【慎入.無厘頭重口味痴線故】好對唔住，我哋醫院嘅報告已經證實咗你。。。。。: 傳說

呢個人就係當年有「鬼棒」之稱嘅通緝犯——洪傲信，佢嘅所作所為，簡直係男人嘅恥辱。

「阿信佢係畀人冤枉㗎，嗰幾個女仔嘅嘢真係唔關佢事㗎。」

「但當年醫院嘅驗身報告真係證明咗嗰啲女仔嘅體內有洪傲信嘅體液喎，你又點解釋呀？」

「傻仔！佢係畀人陷害㗎，呢件事德叔都知道，所以先會幫佢匿埋咋。」

聽到呢度我覺得好詫異，只係跟住落嚟嘅事，就更加係令人震驚……





到咗呢個地步要解釋洪傲信嘅身世真係要好小心，因為講得唔好隨時會令大家一頭霧水。

事實上，洪傲信並唔係洪傲信，雖然表面嚟睇洪傲信真係證據確鑿，佢無可能唔係強姦犯，但係真兇早已經消遙法外，依家呢個洪傲信只係代罪羔羊嚟……

當世界上再無人明白洪傲信嘅世界，德叔就喺嗰陣扶咗佢一把，德叔相信佢！

「阿唐，我嘅事都係由我講返出嚟喇。」

聽返信叔佢講，我初步算係理解佢嘅情形，只係要信佢講嘅嘢係真話，確實唔係咁易。





事關佢話自己係畀人調換咗身體，佢本來就唔係洪傲信呢一個人，只係幫人食死貓逃亡咗咁多年，久而久之已經當咗自己係洪傲信。

至於信叔原本真正嘅身份會係邊個，佢就似乎未想交代。或者係佢覺得呢個時候最緊要係救咗德叔先，又或者佢真係唔想講啦。

點都好，雖然係就係對信叔嘅身世係半信半疑，但我都開始練習信叔所講嘅技巧，試吓將體內磁力集中一點發射。

呢次一練，就練到第二日清晨，再咁落去德叔仲救唔救得返？而隨住時間嘅推移，我開始懷疑呢個方法到底係真定抑或係假。

於是我把心一橫，決定冒險問吓信叔，點知佢嘅答案實在令我非常驚訝，原來所謂嘅將磁力集中喺一點只係一個傳說，根本就無科學根據。





但為咗說服我繼續去試，信叔堅持要講返嗰個傳說畀我聽。

話說喺一千八百幾年前，當時嘅美洲大陸仲未被歐洲人開發，而國家嘅概念依然好薄弱，大部分地區仲係行緊部落制，民風非常淳樸。

而有關嘅傳說聽聞就係發生喺現今位於危地馬拉嘅某一片土地上面。

喺呢片土地，主要有三個部落嘅原住民聚居，佢哋分別係卡岡族、湯耶族同埋洛迪古族。

三個部落由幾時開始嚟到呢一帶土地聚居已經係無從考究，至於歷史學家就估計佢哋最少住咗喺度有二至三百年咁耐。不過可以知道嘅係佢哋三個部落喺已知嘅記載當中，雖然偶有衝突，但係咁多年嚟尚算和平，風調雨順咁樣。

直至某一年，嗰個被稱為「災星」嘅部落人毫無先兆咁誕生，三個部落之間恆古嘅平衡就由嗰陣時開始慢慢被打破。

呢個被視為會為土地帶來厄運嘅部落人出生於湯耶族，佢出世嗰晚仲咁啱遇正一場被族人視為吉祥之兆嘅流星雨，於是好順理成章咁，呢個細路就取名流星啦

咁流星嘅誕生都幾普天同慶吖，最後為咩事會演變為人見人怕嘅災星呢，信叔講返個傳說，佢話喺流星十歲嘅時候，有一件無辦法挽回嘅怪事發生喺佢身上，從此呢粒曾經象徵吉祥嘅福星就唔再受到族人嘅關顧，而係變成湯耶族裏面人人喊打嘅過街老鼠。





至於交代返嗰件怪事嘅話，其實就要講到當時佢哋三個部落主要都係以打獵為生，佢哋嘅小朋友自幼亦已經跟住父母通山跑學習打獵嘅本領，於是作為族人一分子嘅流星都唔例外，佢都係自細就開始打獵，成績仲算唔錯㗎。

所以久而久之，湯耶族當時嘅部落長老阿基沙都發現呢位小福將嘅打獵天賦，咁啱嗰陣嘅流星已經九歲半，仲有半年左右呢片土地就會舉辦三年一度嘅聯族少年狩獵大會。

呢項賽事將會分為幾個年齡層，其他唔詳談啦，但係流星就啱啱好夠秤可以參加到十歲嗰個年齡段嘅賽事，長老見到咁嘅情況當然係大力推薦佢去參賽啦，而佢嘅父母亦都無反對，仲認為可以得到長老嘅祝福簡直係無上嘅光榮添呀。

就係咁樣，流星開始踏上呢一次重要嘅征途，不過佢同時亦都走上咗一條關乎自己人生轉捩點嘅單程路，無得U-turn只可以繼續行落去。

當然如果事情發展真係可以按照住佢哋嘅安排去運行落去嘅話，就算係單程路都唔係乜嘢太壞嘅事。

只可惜賽事尚未開始，湯耶族內部已經為流星參賽一事而內訌。事源部落當中有人不滿長老未問過族人同意就擅自推舉流星成為族嘅代表，覺得長老唔尊重佢哋嘅意見，仲要求推翻長老嘅決定，重新嚟一次族嘅甄選去決定邊個先係最適合成為參賽嘅代表。

本身流星嘅父母都同意族人嘅建議，公平咁去甄選，加上佢哋以為長老之前嘅決定係獲得廣泛支持，所以先至接受推舉畀個仔參加比賽，但依家事實已經唔係咁，佢哋都想個仔係堂堂正正去比試，費事畀人話係黑箱作業啦。





之不過阿基沙長老就唔係咁睇喇，佢主張自己嘅決定係一錘定音，唔應該再作任何改變，亦即係話流星參賽嘅事佢係點都唔會改嘅。

待續...