要生存，就要殺死自己: 第十四話
【第十四話】
揹住一個斜咩黑色大袋，手腕戴住一條奇怪既配帶，身穿一件短袖淨藍色既Tee，一條黑色牛仔褲，頭髮兩側剷到好薄，將前額既頭髮梳哂上去既人，出現係旺角火車站D出口前面，慢慢向住我地既方向行過黎，而我既腦海好快就將佢認定為未來既阿言，因為即使衣著同髮型都有變化，但個樣貌仍然可以認得出佢就係阿言。加上佢果條奇怪配帶，發出綠色既光，我就更加肯定佢就係未來人。
相反地，係芷君後面既阿言，臉上既暗瘡印仲未清，著住件有少少發黃既白色Tee，從佢一身少少毒男形象，唔洗睇其他衣著就知道佢係依個時代既阿言!
我見對方企係D出口，阿言又係樓梯行緊黎，如果我地一齊跑落去月台搭火車隨時困死自己，都係向住大方向走，於是轉頭向阿明大叫:『阿言係後面，快啲同佢出閘!快呀!』
阿明望一望芷君後面，見到阿言傻頭傻腦咁半慢跑過黎，再望一望前面既未來阿言，激動地說:『屌!』說罷，就跑去阿言到。
我就拉住芷君隻手邊走邊說:『快! 即刻走!』
由於我地仲未出閘，所以我帶芷君去到往羅湖方向既月台樓梯前，然後推佢走:『快啲走!』
芷君見我咁認真，而且阿明又真係好似有緊急事，都知道唔係玩玩下，於是聽我話跑落去搭火車走。而我見佢跑緊落去，都放心唔少，即刻跑返去阿明到。
行到阿明身邊，已經聽到阿明大叫:『快呀! 走左先講!』
我即刻拍左佢地一下:『仲係到講!? 走啦! 想死咩!』說罷，我就跑到去C出口過機出閘，阿明同阿言都跟住我走。
阿言邊跟住我地跑邊問:『遲左少少姐! 唔洗咁急呀!? 果間放題平時都唔會爆架啦!』
『有人要殺你呀! 仲掛住食!』我轉頭回應，邊望住後面有冇人跟黎。
人群之中仲未發現對方，於是我地跑得更快，務求要拋甩對方。
我地係C出口跑出黎，專登唔行去新世紀廣埸，廢事對方由D出口轉過黎捉我地，我地跑出去巴士站，再跑落去新世紀廣埸既停車埸，一直沿住斜路跑落去。
『咻咻.....咻咻』
終於跑到停車埸出口，我地決定跑過對面馬路避佢，於是唔理條路有冇車都好，都衝上去。路上既車見到我地跑出馬路，即時剎制，仲係咁『咇』我地，我地都唔理得咁多，一直揚手然後跑過對面街一間濠苑茶餐廳。
再轉身望望新世紀廣埸停車門口，無人追出黎，睇黎我地拋甩左佢。
正當我仲想跑既時侯，阿明叫停我:『等陣!』
『咻咻......做....做咩呀!』我喘哂氣地說。
『咻咻......點解我地要走? 報警啦!』
『報得黎都蚊訓啦!』
『屌啦星!我地三個人! 唔信唔夠佢揪!捉住佢黎問清楚!』
『你地究竟係到講咩呀?』阿言抖順條氣黎問。
『阿明! 人地有備而黎! 我真係唔想做咩英雄用條命黎博!』
阿明望住我，再望望停車埸出口，然後大叫:『激氣呀!屌!走啦走啦!』
接著，我地走入花墟道，見到前面有個地盤，由於夜晚開始無咩人，於是再向前跑，原來兜左個大圈，又黎埋新世紀廣埸停車埸門口對面。
我地企係金利大廈門口係到裝下對面有冇人出黎，點知都係無，會唔會真係走甩左，為左安全起見，我地繼續跑，一直跑到去亞皆老街到，岩岩見到有架87D巴士係到，我即刻叫佢地上去!
