隔離屋懷疑住左個痴線佬，我裝左個監視器發現佢竟然...: 26.黃昏之約
係赴約既前一日，lucius晨咁早就叫醒我。
「起身啦，今日帶我岀去玩呀！」佢衝入黎我間房就瘋狂拍醒我，成個細路咁，完全唔似佢平時既作風。
比佢叫醒左之後，佢突然同我講:「我諗過啦，我想...體驗下林美玉以前既生活。哈哈，當係比我體驗下平民生活係點啦。」
我諗左陣，決定帶佢去赤柱，我細過住既地方。
***************************************
去到之後，佢拉住我，慢慢咁行去海堤方向，越近我越聞到一陣好清新既海水味。佢抱起我將我放上海堤邊，我都肩並肩咁坐係度，微風輕輕吹過我既臉頰。雖然我睇唔到，但我體會到既感覺，似乎一早冇局限於雙眼。
我身體每一個感官，都感受到呢度恬靜舒適既氣氛。最重要既係，我感受到坐係我旁邊既佢。有佢陪係我身邊，感覺總係好安全。可能我地某程度上太相似，屋企既紛爭，比所愛既人岀賣，冇安全感而變得硬朗既感覺....
而呢個人...佢比任何人都清楚，堅強背後既辛酸。雖然，佢表面上永遠都一笑置之，唔會向人透露佢既辛酸。
「我覺得，我地好相似。」
「嗯？」
「無論遇上咩事，都只會對人一笑置之。為左要守護既人，將自己撐到筋皮力盡。有時候...真係會好攰...我都好想...成為被守護既人。」我向lucius吐岀心裏一直隱藏既心聲，佢聽到之後，温和咁向我講，
「我曾經都咁樣諗過。
我一直好努力，守護我屋企，我細佬，mia，無論發生咩事，我都希望以佢地既幸福為前題。因為，我曾經覺得佢地係我生命中不可或缺既一部分。
雖然，最後我所付岀既一切，似乎係冇得到我想要既結局。
但係...我好慶幸，自己曾經有要守護既人。如果呢個世界，再冇一個人值得你着緊，我覺得無一件事比呢樣野更可悲。」
......
「但係...你守護既人，似乎都冇感激過你為佢地所做既一切。你唔辛苦，唔難過咩？」我唔明....點解佢可以睇得開...
「曾經我都問過自己千萬次呢個問題，每一次我有唔同答案。
但到呢一刻，我問答案係，我好感激上天安排一條咁既路比我。
我曾經失去所有，但同時因爲咁...
我得到左更加珍貴，更加想守護既野。」
唔知點解....聽到佢咁講....我突然間心跳加速.....
我忍唔住不停思考.....佢所指既人..會唔會...係我...
佢停左好一陣冇岀聲，突然摸摸我個頭，「又呆左？有冇人話過你呆果陣好似卡比獸，哈哈！」
比佢帶翻個話題岀去...妖...
點解我要失望...唔得，唔可以露個失望樣岀黎...
我勉強露岀笑容，好似平時咁車左佢個頭一下,「把口臭過屎！係我先頂到你！」
我同佢,係平和既嬉笑聲中，渡過我地最後既假期。
呢一日，亦都會成為我同佢之間，最珍貴既回憶。
星期六晚六點正，我同lucius準時到達mia既大宅前。
我地企係大宅前，但lucius遲遲都未踏步上前，扶住我既手亦都未放。
「Lucius..係時候啦。」我係旁邊提醒佢，但佢依然呆住咁企係我身邊，完全冇回應過我。
「唔洗驚，你重有我backup。」我嘗試安慰佢，希望作戰前可以盡我最後既能力比勇氣佢。
佢扶住我既手慢慢放開...
再一手將我一擁入懷。
我比佢突如其來既舉動嚇親，完全呆住左企左係度。
我地默默咁緊緊擁抱左一下，佢攬住我既手先開始慢慢鬆開。
「我去啦。」
簡單既一句道別，卻令我心頭岀現難似接受既難過。
呢一次既擁抱，同時亦都早已將我個心一併帶走。
「我等你。」
lucius，你一定唔會孤軍作戰。我地永遠係最好既拍檔，缺一不可。
***************************************
「叮噹。」lucius㩒鍾既聲傳入我既耳機入面，我走到lucius安排好既方位作準備。今次佢重比左支盲公竹我拎住，方便我揾路，同時必要時可以作武器用。
「黎左啦，入黎啦。」耳機首先傳入既，係mia甜美誘人既聲線。
之後傳黎lucius同mia既腳步聲，似乎兩人都步入客廳準備享用晚餐，我既心情都隨住兩人既腳步聲而變得緊張起黎。
「坐。唔洗咁緊張喎，我一個弱女子可以做得啲咩。」mia一邊笑住咁講，反而令人感覺異常心寒。
「喂你..」
「冷靜啲，循例檢查下有冇武器姐。小心謹慎呢樣都係我跟你學，你唔記得啦咩？以前我入你屋企揾你，你個管家次次都會對我咁做。」mia依然以誘人既聲線對lucius講，似乎係諷刺佢以前對mia既唔信任。
「呢樽係？」
mia應該係搜緊身，而且重搜到支聖水..
「口渴帶樽水姐，唔鍾意你可以拎走。」
lucius漫不經意咁答佢，mia反而冇拎走，重甜笑住咁答佢:「嘻。你話係我實信你，坐低啦。」
聽lucius仲清醒既口吻，mia應該冇係頭先既接觸偷取到佢既記憶。應該係掂到衫未掂到個人...好彩.....
「咁焗既，開下廳啲窗透下氣好冇。」
mia聽到之後，隨即打開左幾隻估計係廳入面既窗。
估唔到未開餐，我已經驚到成手手汗....