隔離屋懷疑住左個痴線佬，我裝左個監視器發現佢竟然...: 25. 最後晚餐

刀仔帶左我地去佢屋企，安置好我同lucius坐底之後，我就聽到佢不停開櫃桶揾野既聲，之後聽到佢搬左啲野岀黎，再有啲密碼開鎖聲。

「刀仔？你揾緊咩呀？」等左好一陣都見佢未應我，我忍唔住問下佢。

佢冇答我，起翻身行過黎我度，將一個盒放左係我手上。

「打開佢啦...呢樣野....會幫到你。」刀仔將一個摸落似木盒既野放係我手上，我叫lucius幫我打開佢。

「...你...點得黎呢把野？佢竟然落係一個凡人手上？」lucius好震驚咁講，我急忙問佢盒入面究竟係咩黎。



「呢把惡靈刀，係我家族一代代流傳落黎既家傳之寶。林美玉，當時我咪同你講過我祖先曾經救過一隻魔鬼既，佢當時就送左呢把野比我地，話將來有日如果有魔鬼搞我地，就用佢黎制裁隻魔鬼。」刀仔好詳盡咁將把刀既來頭講比我同lucius知，原來佢家族同魔鬼有過一段咁既歷史。

「呢把刀....可以話係魔鬼既惡夢...我地惡魔本來有自我復原能力，而且平均壽命大概500至600年左右。所以除左聖水之外，一般攻擊係冇可能殺得死魔鬼。

除左...惡靈刀....呢把刀係用黎斬殺魔界既敗類，例如200年前祖先lumia想謀朝篡位，結果比我父王發現，就用左呢把刀將佢處刑，細個讀歷史我就知呢把刀既威力幾大。只要比呢把刀斬中，果個部位就會失去自我復完能力。如果刺中心臟，就會即時死亡。

但而家魔界已經冇左用呢把刀，轉左其他方式處治罪犯。所以我先岀奇，凡間竟然重有佢既存在。」lucius 對於呢把刀都非常了解，估唔到....原來魔界又呢種致命武器....

「所以.....你係想我地用呢把刀....」



我.....要用佢黎...攻擊mia？

「美玉...雖然我同你識既時間唔耐，但係.....我....咁大個仔都未試過識一個女仔肯同我做朋友又唔會嫌棄我身高樣貌，我都有自知之明既...我...知自己條件好差，一直都冇女仔肯陪我做咁多野，所以...從來我都覺得啲女人好虛偽.........但同時...又好渴望有女人同我做朋友....

我....我...

反正...呢把刀，係我送比你既禮物，我好希望，你可以生存到最後翻黎見我。」刀仔一口氣講完呢段自白，聽到我都有啲感動...原來係佢心目中，林美玉係有咁既價值。

放心啦刀仔...我一定會，留翻條命翻黎見你。



第二日，我同lucy全日係屋企計劃果日既策略。

「我查過，mia而家住既係私人別墅，隔離兩間別墅都比佢買起左。呢一張係別墅周邊地圖，呢張係別墅內部既大概方位同岀入口。」lucius遞左兩張有凹凸面既地圖比我，捉住我隻手逐處地方摸熟果邊既方位，再細心咁將唔同區域以字母分類，方面我摸黑都識點行到去指定地點。

「記得唔好行錯呀，唔記得就留係原地等我，知唔知？」

佢今日把聲，好似特別温柔，同平時串我既語氣有啲唔一樣。

我乖乖咁點頭，安靜咁聽從佢既安排。

之後佢預計哂所有將會發生既情況，再逐一安排到時我應該點做。

「到時我岀得翻黎會嗌你maymay，代表我未比佢修改記億或者魅魊到。如果我係講其他野，你就即時淋我聖水，解翻我比佢落既咒。

到時我會裝偷聽器，你聽住入面既情況。如果我講好飽，代表我將會有危險，到時你就拎把刀入黎比我。mia呢個人好醒，知我帶武器入黎一定唔會比我入去。



如果我講未飽，代表....我已經比mia攻擊，而且完全冇勝算，到時....
你就直接逃走。」

聽完佢咁講....我個心情變得沉重.....

過埋聽日之後.....

我地重有冇機會...好似而家咁...

坐埋一齊過啲最平靜簡單既生活...

點解....人永遠去到最後既時光，先驚覺活着既每一秒係異常珍貴..

「諗咩呀諗到呆左咁？」lucius 以擔憂既語氣咁問我。



「我係度諗...聽日...可能係我地一齊既最後一日...我先發覺，好似冇同你一齊做過啲咩野咁。」

「咁，聽日我地岀去玩好冇？」lucius 突然咁提議，我都嚇左一跳。

「反正..都唔知重有冇聽日，不如痛痛快快咁玩盡佢。
最起碼，萬一我真係死左，我都想係我最後既時光開心咁度過。
我黎左人間咁耐，終日忙住傾生意，收合約，都未試過真真正正咁感受下人間有咩好玩既野。
聽日就派你帶我去睇下。」lucius 笑住咁摸摸我個頭，就扶我上床，幫我蓋好被。

臨走前都不忘再三提我:「記得！聽日早啲起身呀！」然後就關上房門，淨翻我一個攤係床上面，眼淚唔爭氣咁一串串流岀黎。

我真係...有啲唔捨得佢....