要生存，就要殺死自己: 第十五話
【第十五話】
當我返到屋企後，阿媽已經好似審犯咁審問我:『你又話今晚帶細妹出去食飯!依家又叫佢返黎!你到底攪咩野!』
我無回答阿媽既問題，反而問佢:『芷君呢?』
『佢係你間房玩緊電腦呀! 唉! 我又遲返黎! 你個妹又要食埋啲外賣! 出面啲野食無益架嘛! 你知唔知?湯......』
我無理到阿媽既語言轟炸，反而擔心芷君，我怕佢今晚見到我地咁樣會嚇親，於是就走左入房睇下佢。開門後，只見佢呆呆咁坐係電腦面前玩Facebook。
『點呀? 今晚食左咩?』
芷君仍然望住部電腦螢幕說:『咪又係福建炒飯。』
我坐左係床邊，慢慢地說:『記唔記得邊個叫阿言? 成個毒男咁呢，上次同阿明黎我屋企打Xbox果個。』
『記得呀! 你仲話今晚約左佢一齊食放題!』
『嗯，你去廁所個陣，我地見到阿言既仇家，之前阿言得罪過佢，我怕佢地見面會有?唔好既事發生，所以唔比佢地撞到，我又怕你係到會惹上麻煩，所以咪叫你走先，Sorry!』我始終講唔出口未來人既事，我唔想芷君知道件事之後會更加驚，更加辛苦，依種生活等我自己一個默默忍受就夠了。
『早講呀嘛! 唉! 今晚仲等我咁期待有得食放題!』
其實我都好期待今晚餐放題，因為放題事少，意義先大，本來以為可以脫離未來人既魔掌，但點知件事一直繼續，而且仲有惡化既跡象。
『下次有機會再帶過你去食啦，你溫左書未呀? 咁得閒係到玩Facebook!』本來想講聽晚帶佢去食，但我都唔知聽晚會有咩事發生，我諗都係安全至少，少啲出街好過。
『傾多陣就去溫，聽日我同班同學仔要去城大個information day! 你去唔去呀? 』
『我又唔係讀City，去黎做咩? 你話你黎中大就話姐!』
『我同我啲Friend都唔識排Jupas，都唔知邊科好，諗住叫你黎幫手睇下之嘛! 你之前唔係成日去城大幫手攪咩O camp咩?』
因為我兩年前上過莊，有時會聯校幫手攪O camp做Helper，除左O camp之外，仲有唔少合作既活動，例如攪講座。而好多時揀地點個陣，都會選擇City，所以我都幾熟City既環境。
『聽日幾點呀?』如果時間岩既，去陪下佢都好，補償返今晚餐走數放題。
『聽早九點開始呀，直到中午五點! 你幾時黎?』
『我朝早同阿明返中大上堂，要十二點左右先落堂，你去住先，我落堂就黎。』
『你今次唔準再放我飛機呀! 咁聽日係城大見啦!』芷君望住我說，再輕輕打左我一野。
『好啦好啦，我聽日一定黎搵你! 你放心! 咁你快啲溫書啦!』
『你唔叫我都會走啦!你成身臭汗! 快啲去沖涼! 』接著，芷君就起身離去。
房間內再一次寂靜起黎，今晚真係跑左好多段路，學阿明所講，我地見到未來人除左只係識得走之外，仲可以做啲咩? 但唔通要同未來人鬥? 點鬥? 雖然唔知未來人係來自幾多年既未來，但我睇至少五年，什至更耐，無論體格，經驗，身手都比我地依代人進步，而且佢地有明確既目的，帶著殺意黎搵我地，我地又點同佢地鬥呢?
我行去抽屜到，拎起一把界刀。
『即使係咁，我都唔會比未來人殺到我，更加唔會比佢地傷害到我屋企人，我要好好保護佢地。』
我又回復返過去兩星期緊張不安既生活，屋企人都訓哂覺，而我將房門打開，我坐左係床到，倚靠窗口位既牆，拎住一把界刀，一直望住屋企大門方向。如果未來人要黎殺我地，係我地訓覺既時侯就係最好既機會，我依個時侯一定要好好守住屋企，絕對唔會比佢地有機會殺我地。
就係咁，我每幾分鐘閉上眼一次，再專注地望住大門，手上一直玩緊把界刀，將把界刀柄推上又推落，務求令自己可以精神?，但持續左咁既情況兩星期，我真係好累，好累.......