『喂喂! 你地返屋企呀? 頂......我唔係搭87D囉!』阿言終於忍唔住發火。
我地照推佢上車，幫佢比埋車錢，終於架巴士關左門，慢慢駛走。
依個時侯，我同阿明終於鬆一口氣，順便抖順條氣，跑到我地出哂汗，個背幾乎濕撚哂，唉唔撚驚。
『你地好講發生咩事! 你地差人錢呀?』
阿明望一望我，然後問:『講唔講比佢聽?』
我諗左一陣，件事既然發展到咁，阿言有權知道件事，而且比佢有個心理準備都好，第時見返自己既話都可以有所防備。
於是我同阿明一五一十咁講哂比佢聽，阿言聽到都好無奈，佢既無奈唔係覺得件事怪，而係覺得我地玩緊佢。
『點呀! 好好笑呀! 得未呀? 幾大呀你地!仲玩埋依啲無聊野!』
『玩? 我跑撚到索哂氣! 你話我地玩? 我地救撚左你呀!』阿明似乎跑到燥底，因為我地博命救佢，但阿言竟然唔領情。
阿言見到阿明咁火，都覺得唔好意思，於是說:『對唔住......我......』
我拍一拍阿明說:『算啦，佢唔信都好正常姐! 我當初同你講個陣你都唔信啦!』
『唉! 依家連阿言既未來人都黎左! 姐係話其他人都陸續出現! 你今日唔係話班上面既同學仔愈黎愈少咩!佢地肯定比班未來人殺左!』
阿明愈講愈大聲，令到巴士上面既人都望住我地。
『你細聲啲先啦! 兵來將擋，佢地出現，我地反抗咪得!』我說。
『咩話? 兵來將擋? 剩係頭先阿言既未來人黎左! 我地都淆底到跑左幾條街呀! 擋? 點擋呀?』
諗諗下，我頭先仲講話唔想做英雄搵條命黎博，依家話兵來將擋，咁講真係有少少矛盾，我地名符其實係"兵來將逃"。
『唔得! 下下都走唔係辦法! 日日過住比人追殺既日子，我寧願死左去!』當阿明講到"寧願死左去"果到，就大大力拍一拍架巴士，在埸既人又望住我地，但我知道阿明開始受唔住，捱左兩星期，滿心歡喜以為唔洗再過住依啲日子，但原來件事一直都發展緊落去。
我諗最清楚最明白阿明既心情，只有我一個。
『阿言，歡迎加入我地，件事暫時應該得我同阿明，仲有你先知。』其實我唔知點解咁講話要加入我地，只係諗到依家多左一個人黎分擔我地既情緒，不自覺地諗成我地係一個團體。
阿言雖然仍然唔係好明我地講緊咩，一時之間唔係幾消化得到，但唔想再講啲負面說話黎刺激我地，唯有回應:『我知道!』
過左幾個站，阿言見到下一站就係九龍塘，由於佢唔係住馬鞍山，所以想係到落車。我見我地都甩左個未來人，我相信佢應該追唔到，於是我就放心比佢走。
『阿言! 你要記住! 我地講既說話係真! 依家未來既你要殺你，你記得要小心啲! 鎖好門! 出門要提高警覺! 知嗎?』我好似阿媽咁，好長氣咁叫阿言小心。
『嗯! 明白!』說罷，車站到左。
阿言望一望阿明，岩岩激到阿明咁嬲，不禁有啲內疚，於是道歉地說:『阿明，對唔住。』
坐低左係巴士樓梯既阿明，低著頭無回應阿言，只係揚下手以示再見，依一刻既阿明感到精神開始崩潰，身心都好累。
我見到阿明咁都覺得好無奈，但其實我都唔係好得好多。
阿言見到阿明揚手，便轉身落車離去。當佢落車個一刻，我順便留意有冇人跟埋阿言落去，好驚對方一早上左車，但好好運，依個站只有阿言一個落車，我先真正放心。
我坐低左係阿明格離，拍一拍佢膊頭說:『返去沖過涼，早啲訓，聽早返中大先慢慢再商量。』
阿明點了頭，就繼續伏低。
而我就呆呆咁望住巴士外既景色，巴士愈行得快，景色既畫面就好似播影片，飛快地播走，將我腦入面諗既野一一飛走，空白一片，我真的累了。
..............................................
另一邊廂，阿言轉坐火車返屋企，終於去到屋企樓下。
當到左升降機門口後，阿言行左入去，腦海無諗到未來人既事，反而最令佢關心既，係岩岩頭先係巴士激嬲阿明既情況，一直諗一直諗，愈諗愈覺得內疚，不禁嘆了一口氣地說:『都係Send個Whatsapp比佢道多次歉先。』
當拎部手機出黎時，抬頭一望，發覺自己掛住諗，都仲未禁自己既樓層，正想禁既時侯，見到有個著住一件短袖淨藍色既Tee，一條黑色牛仔褲，頭髮兩側剷到好薄，將前額既頭髮梳哂上去既人企左係禁lift既位置。
阿言意識到前面就係一條MK仔，心入面既毒撚性格又浮出黎，唔敢叫對方借過比佢禁lift，唯有等佢出lift先再禁。
樓層到左27樓，阿言心諗:『謝天謝地，又會咁岩到我住個層。』於是開門後，阿言好快咁跑出去。
行左幾步後，阿言邊行邊拎住手機想Whatsapp阿明時，突然有人係背後叫左一聲:『阿言!』
當阿言轉身一望既時侯，伴隨住一把界破喉嚨，劃破皮膚既聲音同時出現。
" 呀.......呀......呀......."
【第十四話完】