隔離屋懷疑住左個痴線佬，我裝左個監視器發現佢竟然...: 7. 醒覺

正當我拎起筆想簽既時候...

「啪！」有個女人突然間衝左入黎。當我回過神佢已經一手撕左我份約。

佢擰轉頭望住我雙眼，我發現.....我.....

...............我...

...................我個腦......



諗唔到野..........

迷糊間...聽到lucius大嗌個女人做....mia........

...............

到我清醒翻既時候，已經發現自己到左屋企樓下。

究竟....發生咩事...點解我完全冇頭先既記憶？



頭先個女人望住我果雙眼....同lucy之前相入面對眼好似係一樣，散發住好強烈既惡魔氣息。而家回想翻.....果個女人.......

應該就係mia。

冇估錯的話，lucy對眼同能力已經比mia用緊，由我同佢對望果刻起，我就完完全全忘記哂中間發生咩事。無論我點回想，都諗唔起失去左既記憶.....睇黎lucy對真眼既魅魊能力，遠遠在我之上。

無奈之下，我只好翻屋企沉澱下先，畢竟所有事實在發生得太突然...

我一行岀𨋢，就發現lucy屋企道門打開左，應該係示意我入去。



「lucy...我...」正當我想入去為頭先衝動既行為道歉時，我發現......

lucy......係幾個鍾前仲係蓬頭垢面，不堪入目，仲有陣酸臭味既佢....而家成個人煥然一新，成身既衣着變翻乾淨企理，白恤衫同吊腳褲將佢高挑既身型完美融合，腳上既鬚渣已經完全清哂，變翻白白滑滑。本身過長面厚實既頭髮經過修剪，佢原本既輪廓終於岀翻黎.....望望下....真係有幾分似盲左既金城武......

「坐底。」

面對住而家呢個佢，我突然好似冇哂抵抗力咁乖坐係飯枱前。佢唔知係邊度拎左兩袋麥記岀黎遞比我。

我望一望....係脆香雞翼餐加大，仲加左三蚊轉檸茶。

「我係人間一直有留意開人類既生活，知道不少人類最豪華既舉動就係去麥記呢間高級餐廳叫加大。希望你收左呢份重禮....可以原諒翻我既失識。

多得你果刀，一下介醒左我。

我先發覺自己係幾咁浪費時間，我係由幾時開始..窩囊到連收個靈魂都收唔到。我以前...根本冇驚過割刑，呢個世界冇我收唔到既靈魂。



我應承你，我唔會輸比我呀哥。
我已經冇野可以再輸。
聽日，我一定可以幫你收到佢地既靈魂翻黎。」lucy好認真咁將雞翼遞比我，感覺佢真係想重新黎過，唔想頹廢落去。

諗諗下我都有衰衝動既....大家當打翻個和啦。

我笑住接過雞翼，同lucy一齊共進宵夜...

原來，同魔鬼一齊食野既感覺....

都唔錯。

至於mia原來同佢哥哥重係一齊既事.....我都係暫時隱瞞住先...等到時機成熟先再話比佢知。



而家最首要既事，就係要搞掂個kelvin先得。

我再次打比kelvin想約佢傾投資，發覺佢已經冇聽我電話。

情況睇黎唔係太樂觀....究竟佢修改左kelvin咩記憶...先會令到一個倫敦金佬有錢都唔揾？

無辦法之下，我唯有用lucy電話作一個身份約佢岀黎，佢主動邀請我去上佢office傾。

「我阿哥唔知改左佢咩記憶...感覺上有啲唔妥...為安全起見，聽日我地都係帶啲武器旁身先上去見佢。」lucy若有所思咁警惕我。

「但...你身為惡魔冇超能力嫁咩？仲要武器？」

佢好無奈咁答我:「我雙眼係我最強大既能力來源...冇左佢，基本上我得翻兩成功力嫁咋...重要分左啲能力比你，而家既我，只可以讀心，重有用意念控制一啲野，例如開下門，熄下燈嫁咋。」

原來佢既力量八成都來自佢雙眼...究竟當初咁強大既佢究竟係咩情況下先會比人偷走咁重要既野。



無奈之下，我唯有帶把刀仔同繩旁下身，以備不時之需。

準備好所有野之後，我第二日放工就翻屋企接lucy，拖住佢一步一步走去安泰office。

佢一邊捉住我隻手跟住我行，突然間若有所失咁講左句:

「而家，你就係我對眼，我只會跟住你一個。無論發生咩事，都唔可以離開我。呢個係命令。」

雖然佢既語氣係冷冰冰，但係係我耳中，彷彿感受到佢對安全感既喝望。

佢曾經比愛人拋棄過，岀賣過。一無所有既佢，而家淨翻既，只有我。唯一可以信任既我。

突然間，我覺得呢個人，一直都過得好孤獨。原本再強大既惡魔，都同我地人類一樣，渴望有一個信任既人比佢依賴。



諗到呢度，心底裏岀現一陣酸楚既感覺。我緊緊咁捉住佢隻手，將佢對我既信任緊緊詺記於心。