是咁的，我嘅職業係幫人瞓覺: 一百九十二、放開手嘅愛

但余生必須要嘴上否定自己仲愛阿婷。

佢甚至連苦惱去唔去婚禮，都只能夠自己一個收收埋埋去承受，直到錯過，直到後悔。

「你係個唔關事嘅陌生人我反而可以放心講你知。」迷宮入面嘅余生講過依句說話。

佢自己都好清楚，依種事走去搵任何朋友商量，都只會得到一個答案：「唔好去。」

仲會被人笑佢係傻仔，條女被兄弟撬走仲去祝福佢，實當眾被人笑到面都黃。





不過迷宮入面嘅佢，仍然被困喺收到囍帖後，婚禮舉行前嘅時間。

佢內心最深處嘅願望，呃到人呃唔到自己。

因為同阿婷分咗手之後，余生對佢嘅依戀喺不知不覺間轉化成真愛。

有時正正係伴侶離開嘅時候，人先會學識咩叫真愛。所以先會有句對白話：「有啲人係要到離開咗，你先會發現嗰個係你真係鍾意嘅。」

真愛唔係握緊拳頭，而係放鬆咁攤開手掌任由寶物喺掌心翩翩起舞，守望佢成長，即使愛人走到手掌嘅邊緣都唔會懼怕。





真愛唔係「我愛你，所以我想『你令我』幸福」而係「我愛你，所以我想『你』幸福」。

如果你嘅幸福包含我，我會好開心，但即使當中無我嘅存在，我都為你而開心。

但依種人，喺世人眼中，只係傻仔。

我係咪好傻？

既然依個係cheese嘅選擇，佢覺得幸福的話，我又有咩權利阻止佢？





夢中余生嘅反問句又再浮現。

正正因為已經失去阿婷，余俊朗嘅手已經無寶物需要佢握緊，所以放開嘅手先真正認知到「放開手嘅愛」。