《純愛》平安夜的天使 (完): 第五章

第五章

「直接俾佢？咁樣好似好唐突，會唔會仲尷尬⋯⋯」

沖好兩杯咖啡之後，我諗緊有咩方法可以無咁尷尬咁還張卡俾返Lavina⋯⋯⋯ 如果可以喺無其他人察覺嘅情況下一一呀！諗到啦！

我就攞住兩杯咖啡，走上去佢哋坐嘅位置⋯⋯⋯

我：「你好，係兩位小姐嘅latte同mocha，請慢用。」之後我趁佢個friend篤緊機，即刻靜靜哋將張証放喺佢杯mocha前面。



Lavina：「唔該，咦？」睇黎佢發現咗張卡啦~

？：「做咩呀？杯嘢整得唔好？」

Lavina：「唔係呀。係呢，Jeanel呀，妳同妳條仔點呀？」佢一邊望住Jeanel講嘢一邊用手臂遮住張卡，慢慢將佢掃入自己個袋到。

Jeanel：「唉！唔好提啦！佢好唔識體諒人囉！原本我同佢講咗話陪你出去搵張學生証，佢又唔信，仲問我係咪去搵仔，唉⋯⋯⋯」好難怪佢條仔咁諗㗎喎⋯⋯⋯佢睇落咁outgoing，一定好易俾人搶走⋯⋯⋯

Lavina：「算啦，佢都係關心妳同驚妳派帽啫，好心妳就用多啲時間陪佢啦！有好仔又唔好好珍惜，佢遲早比帽你帶呀⋯⋯」



Jeanel：「知啦，我會係佢搞掂曬啲project之後陪佢㗎啦。話曬同佢一齊咗3年⋯⋯唉⋯⋯我都想一直留住佢呀⋯⋯」

聽到呢到，我覺得個timing唔錯，於是就開聲插咀⋯⋯

「咁你咪著返啲長少少嘅裙同無咁暴露嘅衫囉，俾佢有啲安全感嘛⋯⋯」我一邊低頭抹隔離枱一邊講。

Jeanel望一望自己件一字膊top，明顯降低咗音量：「咁講嘢㗎⋯⋯但⋯⋯但係你又啱嘅⋯⋯」吓，佢竟然無寸返我轉頭!?

我：「如果妳係愛佢嘅，就要以行動証明啦！」



如是者我地傾咗個幾鐘⋯⋯

見窗外面嘅陽光由晏晝温暖嘅淺金色漸變成刺眼嘅血橙色，Jeanel放低已經空咗嘅咖啡杯，望一望個鐘一一

Jeanel：「嘩！原來傾咗咁耐架啦！我係時候閃啦，今日多謝你哋呀，你哋慢慢傾啦！」之後就9秒9咁跑咗去。

我鬆一鬆條頸，拎起頭先擺咗喺隔離枱條抹布：「我都係時候返去執嘢啦！」

Lavina：「等陣！唔該曬你呀！好在張卡喺你到咋，如果唔係搵死我呀⋯⋯ 係呢，張卡你係邊到搵到架？」

我：「唉⋯⋯ 係妳跑開嘅時候跌咗㗎⋯⋯」哈，又諗起嗰段回憶~

Lavina一聽到，塊面瞬間好似窗外嘅雲咁染上奪目嘅緋紅色。

Lavina：「咁⋯⋯咁⋯⋯我一擘大眼就見到個陌生男人喺我隔離吖嘛，唔驚就假啦！」



我：「妳仲好講喎，妳唔諗下自己嗰晚做咗啲咩⋯⋯」Oh no，我意識到自己講錯嘢～現場即刻dead air咗幾十秒⋯⋯

於是我深呼吸咗一下，半講笑咁話：「係啦！時間都唔早啦～早啲返去陪妳條仔啦！佢都係屋企等緊妳㗎啦！哈哈⋯⋯」

Lavina輕輕抿唇，細細聲咁講：「我無男朋友㗎⋯⋯」

我：「哦⋯⋯哈哈⋯⋯Sorry！唔講住先啦⋯⋯我返去做嘢先！ 有機會再見！」

==================================================
「我們的交響曲，在此奏起。」