《純愛》平安夜的天使 (完): 第三章

第三章

「叮叮叮⋯⋯啪！」我㩒熄咗個鬧鐘。

好在嗰日係假期，我返到屋企都已經中午十二點幾一點，可能係因為喺街瞓咗一陣嘅關係，個人身心俱疲，完全唔想郁，所以一返到就去沖涼，頭都無吹就瞓咗。到咗凌晨一點醒咗一陣，煮咗個麵，食完就返房繼續瞓。

睇到呢到你應該會問：「你阿爸阿媽呢？」我都估到㗎喇⋯其實，呢個單位係Kelsey走之前我同佢喺我屋企附近合資買嘅，五百呎一房一廳一廚房，本身諗住for結婚嘅，所以我係唔同我父母住埋一齊㗎。

另一方面，我父母長時間喺大陸做嘢，四個月先返黎一次，所以佢哋喺唔喺度都無咩分別。





直到鬧鐘響起，我先去沖涼、刷牙。
沖完涼返房換衫嘅時候，我望到喺書枱上Lavina嘅學生照，於是就諗：點還比佢好呢？佢係咪住hall呢？係就尷尬喇⋯⋯遇到以前啲阿sir就唔好啦⋯哈哈⋯見步行步啦⋯

我就咁一直諗到返café⋯無錯，我就喺呢間café返工，當時同Kelsey啲friend一齊夾分開嘅。

倫：「肯死返黎啦？點呀，呢兩日搞咩黎呀？Party又唔join⋯⋯Kelsey都唔想見你咁頹法㗎！」

Priscilla：「咪就係！Marcus呀！你唔好咁啦！比Kelsey知道佢實鬧死你呀！」

阿倫同Priscilla係我嘅大學同學，同時都係呢間Dream Memory(間café嘅名)嘅另外兩位老闆。當年我可以追到Kelsey都係多得阿倫出手相助，之後佢又鐘意咗Kelsey個姊妹Priscilla，咁我同Kelsey就諗計不斷喺背後制造啲「巧合」，又推佢兩個落水又特登喺我地四個約出黎玩嗰陣玩失蹤，由四人gathering變到得佢地兩個咁⋯⋯如是者佢哋終於一齊咗，之後我哋四個就好常去double dating，傾多咗就發現我哋都有個共同夢想：開一間屬於自己嘅鋪頭。





我哋計劃咗好耐，最後喺兩年前(Kelsey死之前三個月)係尖沙咀開咗呢間café，啱啱開始嘅時候雖然係好辛苦，但都好滿足。每次忙完攰到極點，坐低係Kelsey後面休息嘅時候，見到佢認真做嘢嗰副專注的神態，我就知道自己冇愛錯人⋯⋯所以話，古語有云：專注嘅女人最迷人～

==============================================
Kelsey：「眼甘甘咁望住我做咩呀？我塊面有嘢？」

我：「係呀！我見到好大個豬頭呀！」

Kelsey：「何永遊！你等間就知死！」





我：「Catch me if you can～」

Kelsey：「喂呀！衰人！」
=============================================
「可惜，回憶有多美好，此刻我的心就有多痛⋯⋯」