是咁的，我嘅職業係幫人瞓覺: 二百三十五、月台會陸沉

「鬼有同你間接表白呀。」我無佢咁好氣。

話說我同miki今日只係第一次見面，但由一開始我地嘅互動已經好似朋友咁樣，不知不覺間就熟咗。

到依家連咁樣講笑，大家都唔會覺得尷尬。

「依個係我幫人寫遺書嘅必備技能嚟架，最緊要令到人地好快就自然咁當你係朋友，咁佢地先會將自己嘅鬱結安心咁話我知架嘛。」

「我又唔係你客人，咁唔使同我做朋友架喎。我都無鬱結要講。」





「職業病咯你當，我慣咗手勢嘛。仲有啊，同每個見到嘅人都做到朋友唔好咩？唔通我要黑起塊面咁對你喇喎？」

miki即刻表演西面畀我睇，但都係好有喜感，黑面同佢嘅五官太唔夾喇，睇到我笑咗出聲。

「唔準笑！係喎，你搭咩車返屋企？」

「地鐵咯。」

miki又拉住我隻手帶我行另外一邊：「依家地鐵好危險架，月台會陸沉，都係我車你返去啦。」





「沙中線先有事之嘛。」

今次，我雖然駁咗下嘴，但身體無再反抗，直接由得miki拉住我行。