《純愛》平安夜的天使 (完): 第四章

第四章

「喂，阿遊，我同老婆去食飯先啦！你睇住鋪頭唔好俾人偷嘢呀！」

過咗一陣之後，佢哋見有時間就出去食嘢，順便買埋舖頭要用嘅嘢，同埋現加無人，所以得我一個睇鋪都ok。

Priscilla扮嬲咁拍咗阿倫手臂一嘢，話：「哼！邊個話嫁俾你呀！係啦！Marcus，我哋食完嘢之後仲要去買咖啡豆同零件裝部新咖啡機呀，所以會遲少少返，洗唔洗我哋幫你買定份lunch先呀？」

我：「唔洗啦，我行過隔離間麵包舖買個包得啦，唔阻你哋兩個撐枱腳啦。」





Priscilla：「好啦⋯⋯ 咁你小心啲喎。唔好成日喺到發佝瞀呀！」

我：「知啦！快啲去食飯啦！」

倫/Priscilla：「88⋯⋯」
==================================================
過咗兩個鐘頭

「叮叮～」門邊響起清脆嘅鈴聲，代表有客人入緊黎~





我：「哈囉！」

Kelsey話過，招待客人嗰陣唔好講「歡迎光臨」，佢話與其講啲咁客套嘅嘢，咁不如從心而發同人Say Hi好過啦～ 真係好有佢嘅性格⋯⋯

？：「哈⋯⋯囉？」

喺佢隔離個女仔問：「做咩呀？Lavina，妳識㗎？」

當時我都認唔到係佢，可能係佢戴咗圓框眼鏡同紮咗馬尾嘅關係。呢一刻，我突然喺佢身上見到Kelsey嘅身影⋯⋯





我發現佢刻意避開我嘅視線，塊面漸漸變紅，為咗唔好將情況變得更加尷尬⋯⋯

我：「兩位想要啲咩呢？」

？：「要杯Latte， 妳呢？喂！Lavina， 人哋問妳飲咩呀！」

Lavina：「我⋯⋯我⋯⋯要杯mocha！」

我：「好嘅，兩位一共$73，隨便坐呀。」

？：「坐嗰到啦(指住近玻璃窗嗰張枱)～」

Lavina:「喔⋯⋯喔！」

我哋間嘢唔算大，就如一般啲Starbucks咁嘅大細。牆上整齊放住用淡啡色木紋畫框裱起嘅各國風景畫，配埋張大草原牆紙，令人有種遠離煩囂，與世隔絕嘅感覺～





嗰時係下晝三點幾，啲打工仔、女仲返緊工，所以無咩人。成間café得我同佢哋兩個。所以佢哋講啲咩我基本上都聽到⋯⋯

？：「妳記唔記得喺邊到唔見咗張學生證呀？我得返兩個鐘陪妳咋，等間阿May(應該佢啲Fd)約咗我食飯，妳join唔join?」

Lavina：「唔啦，我一陣自己一個搵得啦⋯⋯」

?：「唔好嬲啦！Sorry囉！前日無陪妳過生日！」

Lavina：「我無嬲喎！係諗緊張卡喺邊啫⋯⋯」

我聽到呢到，本來抹緊餐具嘅手漸漸停低咗⋯⋯ 我點比返張卡佢好? 係咪應該直接同佢講話我攞咗佢張卡呢⋯⋯

「每次的相遇都絕非必然，是冥冥中的緣分，也是生活賜予的驚喜。」