是咁的，我嘅職業係幫人瞓覺: 二百三十六、上環

上咗miki架私家車，入面有淡淡嘅白合花味，清清地唔會俗，我幾鍾意。

佢有架咁嘅車，我已經夠驚訝。佢記者嚟咋喎⋯⋯定幫人寫遺書真係賺到咁多錢？

再睇真啲，發現佢女仔之家揸棍波，仲驚訝。

「扣好安全帶喇。坐好未？我係藤原米奇，亦即係扯旗山車神。」

我反白眼：「好爛呀你。」





「你再係咁嘅態度，無得同我架fc鬥c鬥c鬥⋯⋯」

佢仲要扮埋回音⋯⋯

「得喇得喇唔好私鬥喇，開車啦唔該。」

miki嘿嘿笑咗兩聲，手指篤篤我嘴角：「微微向上廿五度，你想笑呢？唔好忍啦。」

我無奈笑咗下：「開車啦你。」





「你都要話我聽你住邊先得架？」

「上環，開得車未呀？」

miki聽到個地點，稍為呆咗下，之後又笑返。