要生存，就要殺死自己: 第十三話
【第十三話】
兩星期後。
我如常咁搭巴士返中大上堂，生活好似回復返流落荒島前既節奏同規律。
過去兩星期既日子其實真係幾難捱，每一日都好擔心屋企人既安危，每一日係屋企等待佢地返黎果種心情真係非常忐忑不安，佢地只係遲左少少返屋企，我就已經好緊張咁狂打電話比佢地，令到自己非常敏感同神經質，而且每當我落街買野，返學既時侯都會提高警覺性，盡量走入人多既地方，每一日都當自己比人追殺咁，就係咁，我既心理壓力非常大，每晚無覺好訓，經常半夜起身Check下鐵閘同大門有冇鎖上，令我精神狀態開始慢慢崩潰。
兩星期後，無任何事發生過係我地身上，我係到諗件事會唔會真係已經完結左!? 許雯同果位巴打既事真係好似我之前咁諗，只係個別事件，又或者政府真係做左應對既策略，將未來人既問題解決左。我諗我應該放鬆一下心情，好好將生活變返正常，我只係一個二十二歲既後生仔，唔想再為所謂未來人既事浪費自己寶貴既青春，講到底，我今年就畢業，好應該盡情享受最後一年既大學生活。
返到Lecture room，已經見到阿明坐左係中間位，我就順道坐埋去。
『今日咁早既?』我坐低後說。
阿明邊玩部手機邊回應:『係Hall行落黎好快姐。點呀? 有冇發生過咩事? 』
『無呀，咩事都無發生，屋企人都無提過見到另一個自己既事。』
『哈，我果面都無咩問題，可能件事真係完左。』
『望就咁望啦，依種每一分每一秒都充滿住不安既日子，如果再過多一段時間，我諗未來人未黎之前，我已經痴左線。』
『不如今晚食餐勁既! 就慶祝我地回復正常既日子!』阿明突然提議說。
『我同你兩個呀? 我發覺自己每一日都同你傾電話聯絡真係好Gay!』
過去兩星期，我同阿明幾乎每幾粒鐘就通一次電話黎向對方報告情況，我地信唔過Whatsapp上既文字，假設我地比人殺左，對方隨時用Whatsapp扮我地，單憑文字根本分唔到對方係唔係未來人，雖然曾經有諗過大家諗一個暗號出黎，但為左保險啲，我地決定用電話黎溝通，用聲音黎分辨出係咪未來人，如果未來人既話，聲音一定會有少少變化。
『叫埋阿言囉，叫埋你細妹都得架!』
『叫芷君? 拿! 死仔! 你唔好打我細妹主意呀! 我唔放過你架!』
『丫…..點解每個阿哥都會咁驚自己個細妹同自己兄弟一齊架?』
『總之你唔好打佢主意啦! 兄弟都無得做呀!』
『超!』
隨後，Professor Chan到左，課堂都差唔多開始，我望一望手錶，再望一望班上既同學，不禁覺得有啲奇怪。
『喂，阿明，你覺唔覺得最近我地班入面既同學仔愈黎愈少呀!?』
阿明聽到我咁講之後，突然停止再玩手上既手機，抬頭望一望，內心不自覺地數起人頭，數數下，發覺真係少左好多同學仔。
『依個Course上星期有三十幾人上，你睇下今日，十個都無，連平時班讀書撚都唔係到，你唔覺得奇怪咩?』
阿明面色一沉，諗左一陣，之後不斷講好多解釋出黎:『會唔會就黎Mid-term，班人去哂溫書呀? 同埋天氣愈黎愈凍，走堂都好正常姐，依啲天氣邊會有人咁早起身返學呀。』
『話明讀書撚，又點會走堂，你睇下William，佢出哂名唔會走堂，堂堂都會上足! 但依兩個星期既堂，你有見過佢返咩?』
『咁岩姐，可能爆流感個個病哂姐，下星期啲人就會返黎架啦!』
『咁……如果下星期返黎既人數更加少既話，會唔會……』我另有所指地說。
『喂喂喂! 岩先我地先話要慶祝回復返正常生活，依家又講埋啲咁既野? 你不如諗下，如果真係未來人殺左佢地，點解咁耐都無人搵我地? 如果你真係擔心既話，你打比啲同學仔問下囉!』阿明似乎有啲燥底，佢實在唔想再扯上任何關於未來人既事，過去兩星期我地真係就快痴線。
我望一望班上既同學仔，突然諗起一個人，於是問:『喂…..我好似好耐無見過阿言返過黎上堂喎。』
