隔離屋懷疑住左個痴線佬，我裝左個監視器發現佢竟然...: 6. LUCIUS
就係咁，6點鍾我約左個倫敦金佬kelvin係中環一間高級cafe見面，而果一男一女係咖啡室外面等我消息。
入到去，成間cafe好細間，得兩枱客。一個男人斯斯文文，好低調係度睇緊書。另一個就着住件好醒神粉色西裝，應該就係倫敦金kelvin，真係好似于日辰話齋成個草薙京咁。
我一坐埋去，kelvin已經好熱情咁歡迎我，又讚美我一輪想博我歡心，然後就開始不停吹捧佢可以幫個客賺幾多錢。
我笑住咁一路聽一路望住佢雙眼，畢竟我都好想快啲翻屋企休息，今次速戰速決搞掂就算。
果然，佢碰到我眼神果一刻，成個人即刻呆住左，變得迷迷糊糊。
「乖，翻到去同我做兩件事。一，將余子樂層樓轉翻佢名，比翻棟物業佢。二，將你呃余子樂既錢過翻落呢個户口。」
我將户口字條拎比佢，佢木無表情點點頭，正準備離開既時候，
隔離枱既男人...望住我笑。
佢既笑容，非常詭異，而且帶點高傲既感覺。
究竟....呢個笑容係咩意思？
點解....我聽唔到佢既心聲？......望住佢既笑容，我突然覺得好不安，有一種不詳既預感。
佢慢慢合上原來睇緊既書，笑笑口走過黎，然後拍左落kelvin膊頭度。
kelvin成個人即刻好似清醒翻咁，佢望望我，再望望個男人，一臉茫然。
個男人拍係佢膊頭既手始終冇拎過落黎。
「kelvin, 你好，仲認唔認得我？」個男人突然開口問佢，但kelvin好疑惑咁搖搖頭。
個男人繼續講:「前兩日你地安泰搞水上party，我有過黎參加，重話遲啲介紹多幾個客比你個brian呀，喂，我記得果日你話今晚你個朋友結婚喎，你重係度既？」
kelvin呆下呆下咁，若有所思咁諗左一陣，突然間好似記翻起咁嗌:「係喎....奇怪，點解我會冇左件事既？...阿林小姐我地下次傾過，我有啲事走先。」然後佢就急急腳走左。
個男人.....竟然.....可以解到我既催眠？唔係...佢唔係咁簡單....
佢笑笑口咁坐左係我對面，帶住勝利既表情同我講:「原來阿法唔肯放棄，係因為揾左幫手....不過都冇用啦。
佢唔會冇同你講....如果你冇辦法完成委託人既要求....
即係...毀約既話...會有咩後果掛？」佢講完之後，比左張卡片我。
「我絕對歡迎任何人加入我既陣營，放心，我知道黎緊呢一個星期，你絕對有需要揾我。」講完佢就笑笑口走左。
我望望張卡片....
佢係....lucius？
原來呢個男人，就係lucy阿哥........
我回想起佢講既...毀約，究竟係咩意思？
lucy一直冇提過，毀約既一方會有咩後果。
睇黎，lucy阿哥存心想我完成唔到任務再投靠佢，要迫到kevin交層樓岀黎變得比我想像困難。
我急急忙忙跑翻屋企揾lucy，睇黎今次要揾佢幫忙先解決到。
***************************************
我一岀𨋢，已經見到lucy企係走廊等我。
「我知道哂啦，我阿哥已經msg我想我投降。入黎啦。」
「我阿哥既能力同我唔同。我既天賦係魅魊眾生，憑住我雙眼可以魅魊到人世間所有既生物。同時亦都係我收集靈魂既主要能力。
而我阿哥既能力，就係可以重塑人類既記憶。只要佢摸住果個人，佢可以讀取哂全部記憶，甚至可以任意修改。
mia既記憶就係比佢修改過，先會佢偷走我雙眼，再冇翻過黎....」
唔怪得...個kelvin既記憶應該就係果個時候比佢重塑左....
「我想知，你阿哥對我所講，毀約既後果，係咩意思？」
lucy聽到之後，眉頭深鎖沉默起上黎。
呢個氣氛....真係令人好不安。
「對唔住。」
喂....咩意思.....
