隔離屋懷疑住左個痴線佬，我裝左個監視器發現佢竟然...: 24. 鴻門宴
「細佬，呢個世界除左你有要保護既人之外，其他人都有。
點解要全世界無條件去成全你兩個既幸福？你黎左人間咁耐，都應該好清楚任何事都要有代價。
我行到今日呢步，當中付岀既代價，絕對值呢兩個條件。」lucius堅持自己既條件，並冇因該lucy既說話而退讓。
「或者，你可以叫mia單獨過黎同我傾下。我都想請佢食餐飯當道歉，解翻開我地三個人既誤會。或者到時....我可以同mia商量下條件，傾得好我可能會無條件讓位比你既。」lucius降低要求，開左個新條件比lucy，究竟lucius打緊咩主意...
「單獨....你..」明顯lucy聽到佢話單獨食飯，即時起左戒心。
「過左去既事就算啦，何況我而家已經冇哂能力，冇野可以做到..我只係想好好同mia解翻開我地之間既誤會，希望你幫我帶呢個訊息比佢。
時間都差唔多，我地重有客人，你考慮好再call我啦。lily送客。」
一招反客為主，lucy聽到之後都冇再講咩就走左。
「你..重想約mia食飯？你唔驚呀？」我忍唔住問佢有咩用意。
「我開果兩個條件，我一早知佢唔會應承，以佢咁愛mia，一定唔會用佢黎做交換條件。
我知佢上得黎，一定係個心驚輸比我先會上黎同我講條件。而mia都一定會擔心我做皇既話，佢就一定冇得做魔后。
而家食餐飯就有機會換皇位，加上我已經係凡人，殺傷力近乎零。所以....我估呢餐飯，應該呢幾日一定有回音。諗定食咩啦。」
短短10幾分鍾...佢個腦已經模擬好成個計劃...呢個人個腦仲恐怖過魔鬼...
「咁.....餐飯你想點？我地兩個都未必鬥得過一個mia..」
lucius深呼吸左一啖，認真咁同我講:「當然，呢層就要靠我同你既默契啦。」
究竟.....係咩意思？
到左放工，估唔到已經收到lucy既回覆。
「三日後，mia話想親自煮飯招待你，到時請你親自上黎試下佢啲手勢。夜晚6點鍾見。」Lucius 將lucy既訊息一字不漏咁讀比我聽。
「咁同送羊入虎口有咩分別...仲要係佢主場...lucius，你確定你...要赴約？」我實在冇辦法唔擔心佢既安危，mia呢個女人冇野做唔岀。
「mia肯親自見我，佢都唔係傻既。上一次留翻我地條命搞到有而家既後患，我諗佢應該好後悔當時放過左我地。
今次赴約，應該係我地最後的晚餐。
唔係佢死，就係我亡。」lucius既語氣....感覺上已經下定決心同佢鬥過....
講真...我唔擔心就假....對手咁強大，我地既能力根本唔夠佢玩...
「....但係...我地邊趕得切預備....我....你....唔得嫁太急啦...會白白送死....」我開始語無倫次.....我實在對今次既戰爭完全冇信心。
「你信唔信我？」
Lucius 突然間問我。
我回想翻....我地呢幾個月經歷既一切.....因為佢，我先可以有翻身既機會....佢從來都講得岀，做得到，唔會空口說白話。
「信。」我非常肯定咁答佢。雖然我對眼盲左，但我內心非常清醒。我對佢既能力非常肯定..最起碼，佢係第一個重新比翻信心我既人，除左細佬，我唯一可以信既，只有佢。
Lucius搭住我膊頭，笑住咁鼓勵我:「只要我地兩個一齊，冇野係過唔到既，大不了咪一死姐。」
我苦笑住咁搭翻佢，突然好慶幸，係我最黑暗無助既時候，係一個咁樣既魔鬼帶領我走岀陰霾。
呢個恩，我一定會報翻比你。
***************************************
第二朝一大早，我同lucius就開始收集需要既物品。第一樣就係聖水，亦都係唯一可以克制住mia能力既武器。我同佢去教堂揾劉牧師，好順利就拎左一大樽走。
正當我同佢諗住走果陣，我聽到有人嗌我個名。
「林..美玉？我係刀仔呀！林美玉！！」
我...冇聽錯掛.....
係...刀仔？
我停住腳步，自稱刀仔既人一手拉住我。
「林美玉！睇個背影我都認得你！
我記翻起哂所有野啦...嗚...」刀仔突然間語氣變得激動，成個人撲過黎攬住我喊。
「刀仔....你唔係忘記左我嫁咩？」曾經同我日夜奮鬥既刀仔....我回想翻我同佢既所有回憶....
佢竟然...記得翻我....
突然間覺得好感觸....原來有人記得既感覺係咁好....終於...唔係我一個人擁有記憶...
我忍唔住同刀仔係街頭上，相擁而泣。
冷靜左之後，lucius帶住我同佢揾左個地方坐底。
「林美玉....點解....你隻眼會冇左....
係咪mia...？」刀仔知道我盲左，非常憤恨咁問我。
我一五一十咁將我呢兩個月既經歷講哂比佢聽，同時有提及我同lucius將要面對既鴻門宴。
刀仔一路聽一路激動到拍哂枱，「個mia！我真係冇估錯嫁！正一臭雞黎！如果唔係我個fd淆底迫我陪佢翻教會，仲搞到我飲埋聖水，我都唔會記翻起所有野。
如果唔係因為我跌左電話冇左你number，我一定會主動揾你！
當日我送左你入醫院，個mia唔知點收到風又走過黎探你，當時我驚佢會對你做手腳所以冇比佢入去，更加死都唔望佢雙眼。
點知....佢一手搭落我膊頭，我就瞬間....忘記左我係果度原本係做緊咩....之後重交左鎖鑰同果實比佢.....
一日都係我...先會搞成你咁....」刀仔對於呢件事非常自責，但我一直都冇怪過佢。
其實...我同佢非親非故，只係上網識既朋友。反而佢對我既信任同真誠，令我覺得異常感動。無論佢記唔記得我都好，刀仔都係我人生中重要既伙伴，一個會令我銘記於心拍檔。
「刀仔，放心啦，呢段時間有lucius陪係我身邊，我一樣過得好好呀，唔洗咁內疚，你已經為我做左好多野，真嫁，真係好夠，好慶幸有你係度。
但.....你話你飲左聖水..被修改既記憶就回復翻....？」
刀仔答左我話係，我即刻問lucius:「唔見你提起既？如果係咁...lucy咪會記翻起我？」
Lucius 好無奈咁講:「lucifer係魔鬼..佢飲聖水就會好似之前咁....
要佢回復翻記憶，只有兩個可能。
一.我拎翻mia既能力
二.落咒者既死亡
所以要我細佬回覆翻記憶，只可以對mia落手。」
刀仔聽到之後，沉思左一陣，同我地講:「或者....呢件事，我可以幫到你地。」