是咁的，我嘅職業係幫人瞓覺: 二百五十五、準備就緒

miki終於屈服：「我明白喇，你等等我。」佢深呼吸一口氣，行咗出病房。

大約幾十秒之後，重新開門入返嚟，走到我旁邊：「你好嗎？我叫miki呀，有人叫我嚟搵你，話你可以幫我瞓覺喎。」

我地靜靜對望，一齊笑得好開心。

「好喇，玩夠喇傻妹。」

「唓，明明就你玩先嘅。叫我搵我自己嚟，咁咪玩下角色扮演，一人分飾兩角咯～」





「頒個最佳女主角畀你咯。」

miki好得戚咁叉住腰：「都預咗架啦，唔係我攞邊個攞喎。」

胡鬧之中，我再次拖起miki嘅手。

「我地開始喇。」

「嗯。」





我同miki設定好時間，會幫佢瞓到聽日，我做手術前嗰一個鐘頭。

其間佢唔可以同我相距太遠，如果唔係我就會強制甦醒。

「如果手術之前我無醒，即係話我已經入咗你嘅夢之迷宮。當超過契約時間，咁我地距離幾遠都無關係，因為我已經被困咗喺迷宮之中。」

同時因為原本嘅契約已經完咗，miki就可以正常咁瞓覺，唔會造成我永遠代佢瞓覺嘅情形。

「咁其實你入咗去之後，我有無野幫到手架？」





我搖搖頭：「喺契約時間入面，你就算食安眠藥都唔會瞓得著。」

miki諗咗諗，然後點頭：「我明喇。」

我伸出尾指：「梁美琪，你願唔願意將十個鐘嘅睡眠時間，交畀我？」

miki同我勾手指：「我願意。」

契約建立成功，我瞓喺床上，將恆仔送畀我嘅捕夢器當吉祥物咁掛喺身上。

「好靚喎。」

「係呀，我朋友送畀我嘅，係我嘅護身符嚟。」因為掛咗之後，就無再發同恆媽有關嘅惡夢。

唔知今次個捕夢器有無用，但戴埋總無壞嘅。





miki幫我冚好被。

我暗自立誓，最後一個客人，miki嘅心結，由我嚟解開。