阿明聽到阿言個名後，腦海即刻回憶過去兩星期上堂既情況，真係好似無咩印象阿言返左黎，加上阿言係阿明既好朋友，阿明絕對唔會比阿言出事。
『我依家打比佢。』阿明即刻拎起部電話禁阿言個電話號碼，然後打去。
我望住阿明個對眼神係充滿不安同疑惑，似乎佢都意識到阿言可能已經遇害，如果阿言真係遇害既話，其他同學都唔例外。
『嘟……嘟……』
電話不斷重覆接駁通話既鈴聲，急得阿明不斷說:『快啲聽啦仆街!攪咩呀!』
『嘟……嘟……』
雖然我同阿言唔係好熟，Year one個陣只係覺得佢似一個毒男，講野吞吞吐吐，又怕怕羞羞，可能我有少少偏見，所以盡量唔同佢玩。不過近依兩年黎經阿明介紹，我對佢有另一個睇法，佢真係一個幾重情義既人，而且講野談吐同行為都改善左好多，慢慢脫離毒男既影子。依一刻，我都想阿言會平安無事。
『打黎搵我做咩呀?』
突然阿言企係我地身後說，嚇得我同阿明嘩左一聲，Professor Chan即刻望一望我地依一面，攪到我地好鬼尷尬。
我同阿明即時望向阿言隻手腕，再仔細望一望佢個人，睇下有冇配帶或者有冇個樣有冇改變，最後發覺咩都無變，眼前依個人就係我地一直認識既阿言。
『做咩依排唔上堂既?』阿明問。
『走堂之嘛! 你又唔係未試過! 咁驚訝做咩?』
『無，問下姐! 今晚去唔去食放題?』
『OK喎!幾點先?』
『去邊間食?』阿明轉頭問我。
『求其啦! 旺角啦! 就腳!』
『咁八點旺角火車站等啦!』
『OK! 你地咪遲呀!』阿言似乎對我地成日遲到有啲埋怨。
阿明拍一拍我膊頭，笑說:『都話左無事架啦! 你唔好咁敏感啦! 今晚我地盡情慶祝啦!』
『不如我試多幾個，打比其他同學仔問下!』
『你又黎啦!? 都叫你唔好咁敏感啦! 唔好諗咁多! Stop! Ok?』
『嗯…..』講就咁講，但我腦海仍然將同學仔無返學既事同未來人扯上關係，如果真係咁既話，未來人依件事已經開始發展到我地身邊每一個人，影響住我地既生活。
夜晚八點，由於芷君不嬲都鐘意食壽司，我見我地食放題，所以叫埋佢一齊去。當我會合左阿明之後，就一齊搭火車去旺角。
當到左火車站後，人來人往，但唔見阿言係到。
『個死仔，仲叫我地唔好遲到，我地到左佢都未到!』
我望一望隻錶，然後說:『依家八點二，都唔係好遲姐!』
『我地Book左幾點食呀?』芷君問。
『八點半，我地行過去好快姐!唔洗驚!』
『我無驚呀! 我想去廁所之嘛! 你地係到慢慢等! 我去廁所先!』說罷，芷君就去左火車站入面既廁所， 而我同阿明繼續等。
過左一陣，我係遠處見到一個好似阿言既人出現，於是說:『我見到佢啦! 揮手叫佢過黎啦!』
『邊到呀?』阿明企埋黎向住我望既方向望去。
『果到呀! 死盲佬!』我指住阿言出現既方向。
阿言前面既人群慢慢散開，突然間，我同阿明都碌大雙眼，呆呆咁望住遠處既阿言。因為我地見到眼前既阿言無論衣著同髮型都同我地認識既阿言有好大出入，最重要既係，佢手上有一條奇怪既配帶，雖然現埸燈光充足，但仔細一望，手腕上既配帶明顯地發住綠色既光，屌! 佢係未來既阿言。
『即刻打比阿言! 叫佢唔好過黎!』我向住阿明大叫。
阿明即刻拎起手提係到搵阿言個電話，邊搵邊激動地說:『屌佢老味! 依個時侯整單咁既野!』
『你個Friend仲未黎呀?』芷君突然係我地背後問。
我轉身望住芷君，呆呆望住佢，我意識到可能有其他未來人係到，芷君留係到既話隨時有危險。
於是我對住芷君大叫:『快啲返屋企!即刻!』
『下?點解呀?』芷君見我突然叫佢返去，覺得可能自己做錯左事激嬲左我。
『我叫你即刻……』我話未說完，我就呆左。
因為我見到芷君後面遠處既方向，正正就係阿言。
我再轉身一望，未來既阿言慢慢咁行埋黎。
【第十三話完】