【慎入.無厘頭重口味痴線故】好對唔住，我哋醫院嘅報告已經證實咗你。。。。。: 脫險

不過畀鏹水乸到真係好痛，我嘅動作亦都因而越嚟越慢，梁崔氏已經追到嚟啦。

「即刻殺你邊度好玩，我要慢慢嚟，用呢樽鏹水嚟凌遲你！我要睇住你逐忽逐忽肉腐蝕到無晒見骨為止。」

凌遲呢回事，我好似之前喺邊度睇過，第一刀定第二刀就係要割我嘅……點算好我一定要跑，但頭先啲鏹水就係濺中我隻腳，呢一刻我真係痛到跑唔郁。

無喇我真係絕望啦，我睇到梁崔氏要滴啲鏹水落嚟我度，無諗過自己嘅死法唔係畀谷脹嘅子宮撐爆個身，而係要咁樣畀啲鏹水攞命，再見啦各位！

「阿岳！古天岳！」





咩話唔通我真係命不該絕？

「阿妹，佢咁樣係咩事呀，成個人飛緊埋嚟嘅？」

「係磁力呀。」

無錯呀就係磁力救返我啦，同時都要多謝梁崔氏之前用凍水淋我，我諗就係嗰盤水令到德叔畀我嘅短期制磁裝置失效，亦因為咁我先至會畀的士攝走，得以逃過今次大難！

「我可以執返條命都係全靠你哋咋。」





「算啦，咁無理由見死不救啫。不過我哋兩姊妹已經無家可歸，下一步真係唔知點算好。」

睇見佢哋咁樣，我都真係過意唔去，於是就向佢哋提議可以返去赤柱德叔嗰度。

當然啦咁樣先斬後奏我就唔知德叔會唔會接受，只係講到尾佢兩個都係為咗我而同媽媽反面，有個仲無咗摯愛，渣住車都仲喊緊，如果我咁都唔理佢哋就真係泯滅人性。

所以帶佢哋返去德叔嗰度已經係無辦法中嘅辦法，唯有係希望佢老人家可以聽我解釋啦。

就係咁樣，我拎住梁順記嘅燒鴨，帶同呢兩姊妹返去向德叔交代。





由荃灣去到赤柱，今晚發生咗咁多事之後，依家已經係夜晚十一點幾啦，但我落咗車都無即刻入屋搵德叔，而係行去車尾嗰度。

因為我好想睇吓車尾箱入面到底係咪有一啲唔畀得人知嘅嘢。咁既然燒鴨嘅事都搞掂啦，我就唔再需要怕嗰個人講過啲咩啦，好，開咗佢。

「吓，點會咁㗎？」

「做咩事呀，個車尾箱有嘢咩？」

「無事呀，我搞錯咗啲嘢啫，我哋入屋喇。」

明明嗰陣我眼角係見到有條鹹魚喺車尾箱㗎喎，唔通當時太黑眼花睇錯？

算數啦唔搞咁多嘢，德叔都等咗我好耐，係時候畀個驚喜佢啦。

待續...