架...銀色嘅巨型貨車橫過！
仲要係...車身上印有...紅色解放軍軍徽嘅銀色巨型貨車！
「呢隊銀色巨型貨車車隊所行嘅路線...」日倫都望住前面路口，「就係頭先我哋行過...CCTV監控住嘅路線...」
『咁講法...即係話...解放軍利用工業大廈嘅CCTV監控住佢哋嘅車隊路線...確保佢哋嘅安全？』我諗都畫出腸喇...應該冇錯啦...
「嗯...」日倫點點頭，再望返部電話，「你睇吓...巨型貨車裡面嘅嘢...係掃唔到...」
『嗯...』我都望住部電話...地圖上幾架駛過路口嘅貨車，『之前我入過嗰間神秘工廠...有唔少地方都係好似咁...掃唔到...』
「嗯...咁就應該冇錯...」日倫點點頭，再諗一諗，「裡面載住嘅...應該就係SPIRIT嘅原材料...」
『SPIRIT嘅原材料？！』
「製造我哋嘅武器同長袍嘅原材料...」日倫眼眉望一望我，再望返部電話。
咁就應該...真係...
我冇刻意提及之前同綽姿嘅推測...但日倫都係咁講...
咁就應該冇錯...
之但係...
『喺邊度嚟？』SPIRIT嘅原材料...
「啲巨型貨車係由...」日倫諗咗一諗，「西貢駛過嚟...」
係...西貢？
點解又會咁啱...又關西貢事嘅？
『你話啲巨型貨車係由西貢駛過嚟...貨車載住嘅係SPIRIT嘅原材料...咁即係話西貢有SPIRIT嘅原材料？邊有可能吖？』成件事就好奇怪！
等到銀色巨型貨車車隊駛過晒之後，日倫Lock返部電話：「點解冇可能？」
『點講好呢...西貢攻防戰之前，西貢喺被西貢獻命佔據㗎嘛...』
「係吖...」
『西貢獻命背後係有逆行者支持㗎嘛...』
「嗯...」
『咁如果你話SPIRIT嘅原材料係喺西貢得嚟...咁即係話SPIRIT嘅原材料本來就喺逆行者手上啦！』
「嗯...」
『咁就冇可能啦！SPIRIT嘅原材料喺逆行者手上...咁SPIRIT嘅武器同裝備又邊度嚟？』
「可以係唔單止喺西貢...」日倫諗一諗，「仲有其他地方都有原材料...」
仲...仲有其他地方...
「又可能因為我哋SPIRIT嘅原材料就快用盡，知道逆行者手上都有...仲有好多...所以...」我冇等日倫講完...
『所以就去搶！』就被我打斷...
「有咁嘅可能...解放軍借我哋嘅手去殲滅西貢獻命...我哋就借呢個機會搶喺逆行者手上嘅原材料...」日倫諗一諗，又點點頭。
『竟然係咁...』咁點解會係由解放軍運送原材料去神秘工廠？
神秘工廠...又係屬於解放軍...
咁對我哋又有乜利？
唔通...呢一切都係同...我哋同解放軍有合作關係有關？
「不過都係可能...都係猜測...仲要調查過先知...」日倫又諗一諗，點點頭。
『咁我哋直接去西貢查啦！』話晒西貢係源頭！
「唔得...」日倫擰擰頭，「自從西貢攻防戰之後，落咗禁查令...西貢就被列為禁查區...」
禁...禁查區？
「唔可以貿貿然走過去...」日倫再望四周一眼，「我哋都係沿住手上嘅資料...順藤摸瓜咁調查咗神秘工廠先。」
『嗯...』順藤摸瓜...『要調查神秘工廠...原材料...你都唔知啲原材料係咩樣？』
「唔知...」日倫擰擰頭，又諗一諗，「基本上SPIRIT裡面冇乜人知...亦冇乜人會關心...就只有好核心...同專門負責嘅先行者先會接觸到...」
『咁點解你會咁有興趣？』我打量住日倫。
日倫諗咗一諗，帶住微笑擰擰頭：「因為我八卦囉～」
八...卦？
「Keep住開個掃瞄。」日倫俾一俾油...