第二日
係廁所洗臉個陣，望一望鏡中既我，真係殘左好多好多，我諗正式兩星期內訓覺既時間加埋都唔知有冇48小時，咁落去真係唔係辦法，定係將件事話比老豆老母聽? 唉，我又唔想佢地咁擔心。
約左係樓下等阿明，只見阿明同我一樣，無哂精神，我地見到面點左下頭之後，就一直無出過聲。
搭87K巴士到大學站後。
『喂，到站!』說罷，我就起身，但當我起身時，我見到阿明竟然訓著左，連短短十分鐘時間都唔放過，阿明琴晚都無訓過吧!?
叫醒佢後，就等校巴上中大。
『點呀? 琴晚無訓到?』我問。
『無呀.....點會訓得著，連阿言都有危險，我地又點可以放鬆。』
『話時話，你有冇打比阿言?』
『無，琴晚咁惡咁罵佢一獲，我點好意思仲搵佢呢。』
『好心你收下火啦，你個陣都唔信啦。』
『兩星期都無訓過覺咁濟，點會唔火呀?』
『嗯......我最近身體都差左好多，飲咖啡飲到我想嘔，依家講講下都覺得有?頭暈。』
『依一刻我反而好想我既未來人出現，等我可以殺撚左佢!咁就唔撚洗再煩!』
我係袋到拎左另一把界刀出黎比阿明，然後說:『依把比你旁身，有咩事用黎自衛又好，殺人又好，你想點做都得。』
阿明接過把界刀後，不禁笑了:『果然聰明，界刀殺傷力大又易收埋。比我見到未來既自己，我一定用依把界刀狠狠咁收佢皮!』
見到阿明個對充滿紅根既眼睛，彷彿好似想殺人咁，殺意十足。我暫時無佢依團火，我諗最大原因係我有個細妹，可以平衡一下我心理，但阿明係獨生仔，無人可以同佢分擔同傾訴，每一日都守住屋企，每一日都過住不知所謂既生活，阿明再係咁落去遲早屈出事。
『丫!一陣落堂同我去City，芷君佢地去information day。』
『唔去!你細妹去City關我咩事，琴日你又話叫我唔好打你個妹主意。』
『去啦! 反正你都無野做，你屋企人又返哂工! 去City睇下女都好丫!』
『嗯......是但。』
『好! 咁一陣我地去!』其實我咁做都想阿明可以放鬆一下心情，我諗芷君係到應該可以令佢心情好返少少。
去到Lecture room，同學同琴日既數目差唔多，都係咁少，而阿明在意既事唔係依樣，而係阿言返左黎未。
『個傻仔又遲到?』阿明問。
我望一望周圍，真係唔見阿言既蹤跡，唔通阿言出左事?
『無事既......我地琴晚都拋甩左個未來人，阿言無事既!』我盡量安慰住阿言。
阿明突然捉住我衣領，激動地說:『琴晚甩左! 今早可能比人殺左!』
『你冷靜啲先啦!』
阿明放手後，然後說:『我去搵佢!』說罷，就即刻收恰啲野就衝左出去，我都唔理咁多，照同佢一齊走。我地依個舉動令到好多同學仔都望住我地，連Professor都大叫:『Hey! What's Going on!?』
跑出Lecture後，只見阿明已經遠處跑緊，我就係後面一直跟住阿明跑，當行到去池旁路附近時，阿明突然停低左，背住我企係我面前。
我行前正想問佢發生咩事既時侯，我見到眼前有兩個人，一個係著住件有少少發黃既白色Tee，一條休閒短褲既阿言。另一個則戴住口罩，揹住一個斜咩黑色大袋，手腕戴住一條奇怪既配帶，身穿一件短袖淨藍色既Tee，一條黑色牛仔褲，頭髮兩側剷到好薄，將前額既頭髮梳哂上去既人......
佢咪琴晚見到既未來人?
雖然戴住口罩，但我仍然認得出佢就係未來既阿言! 點解佢同阿言同時出現既? 而未來既阿言手腕上條配帶仍然發出綠色既光。
我驚訝地望住眼前兩個人，一時之間消化唔同發生咩事，阿明隨即拎出一把界刀，再將界刀柄推上，露出鋒利既界刀片，然後激動地說:『條仆街夠膽送上門，好呀! 就等我黎收你皮!』
我即刻對阿明大叫:『冷靜啲! 可能係圈套黎!』
阿明雙眼紅根盡現，視線一直專注係眼前既未來阿言，一直咬牙切齒，手上拎住一把界刀不斷抖震，恨不得將眼前既未來人碎屍萬斷。
【第十五話完】