隔離屋懷疑住左個痴線佬，我裝左個監視器發現佢竟然...: 5. MIA
「入黎啦。」lucy無咩力咁行翻去佢張床度。
我企係門口，遲疑左好耐先踏岀左第一步。
就係我第一下踩入間屋既同時，一隻甲由已經命喪黃泉。
「阿lucy...你屋企養開甲由嫁？」
「原來...呢種生物叫甲由。係我冇左雙眼之後我就冇理過間屋，唔怪得成日有野係我個身爬黎爬去。」
我見到呢個不足200呢既地方，除左廁所之外就係佢個廳，有張床放左係廳既角落。而我無辦法睇到佢地板係咩色，啡色掛...因為滿地都係垃圾，速食包裝袋，飲料盒，唔少上面重爬緊啲甲由....當然都有重有大量昆蟲死屍，唔講我以爲自己去左甲由繁殖場，呢度驟眼望落都已經有幾十隻甲由。
「阿lucy，你呢衫幾日冇洗呀，你睇下上面都有甲由既....」
「唔怕話你知，我條底褲已經反轉再反轉着左兩個月。」
屌！痴撚線，我懷疑佢春袋裝既係甲由唔係精。
「咁你唔怪得人地天堂果邊咁多人去啦，你睇下你，身為咩q惡魔之子，個形象重衰撚過劉江華。」
「我都知...所以你今日黎得啱，係時候要改下形象..今日你就幫我執屋啦。」
佢依然係木無表情咁攤左係床。
「痴線，我難得放假你整壇咁既野比我？！」我講完即刻想翻岀門口走。痴線，咁撚核突既屋要我執，我入左黎聞到陣酸臭味都想嘔。
「啪。」大門一下砰埋左。
我望一望lucy，佢即刻拎住我份約搖兩下。
屌，死盲佬，我就知冇咁着數，魔鬼都係仆街黎。
我唯有死死地氣，開始將甲由一隻一隻踩死.....
我一路幫佢清垃圾既同時，發現角落有一疊相，比佢啲臭衫遮住。
我好奇拎起黎睇，全部都係lucy同一個女人既親密合照。
相入面既lucy，面色比而家更加精神飽滿，而且每一張都滿帶笑容，同而家瘦骨嶙峋，木無表情既佢判若兩人。
最令我留意既，係佢既雙眼。lucy雙眼係相入面，橘啡色既眼睛比普通人更加奪目搶眼，而且帶一點頑劣不羈既感覺。果個時候既佢，先真正擁有惡魔既氣場。
我擰轉頭望一望而家既佢，同爛泥冇分別。蓬頭垢面，不修邊幅，面頰瘦到好似營養不良咁，而且手指腳趾甲群哂黑邊，成個人一啲光彩既氣息都冇，過既似乎都係行屍走肉既生活。
「做咩停哂手？係咪揾到我同mia既合照？果堆你當垃圾清左佢啦。」lucy好黯然咁答我，原來相入面就係拎左佢雙眼既mia。
mia係每一張相都影得非常美艷而不庸俗，五官符合黃金比例，非常標緻。肌膚望落好似白雪一樣嫩滑，重要魔鬼身材，個胸起碼有c到d，呢個女人靚既程度可以話係同肥苟不相伯仲，只可以用完美黎形容。
真係完全想像唔到，一個咁完美既女人竟然會搶走lucy既雙眼。
我諗，於佢而言，失去mia可能比失去雙眼更加痛苦。
就係咁，我足足花左近二十個鍾，清左接近廿幾袋垃圾，噴左就兩支清新劑，洗哂啲臭衫，終於將佢間屋執翻正常企理。
而果疊相，我偷偷收起左。雖然佢把口話扔，但我感覺佢根本未放低。廢是遲下又怪我扔左佢個mia就麻煩。
我望一望lucy，佢已經係床訓着左。
「叮！」lucy電話震左下，一個叫斯既人發左個訊息比佢。lucy電話有將文字轉做聲音既功能，我好奇望下，呢個魔鬼都有朋友同佢傾計？
「法，過左咁耐啦都，你而家冇左對眼，我知你就撐唔住啦。如果你決定改變主意，你對眼隨時都可以比翻你。」
斯？...
對方似乎係知道佢惡魔既身份...莫非係佢阿哥盧修斯？
改變主意...又係咩意思？
睇黎，mia同佢阿哥，重有佢失去雙眼都有關係。要攞翻佢雙眼，睇黎一定要搞清楚來龍去脈先得。不過我見佢訓得咁好，而家都就半夜，我都係遲下再問佢啦。
臨走既時候，我先發現佢係床既角落，有個電讚同一舊....唔知咩黎既野。大概手板咁大，六角形咁，似乎係用木据岀黎，但唔知係咪因爲睇唔到据到個形狀好參差。上面仲有幾個窿，但都係不規則咁排。我懷疑三星期前啲電鑽聲就係因為整呢舊野，不過我真係完全睇唔岀咩黎。
我幫舊野影左張相，打算自己查下，舊野會唔會關佢雙眼事。
搞搞下已經凌晨四點。我急急腳行翻自己屋企，冇幾耐就訓着左。
一大早起身，就要即刻趕翻工。除左琴日未解通既問題之外，我重要煩呢個星期淨翻三日可以點收多兩個靈魂。
搭搭下小巴，我見到一對情侶行左上車。佢地個頭都一樣有個9字。
睇黎...佢地可以做我既新目標。
「今次....跳樓都唔掂......我層樓....咁就冇左.....」聽個男人既心聲，似乎係關於錢既問題。
「點解我地會咁蠢信佢.....點解....而家我咩都冇啦....」個女人既心聲，聽落似係比人呃錢，睇黎係比某個人呃左層樓，導致財困問題。
佢地落車既同時，我都跟住佢地落車。之後係個轉角位截住佢地。
「話我知...你地有咩困難，無論咩我都可以幫你實現。」我用我雙眼，一下就魅魊住佢地，個男人慢慢咁將佢地比個倫敦金佬呃左層樓既過程講哂比我聽。
原來佢兩個比左兩萬蚊個倫敦金佬，賺左四萬之後，衰貪心比埋層樓人炒。咁撚on9既人真係都唔係好想幫，但為左交數冇計啦。
「只要比你地既靈魂我，無限既財富同層樓都絕對唔係問題。」我一次過將兩份合約同時交到佢地手上。
一聽到有錢，佢地反正都冇野好輸，所以都好爽快咁簽左。
「今晚6點，中環等。」就係咁，我拎住兩份合約同倫敦金佬個電話，轉身微笑離開。