“吱...”以均速行駛...
『嗯...』SPIRIT嘅原材料...好似好神秘...又冇乜人會關心...
之但係就令我諗返起...之前遇到嗰次嗰㗎銀色巨型貨車車禍...見到漏出嗰啲黑色物質...
嗰啲就...原材料？
日倫開始將架車駛向較近神秘工廠...
路面上都唔見有其他車輛...行人路上都冇行人...左右兩旁都係荒廢嘅建築物...爛地...
「呢條路唔係車隊路經嘅路線...所以冇CCTV。」日倫望望左右兩旁一眼。
『嗯...喺車隊路經嘅路線都會有CCTV？』呢度一帶，都係得荒廢嘅建築物咋喎...
「嗯...」日倫點點頭，「就算係荒廢嘅建築物，都會有CCTV...設置嘅位置仲好講究。」
『都係可以無縫連接？』我又望住出面...留意住出面...
「嗯...唔單止可以無縫連接...仲好隱密...」日倫諗一諗，「不過我哋而家唔方便去睇...我哋要避開。」
『嗯...』要避開...
我見過銀色巨型貨車車隊...但就冇留意...又冇記住佢哋嘅路線...
完全推斷唔到邊度有CCTV...
不過唔緊要啦～而家又唔係我揸車～
而家係經驗豐富嘅日倫揸吖嘛～
“吱...”再以均速行駛多一段路，就越嚟越接近神秘工廠。
已經好清楚咁睇到大大幅銀色圍牆。
日倫亦都向住圍牆兜過去。
越嚟越接近...越嚟越接近...然後就沿住銀色圍牆行駛...
當我哋差唔多兜到嚟正門之時...就見到有三四個戴住黑超...看更咁嘅守衛行咗出嚟...企咗喺馬路中間！
“吱...依...”我哋就俾班守衛截停！
我就Lock返部電話。
“咯 咯”其中一個守衛行到埋嚟日倫旁邊，敲一敲隻窗。
日倫撳低隻窗之後...
「你哋係咩事㗎？」個守衛睥一睥入嚟車廂裡面。
咩事？咩咩事？
問得好啲得唔得㗎？
「哦冇～」日倫帶住傻笑摸摸頭，「唔覺意兜咗入嚟...又唔識路出返去咋嘛～」
「唔覺意...」守衛唔多信咁，「冇導航㗎咩？」
「壞咗㗎～」日倫篤一篤車上個LCD顯示器。
守衛又望住漆黑一片嘅LCD顯示器：「唔整返佢？」
日倫無奈咁擰擰頭：「共享車嚟㗎...」
「唔搵架好啲嘅？」我見另外嗰三個守衛都睥撚實我哋...又掃視我哋架車...
日倫又好無奈咁笑笑口：「邊有咁易搵吖...搵咗好耐先搵到㗎郁得㗎咋...」
搵咗好耐？唔係一搵就搵到喇咩？
日倫都真係幾識講大話㗎喎...
「想去邊㗎？」守衛又問一問。
「中發大廈～」日倫好隨意就噏咗個大廈名出嚟。
「中發大廈吖嘛～」守衛指一指前面，「你沿住直去...過兩個街口轉左出返去...唔使幾耐就見到㗎喇～」
「哦～好好～唔該晒吖～」日倫帶住微笑點點頭。
「快啲走啦！」幾個守衛就讓返條路出嚟。
「唔該晒～唔該晒～」日倫就撳返起隻窗...
“吱...”向住前面行駛...
日倫望一眼倒後鏡中，仲望住我哋架車嘅守衛：「真係麻煩...只係兜一轉都被截停...仲要亂點條路...」
『亂點條路？』咩意思？
「嗯...」日倫點點頭，「中發大廈根本就唔喺嗰邊...係喺另一邊再兜返出去...佢哋只係想我哋盡快離開。」
『乜原來係咁㗎？！』個個都係大話王嚟㗎？
「不過都好彩...我哋頭先都已經啱啱好兜咗一圈...」日倫諗一諗，點點頭，「應該足夠。」
『嗯...』應該足夠？