【慎入.無厘頭重口味痴線故】好對唔住，我哋醫院嘅報告已經證實咗你。。。。。: 磁通

其實件事係咁嘅，我離開呢度係因為要幫德叔拎隻燒鴨返嚟呀嘛，而德叔佢原來就係喺呢一段時間度出事。

話說德叔佢喺我離開咗之後，依然都好熱心想幫我查出解咒嘅辦法，所以為咗咁，佢竟然走去翻查古藉，希望可以搵到解咒嘅線索。

「佢揭起咗嗰一本平時連掂都唔准掂嘅禁書，雖然我唔係好清楚咩事，但係我估係嗰個女人有關㗎啦。」

「我諗我知你講緊邊個，佢係德叔生命裏面一個好重要嘅人。總之一日都係我唔好，如果唔係我嫌德叔長氣，想佢講快啲，佢就唔會有藉口點我出去，佢可以繼續講嘅話，就唔會亂咁查禁書查到出事。」

「佢女人同你一樣都係中咒，所以佢好自然會咁緊張你呀。」





佢講咩話，芸姨同我一樣都中咗咒？我諗我終於明白點解德叔當初要講佢同芸姨嘅愛情故事，佢咁做原來係安排好晒嘅，我真係好傻呀。

「你都唔好咁灰心喇，既然德叔已經講緊佢哋嘅故事畀你聽，你就更加應該去救佢返嚟，等佢講埋成件事嘅來龍去脈出嚟先係㗎嘛。」

「你今次又講得幾啱聽，我仲有好幾個迷思未解一定要問返德叔，不過我要點做至救到佢呀？」

「救德叔嘅方法，可以講係一言難盡，但我可以長話短說。」

唐正宇份人都幾直接，說一不二，真係馬上就講出救德叔嘅具體辦法，果然快人快語。





「好彩之前德叔有向我提過吓呢個方法，但我哋一直都等唔到有呢項異能嘅人，所以之後都不以為意，無再理呢樣嘢啦。」

最令人始料不及嘅係，佢哋要搵嘅異能人原來真係我！

因為唐正宇口中所講可以救到德叔嘅方法，就係要動用到我體內嘅磁力嚟開啟一條通往陰間嘅通道，如果去到陰間，就有機會搵到散落咗喺嗰度嘅德叔靈魂，將佢帶返上嚟陽間。

「你一定要進入陰道，德叔先至有機會返嚟，所以全部嘅希望都喺晒你呢度㗎啦。」

「試嘅話我一定會試，但係…你下次唔好亂咁用啲簡稱喇，你睇吓佢哋個樣幾難為情？」





不過咁嘅時候都係唔好講笑啦，依家最重要係諗吓點樣運用自己獨有嘅磁力去打通條通道，每遲一分鐘，德叔就會多一分危險！

「加油呀，我哋兩姊妹會支持你㗎！」

「你哋靜啲，佢從來未試過將磁力釋放出嚟，如果有咩差池，隨時連佢都會馬上自體爆炸，會應咗嗰個咒一樣。」

姓唐嘅講得無錯，要我喺毫無經驗嘅情況下將磁力解放出嚟，實在係非常困難，根本唔知點先可以掌握到個竅門。

「試吓將身上嘅磁力集中喺一點再射出去啦。」

呢一把聲係……

「啊！！！鬼呀！」

有鬼？雅緻佢哋咁講就錯，因為喺我哋眼前出現嘅人，我知道佢係邊個。





佢就係之前喺的士車尾箱嘅嗰一個人！

呢個人全身都係血，就咁行出嚟當然嚇親兩位女仔啦，之不過佢係人嘅話，點解又會成身血呢？

「傲信呀，叫咗你唔好成日喺車尾箱度食嘢㗎啦，啲茄汁好易就倒到一身都係㗎嘛。」

「喂咪住先，點解當時你喺公路度要恐嚇我又唔畀我開個車尾箱呀，到底你哋有咩秘密好快啲講啦吓！」

點樣都估唔到，原來佢口中嘅傲信係一個咁樣嘅人……

究竟德叔你係一個咩人嚟㗎，點解你會連呢啲人都收留㗎，我諗唔明呀！

待續...