《純愛》平安夜的天使 (完): 第二十八章

第二十八章

「係呢？阿遊呀⋯你覺得套戲點呀？」

「吓？套戲？嗯⋯」

食完個雪糕之後，我哋一邊行一邊搵啲話題去傾，現加就傾到套戲，話說嗰到嘅環境好一般，但因為嗰到啲海風，搞到我一時集中唔到精神⋯

我：「我覺得ok啦，只覺得男女主角無一齊返係有啲可惜咁囉⋯」唔怕老實講⋯我其實喺睇戲嘅過程當中係無專心咁睇過⋯ 係因為喺隔離坐住嘅係Lavina，難免會有啲緊張⋯ 同埋當時⋯我諗返起同Kelsey第一次睇戲嘅回憶⋯



=================================

嗰次睇嘅係咩戲其實我已經唔太記得，只記得好似係套講西部牛仔嘅笑片，我當時同樣亦都係因為Kelsey坐喺隔離，可能係因為太緊張嘅關係，搞到我成個人好似去咗舞會咁，係咁喐黎喐黎去⋯ 旁邊嘅Kelsey望見到就問我：
「套戲好睇，你個人都幾好睇下喎😏」

我：「我⋯我凍啫⋯冇⋯冇嘢呀⋯」

Kelsey：「唉⋯ 其實我都緊張⋯但你咁喐法⋯搞到我緊張得黎又想笑你⋯喂！你做咩！」我一嘢抓住佢隻手

我：「shh~小聲啲～諗住既然大家都咁緊張咯～所以咪諗住傳啲「凍」能比妳，諗住一齊「凍」起來咁囉～」



Kelsey:「真係冇你咁好氣⋯唉⋯咁⋯拖⋯拖實啲喎⋯」佢塊面同我塊面一齊變紅，紅到套戲完咗為止⋯

=================================

Lavina:「喂！何生～夠鐘返工啦～」睇黎我又發佝瞀，仲要係企喺到發⋯

我：「吓？做⋯做咩呀？」

Lavina:「睇你個樣，都知你冇聽到我啱啱講咗啲咩㗎啦⋯」俾佢發現咗⋯


「我話：我覺得男、女主嘅相遇，相戀、分開同重逢形成咗一個美好嘅樂章，有始有終⋯ 雖然有啲遺憾係佢哋最後無一齊返，但起碼佢哋有盡力咁愛過對方，珍惜個對方⋯卻因為現實嘅阻攔，令佢哋分開。但最後⋯ 佢哋起碼都懂得放低過去，搵一個比對方更好嘅伴侶⋯」

我聽到佢咁講嘅時候，我都諗緊自己一樣嘢：
我係咪時候放低Kelsey呢⋯ 同埋⋯我有呢個資格咩？我有呢個權利去咁做咩？

我：「估唔到妳個人都幾感性㗎喎～」

Lavina:「有好多嘢你都唔知㗎～第時有機會嘅話再話俾你囉～」

我：「不過⋯可能係我有比套戲中咁傷感咁情感喺到⋯佢哋最後得到嘅係解脫，而我得到嘅無法修補嘅遺憾同內疚⋯」

Lavina:「遺唔遺憾係你自己嘅選擇，無論你最終想點都好⋯我都會支持你嘅😊」佢嘅笑容，再次令我平靜落黎

我：「多謝妳⋯」



Lavina:「好！都係時候返去啦，話曬要由荃灣西返到九龍塘至少一個鐘到八個字，聽日仲要返工㗎～」我望一望電話，原來已經9點半⋯ 聽黎又要攞命博啦⋯不如聽日就⋯
「你試下請假🤨我聽日就問阿倫攞你屋企地址摌上門叫你起身🙂」係咪痴線㗎⋯
「行啦！仲企喺到！唔等你啦～」

我：「喂！唔好行咁快啦！等埋呀～」





「開唔開心係你自己嘅選擇，適量嘅負面返而對自己有好處；但最後要記得走返出黎」