是咁的，我嘅職業係幫人瞓覺: 二百五十六、miki嘅心房

喺心房擘大眼，眼見嘅係一間大屋。

暗紅血跡遍佈地板，構成一個模糊嘅人型。牆上仲有大量血花。

我都係第一次見到咁大，咁陰森恐怖嘅心房。但依度正正同遺書故入面嘅描述不謀而合，亦即係miki一直住嘅屋企。

我馬上喺屋內搜尋掛住門牌嘅房，咁大嘅心房本身已經好似一個迷宮，我唯有逐間房望下。

依間大屋嘅房門有不下幾十道，但每當我打開一道門，入面播映緊嘅都係難以入目嘅慘劇。





一個大男人對細路女發洩獸慾，細路女伸手向門外嘅人無聲吶喊。

「除衫。」一個女人冷冰冰咁命令，細路女乖乖除衫，只見佢全身上下多處有瘀青，被打到皮開肉裂。

女人拎住一碌鐵通：「轉身。」

顫抖衰弱嘅身驅扭轉，默默承受鐵通嘅重擊：「勾引我老公！勾引我老公吖嗱！」鐵通一下一下打落女仔身上。

我嘅拳頭硬咗起嚟。





依啲就係miki細個嘅記憶。雖然已經喺書睇過一次，但實實在在喺面前上映嘅衝擊力實在太大。

「停手呀死八婆！」我忍唔住衝咗入去一拳揮向女人身上，但佢地只係影像，只係過去嘅回憶，我根本幫唔到當時嘅miki。

我冷靜落嚟，忍住眼淚離開，即刻閂埋門。

之後有一間房見到有個醫生喺度做手術，將miki嘅卵巢切出嚟。

仲有一間係miki好似個醫生咁幫一堆老鼠做手術，嗰種視覺衝擊令我幾乎反胃。





另一間房就見到佢同金仔互相擁抱咁墮地，不停重播骨頭碎裂嘅聲音。

如果我心入面全部都係咁嘅記憶，我實會痴線。

但依家唔係傷感嘅時候，我嘅任務係快啲搵到迷宮入口，幫miki解開佢嘅心結。

問題係依度咁多道門，無一道掛住門牌。

我再打開一度門，入面一片黑暗，有人用刀不停插緊一個毛公仔。

電燈接觸不良，閃下閃下咁。

透過一明一滅嘅白光，我見到𥚃面嗰個係miki。佢條頸慢慢擰向我，眼神有啲唔對路。

點解⋯⋯佢好似睇到我咁嘅？