《純愛》平安夜的天使 (完): 第六章

第六章

過咗幾日，12月30日。

「叮叮叮⋯⋯啪！」

每日如常咁重覆慣例嘅動作，照舊洗碗、焗蛋糕、沖咖啡⋯⋯但我嘅生活已經有啲輕微嘅改變⋯⋯

呢日朝早我返到café準時開舖嘅時候⋯⋯



倫：「喂！阿遊，日日黎嗰個女仔邊個黎㗎？佢日日準時12點幾坐喺同一個位幾個鐘，你又有時會同佢傾下計，係咪想溝人呀？」

我：「溝你個頭呀！但上次還完張卡俾佢之後佢就日日黎。可能係你沖俾佢啲咖啡好飲呢～」

話說嗰日還返張卡俾佢之後，Lavina就連續幾日準時12點坐喺到，有次仲坐到我哋放工⋯⋯ 我得閒都會過去同佢傾兩句，但唔知點解次次同佢傾計，佢個頭都垂到好低，又唔敢望我唔洗怕醜到咁呀⋯⋯

倫：「喂咪搞我！一個老婆都夠搞死我啦⋯⋯」

佢突然停咗，擰轉頭望一望，就見到Priscilla攞住枝掃把⋯⋯



Priscilla笑裹藏刀(棍)咁講：「李斯倫，係咪有人搞你呀？」開始為佢默哀1秒鐘⋯⋯

「叮叮～」到咗12點，Lavina如常出現，佢今日著住白色羽絨加淺藍色毛衣，戴著紫色冷帽，佢一見到我就面紅，頭dupdup咁行過黎⋯⋯

我：「哈囉～」

Lavina：「唔⋯⋯唔該⋯⋯我⋯⋯我想要杯⋯⋯」

我：「照舊mocha？$35」



Lavina:「唔該⋯⋯」

佢比咗張$50我，我找返錢比佢嘅時候⋯⋯

Lavina：「請問⋯⋯你31號，得⋯⋯唔⋯⋯得閒？」

吓？ 我無聽錯吖嘛？佢想約我？唔係無朋友到咁呀⋯⋯

「我⋯⋯想⋯⋯約你⋯⋯陪⋯⋯陪我倒數⋯⋯」嘩⋯⋯我都好耐無出去倒數了，上次係同Kelsey⋯⋯

「係咪⋯⋯嗰日唔得呀？」

我：「唔⋯⋯唔係⋯⋯我ok呀！」

Lavina一聽到，即刻抬起頭：「咁你可唔可以俾你whatsapp我呀？」



嘩！現加啲女仔咁主動㗎？有啲唔對路，求其搵個理由拆咗佢先

我：「唔洗啦！妳嗰日黎cafe等我咪得囉！」

佢一秒間神態有輕微失望，之後馬上笑住講：「好呀！咁我嗰日6點黎坐住等你啦！」

我：「ok，妳杯mocha呀。」

Lavina:「唔該曬～」

之後佢慢慢咁行去佢慣常坐嘅位置，我一邊望住佢嘅背影，又有一種好熟悉嘅感覺～
就係我望緊佢嘅時候⋯⋯

？：「喂！！！」一聲巨響嚇到我成身打冷震



我：「嘩！嚇死我咩！」原來係阿倫⋯⋯




倫：「洗唔洗咁驚呀⋯⋯」

我用帶有嘲諷嘅聲線咁講：「點呀？比老婆醒完啦？」

倫：「唔好提啦！咦～難得有笑口喎～」

係咩？我自己都無意識到自己有笑⋯⋯

阿倫望到Lavina黎咗，又奸笑住撞一撞我：「哦～ 你係咪鐘意人呀？係就上啦！仲等呀？」



呢個時候，Priscilla行咗過黎⋯⋯

Priscilla：「喂死仔！仲傾計！」佢扯住阿倫隻耳仔狂扭～

倫：「唔係呀！痛痛痛痛痛！！！ 饒命呀老婆！」

Priscilla又望到Lavina嗰張枱，突然停咗手。

Priscilla：「呢個女仔黎咗幾次啦喎。Marcus，你識佢㗎？」連你都咁問⋯⋯

我：「唉⋯⋯ 一言難盡⋯⋯」

Priscilla：「話說呢⋯⋯你覺唔覺佢好似Kelsey?」



我：「連妳都咁覺得呀？」

Priscilla：「唉⋯⋯ 話哂咁多年姐妹，佢嘅為人同氣質無人係可以取替到。但當見到佢(佢望住Lavina)嘅時候，就好似見到Kelsey⋯⋯」

===============================================================================
「我不敢奢望得到，因為我害怕失去。」