「當初我唔記得講....我地魔界最重視既，就係誠信。
如果我地惡魔毀約的話....
將要接受「割刑」。」
割刑？....
「惡魔既身體係唔會因爲受傷而死，任何身體上既傷痕都會係第二日復原。但所經歷既痛苦就係一樣。
割刑係魔界一樣非常殘忍既懲罰...受罰者每一日都會隨機抽一個部位比刀割三下，到第二日又重複咁抽部位割....重重複複經歷劇痛，令你生不如死。而個刑期，最短都起碼50年，最長既..500年都有人試過。」
5...500年？！
我要比人日日割割足500年？！
「我屌你老母！你而家先同我講？！」我嬲起上黎隨手拎起把生果刀飛過去，一下𠝹左落lucy塊面度，留底一條好深既傷疤。
「我都知你班惡魔冇一個好人！你明知咁大獲你唔早講？而家黎同我講對唔住有撚用呀！」我嬲到完全喪失理智，轉身就離開左佢屋企。
根本呢個人，一早就存心利用我，先突登隱瞞呢件事，枉我重以為大家係公平交易....
家下你不仁我不義！
我拎翻起佢阿哥張卡片，毫不猶豫打左比佢...
lucius一聽到我電話，已經即刻叫我去揾佢。
我嬲嬲地即刻截左架的士去佢屋企揾佢，估唔到lucius住係半山，應該係用佢既能力係人間撈到風山水起。
我一入到去...已經有成排既工人歡迎我，個畫面真係何其壯觀。成間屋有兩層，每層望落都冇成千呎。屋來既怖置非常華麗，每一寸都有英國皇室既感覺。估唔到兩個都係惡魔個仔，一個就撈到風山水起，一個就潦倒不堪。
一個望落似管家既人過黎邀請我去見lucius，經過一條長樓梯同幾間客房後，終於，佢係一道墨綠色既大門前停低。
我慢慢推開大門，已經見到lucius笑容滿面咁望住我。
「我知道你會黎，突登叫工人買定支高級紅酒。」見住佢虛偽既笑容....比人感覺好心寒。
我突然間好後悔做咩咁衝動過左黎...其實都有得解決姐件事.....
「對唔住....我諗諗下..對唔住....
我唔想岀賣佢...」我戰戰兢兢咁講完已經想轉身離開。
點知佢突然間拉住我隻手。
「傻囡，你係幫緊佢。我已經知道...你地既合約。」係佢觸碰我果刻，佢已經讀取哂我既記憶。
咁...唔算係我自己泄漏合約內容掛....
「我都開門見山啦，我想你同我建立合約。
我既合約只有一個條件，就係阻止lucifer同我爭我爸爸個位。
我知道，你同佢本身有約。我應承你，同我合作絕對唔會違犯到你同佢既合約。
一.只要你肯應承，lucifer既雙眼我可以即刻交比你保管。
二. 我應承你上位後唔會傷害lucifer，佢可以繼續佢自己既生活
三. 你可以繼續幫助lucifer重新振作，我都唔會干涉。你只要用你既方法令佢放棄爭位就得。」
可以....拎翻佢對眼....？
「其實我都係想我細佬好過啲姐，你諗下，你唔幫佢，佢就真係咩都輸哂，而且永久失去佢既雙眼同能力。
你覺得你地而家有得同我鬥咩？
個結局只會係佢永遠失去雙眼同能力，變做一堆爛泥。而你就會因為違犯合約而受割刑。
但而家，你有機會揀，你可以選擇救佢，唔係由佢走上絕路。
你只係...幫佢唔好戀棧權位，過翻佢平常最快樂既生活，扶翻佢起身，咁樣絕對唔係害佢。唯有係咁，你同佢悲慘既結局先得以改寫。」
佢講得...唔係冇道理。以我地而家既處境，無論我同lucy，都唔會有好結果.....
反而....我簽左約，大家都可以雙贏，lucy都可以有翻佢雙眼睛，唔洗走上絕路.....
我地兩個...都可以得到救贖。
諗到呢到，我已經決定左...
只有簽約，先係我地係死胡同入面既唯一岀路。