【慎入.無厘頭重口味痴線故】好對唔住，我哋醫院嘅報告已經證實咗你。。。。。: 猝逝

「德叔，我返嚟啦，耐係耐咗啲，但梁順記嘅燒鴨都一齊帶咗返嚟啦！」

「嘩，咁大張車頭相喺前面嘅？」

「好陰森好恐怖喎……」

點會咁㗎……德叔死咗？

就喺我哋見到呢個靈堂仲有係德叔嘅車頭相都好震驚唔知可以點算嘅時候，忽然間有一把聲喺我哋背後傳嚟。





「如果你哋仲想救德叔，就跟我嚟啦。」

呢個人咪就係車死交通警嗰位貨車司機？會唔會就係佢害死德叔㗎？

「我可以講德叔今次出事係絕對同我無關，德叔對我有知遇之恩，我一直都係對佢忠心耿耿，絕無半點謀害之心，希望你哋唔好亂諗嘢！」

「我哋憑咩信你？你喺公路上面做嘅嘢就足以令我覺得你唔係好人。」

「只有無用嘅人先會追悔呢啲過咗去嘅事，算啦唔講咁多你哋自己望吓嗰邊。」





司機帶我哋行去客廳嗰邊，然後指向梳化，德叔就攤咗喺嗰度！

「德叔，燒鴨帶到嚟喇，你唔好死呀！你死咗咁我點算，我都唔想死呀！」

「雖然靈堂已經擺好，但係德叔都仲有一線生機。」

我好想德叔平安無事，於是即使係我對呢個司機仲有戒心，我都只好留心聽佢講嘢。

「大家好，我叫唐正宇，係德叔最忠心嘅僕人。就喺廿五年前，當時我仲喺夜總會……」





「宇哥仔係嘛？德叔都咁嘅樣我諗依家都無乜時間畀你去話當年，不如快啲入正題？」

「無問題，不過當你知道德叔家吓瞓咗喺度原來係關你事嘅話，唔知你又會係咩反應呢？」

當雅緻幫我喺屋內搵到一啲衣物可以畀我著返嘅時候，呢個姓唐嘅居然講埋晒啲嘢，咁分別係想我內疚啫。

「啊，我啲黑膠碟畀你整碎晒啦！」

今次真係對雅芳唔住，面對咁樣嘅刺激，身體一時承受唔住而充血搞到硬晒，整爛晒佢啲黑膠碟，真係唔好意思。

「咦呀你咁樣真係好肉酸呀，快啲著返條褲先喇。」

「著返衫唔做露體狂啦嘛，我可以講未？」

「你講嘢最好小心啲，邊個係露體狂呀，我都係為咗德叔隻鴨先要搞到剝光豬，你仲要咁樣攻擊我？」





「喂呀你哋一人少句啦，救人要緊呀。」

雅緻一言驚醒，我哋兩個亦都無再嘈落去。

咁到底德叔因乜解究會搞到半個人入咗鬼門關呢，接住落嚟我終於喺姓唐呢條友嘅口中得知真相。

待續...