【慎入.無厘頭重口味痴線故】好對唔住，我哋醫院嘅報告已經證實咗你。。。。。: 突圍

「做咩眼甘甘望住我呀，我有男朋友㗎喇，阿妹就single緊，你哋今晚經歷過乜嘢我就唔係完全清楚晒，你哋自己講啦吓。」

「家姐呀你講咗去邊呀……」雅緻畀姐姐講多兩講居然會面紅，唔通佢都……算喇都係唔好亂諗嘢住，佢哋因為我而唔再嗌交都係好事嚟嘅，依家唯有專心啲等下一步行動喇。

之所以要等，係因為雅芳姐姐早著先機，已經喺雅緻扑暈咗梁崔氏嗰刻通知咗男友，叫佢過嚟救走我哋。

不過咁喎，因乜解究好似等咗咁耐佢男友都未到嘅。

好彩無耐之後雅芳終於收到一個電話。





「阿祖，你去咗邊呀咁耐嘅十萬火急呀，你到未呀？」

「我喺出面喇，但你哋落晒閘我點樣入嚟呀？」

「你部越野車咁硬淨，我哋舖頭道閘又日久失修好耐無整過，你試吓撞閘入嚟喇，求吓你喇。」

呢個聽落無乜可能成功嘅計劃，最後竟然成功咗，之不過我哋亦都負上咗沉重嘅代價。

就係有一對情人從此陰陽永隔。





「阿祖呀，阿祖，唔好呀！！！」

「家姐呀，佢走咗㗎喇，你唔好咁啦。」

點都好雖然呢一刻我為咗阿祖嘅死一樣係覺得好難過，但我依然要講返頭先發生咗咩事。

話說雅芳嘅男朋友，即係阿祖啦，佢真係聽咗女友講，連人帶車撞落去梁順記鐵閘度，點知度閘無爛只係凹咗少少，但係雅芳唔知道阿祖當時已經身受重傷，被困喺車度郁都郁唔到。

最後部車就因為漏油而爆炸，搞到車毁人亡，但同一時間炸穿咗梁順記個鐵閘，穿咗一個大窿出嚟，只係雅芳面對咁嘅事，真係好難怪佢會崩潰。





「家姐呀人死不能復生呀，再喊媽媽會醒㗎啦，要喊都遲啲先喊啦好無？」

「係我害死阿祖㗎，如果唔係我叫佢用呢啲咁荒謬嘅方法，佢係唔會死㗎，係我錯……」

雅緻講得無錯㗎，我依家都留意到梁崔氏開始有返少少反應，相信唔駛好耐佢就會醒返，到時我哋仲留喺度實會好危險。

所以我都醒目喇，嗱嗱臨攞返隻燒鴨喺手先，準備隨時走人，只可惜……

「你哋全部都唔准走！」

梁崔氏始終都係醒咗，大發雷霆嘅佢仲即刻喺附近攞咗樽嘢出嚟，肯定唔慌好嘢！

「兩個忤逆女夾埋外人嚟害你老母？好我今日就毁咗你哋容睇吓你哋仲點去溫仔！」

今次大獲，嗰樽係鏹水嚟㗎！！！





「Run-n-n-n-n!!!!!」

喺嗰刻我都唔知點解自己會講起英文嚟，唔係話以為自己拍緊荷里活猛片，不過就係衝口而出講咗囉。

「啊！」

「阿岳，你點呀？」

「灼親少少啫，無乜事嘅，你哋行先喇，我部的士就喺外面，快啲渣過嚟喇。」

於是，雅緻佢哋兩姊妹就行先一步去拎的士，至於我就忍住痛楚，一拐一拐咁行希望可以逃離梁崔氏嘅魔掌。

待續...