是咁的，我嘅職業係幫人瞓覺: 二百五十四、值

我條件反射咁拖住miki隻手，嚇咗佢一跳：「呃？」

我將佢拉近我一步，miki亦轉身低頭望住我。

「miki，你幫人寫遺書架可？」

佢唔知我想做乜，不解咁點點頭。

「你係咪除咗寫遺書之外，如果客人有遺願，你都會幫佢完成？」





「只要係能力所及，都會盡量完成。」

我深呼吸一口氣。

「我做你客人，你幫我寫遺書吖。」

「吓？你講真？」佢好訝異，仲未知道我真正嘅用意。

「真架。雖然唔係自殺，但聽日嘅手術點都有風險，如果我有咩三長兩短，你就將封遺書交畀我阿媽同老豆，得唔得？」





miki點頭，詳細咁問我封遺書要點寫，已經當我係客人。然後我終於將真正目的話佢聽。

「除咗遺書之外，我仲有一個遺願想你幫我完成。」

「你唔好當聽日個手術係死刑咁先得架。」

「我做好最壞打算架喇。你當我聽日手術真係會失敗啦好無？一失敗咗我就無機會再做任何事，所以依家先同你交代定所有事。我唔想後悔。」

「嗯，我明白喇。你講吖。」





我舉起尾指：「你應承我，一定會幫我吖。」

miki二話不說就勾住我手指尾：「我應承你。」

「好。我嘅最後一個願望，係幫一個叫miki嘅女仔瞓覺，你幫我搵佢嚟吖。」

miki聽到依句，擘大眼呆呆咁望住我。佢實係以為自己聽錯，但我眼神好認真咁同佢四目交投。話佢知佢無聽錯。

隔咗幾秒，佢忍唔住笑咗出聲：「哈哈哈！我明喇，原來你想咁！邊有人個遺願係幫你幫我架？」
「我咯。其實即係想你幫手，等我可以幫一個人，不過咁啱依個人係你自己啫。」

「你好奸呀。」一個粉拳打過嚟。

「你話過會幫客人完成佢嘅遺願架嘛。我地啱啱講好咗，連手指尾都勾埋喇，無得賴貓。」





miki面有少少難色，好似擔心緊一啲事，問：「你真係確定要咁樣做？可能會令你情況惡化架喎。」

我堅定咁點頭：「我確定。」

只要幫到你，就算病情惡化，都係值嘅。