是咁的，我嘅職業係幫人瞓覺: 九十、恆仔

有時我會覺得人類真係好得意，愈大愈唔糊塗，愈嚟愈唔知自己重視嘅係乜野。

錢啦、性啦，被依啲過眼雲煙蒙蔽咗雙眼。

用肉眼睇依個世界太簡單，用心眼睇依個世界先最難，但偏偏最清楚，最透徹。

我接嘅客人大部分要我幫佢瞓覺嘅原因，不外乎做野、溫書、做野、溫書同做野。

香港人嘛，想要多啲時間嘅原因都係依兩味架喇。





不過今次嘅客人就有啲唔同，唔係溫書亦唔係工作。

「你好你好，金仔下嘛？唔該你嚟幫我手呀！」

我同佢喺某間私家醫院嘅大堂見面。

依個叫恆仔嘅年青人大約係二十歲尾，一出現就好有禮貌同我打招呼。

望一望佢個表情，依種少年得志嘅自信真係令我好想被佢包養⋯⋯咳咳，總之我係女一定被佢迷到我濕哂，因為手心出汗。





恆仔係啲唔愁錢銀女人嘅人生贏家，大學年代就開始踏足投資領域，都未畢業已經炒股炒到人生第一個一百萬。

等我諗下⋯⋯我大學嗰陣對股票嘅認識就係有個股神叫菲比斯，仲有唔知邊個索螺絲。